ޣައްޒާގައި އިސްރާއީލުން ކުރަމުންދާ ހަނގުރާމައިގެ ސަބަބުން، އައިބުތަކާއެކު އުފަންވާ ކުދިންގެ އަދަދު އާދަޔާ ހިލާފަށް އިތުރުވަމުންދާކަމަށް ސިއްހީ މާހިރުންނާއި ބައިނަލްއަގުވާމީ ޖަމްއިއްޔާތަކުން ދަނީ އިންޒާރު ދެމުންނެވެ.

މި ބިރުވެރި ހާލަތު މެދުވެރިވާ މައިގަނޑު ސަބަބުތަކުގެ ތެރޭގައި، ހަމަލާތަކުގައި ބޭނުންކުރާ ގޮވާތަކެތިން އަރާ ވިހަ ދުމާއި، ބޯފެން ތަޣައްޔަރުވުމާއި، އަދި މާބަނޑު މީހުންނަށް ބޭނުންވާ ކާނާ ނުލިބި ބަނޑުހައިހޫނުކަން ތަހައްމަލު ކުރަންޖެހުން ހިމެނެއެވެ.

ސިއްހީ ރިޕޯޓްތައް ބުނާގޮތުން، ބައެއް ކުދިން އުފަންވާއިރު ހިތުގެ މައްސަލަތަކާއި، ސިކުނޑި ރަނގަޅަށް އުފެދިފައި ނުވުމާއި، އަދި ހަށިގަނޑުގެ ބައެއް ގުނަވަންތައް މަދުވުން ފަދަ ސީރިއަސް މައްސަލަތައް ފާހަގަކުރެވެއެވެ.

މިކަމާ ގުޅޭގޮތުން ސައިންސްވެރިން ފާހަގަކުރާ ގޮތުގައި، ހަނގުރާމައިގައި ބޭނުންކުރާ ހަތިޔާރުތަކުގައި ހުންނަ ބަރު ދުތައް ފަދަ ވިހަ މާއްދާތައް މާހައުލަށް ދޫވުމުގެ ސަބަބުން މާބަނޑު އަންހެނުންނަށް އޭގެ ނޭދެވޭ އަސަރު ދަނީ ކުރަމުންނެވެ.

ވަކިން ހާއްސަކޮށް، ހުދު ފޮސްފަރަސް ފަދަ ކެމިކަލްތަކުގެ ދުމަށް ހުށަހެޅުމަކީ އުފަންވާ ކުދިންގެ ޖީންތަކަށް ބަދަލު އައިސް، ދާއިމީ ނުކުޅެދުންތެރިކަން މެދުވެރިވާ ކަމެކެވެ.

މީގެ އިތުރުން، ފެން ސާފުކުރާ ނިޒާމުތައް ހަލާކުކޮށްލުމުގެ ސަބަބުން، ތަޣައްޔަރުވެފައިވާ ފެން ބޭނުންކުރަން ޖެހުމަކީވެސް މިފަދަ ސިއްހީ މައްސަލަތައް އިތުރުވާން ދިމާވާ ސަބަބެއް ކަމަށް ބެލެވެއެވެ.

ޣައްޒާގެ ހެލްތު މިނިސްޓްރީން ހާމަކޮށްފައިވާ ގޮތުގައި، ވޭތުވެދިޔަ ދެ އަހަރުގެ ތެރޭގައި ތުއްތު ކުދިން މަރުވާ މިންވަރު ވަނީ ތިން ގުނައަށް އިތުރުވެފައެވެ. ގިނަ ކުދިން އުފަންވަނީ ދުވަސް ނުފުރާ ކަމަށާއި، ބަރުދަން އާދަޔާ ހިލާފަށް ލުއިކަންވެސް ފާހަގަކުރެވެއެވެ.

ހޮސްޕިޓަލްތަކާއި ސިއްހީ މަރުކަޒުތަކަށް ދެމުންދާ ހަމަލާތަކުގެ ސަބަބުން، މިފަދަ ކުދިންނަށް ބޭނުންވާ ފަރުވާ ދެވޭނެ ވަސީލަތްތައް ނެތުމަކީ މި ހާލަތު އިތުރަށް ގޯސްވެ، ގިނަ އަދަދެއްގެ ތުއްތު ކުދިން ދުނިޔެއަށް އުފަންވާތާ ކުޑަވަގުތުކޮޅެއްގެ ތެރޭގައި މަރުވާން ދިމާވާ ހިތާމަވެރި ސަބަބެކެވެ.