ރާއްޖެއަށް މަސްތުވާތަކެތި އެތެރެކުރާ މީހުންނާއި، އޭގެ ވިޔަފާރިކުރާ މީހުންނަށް މަރުގެ އަދަބު ދެވޭގޮތަށް މަސްތުވާތަކެއްޗާ ބެހޭ ގާނޫނަށް ގެނައި މުހިންމު އިސްލާހަށް މިއަދުން ފެށިގެން އަމަލުކުރަން ފަށައިފިއެވެ.

މަސްތުވާތަކެއްޗާ ބެހޭ ގާނޫނަށް މި އިސްލާހު ހުށަހެޅީ 2024 ވަނަ އަހަރުގެ ޑިސެމްބަރު މަހު ސަރުކާރުގެ ފަރާތުން ލ. ގަމު ދާއިރާގެ ޕީއެންސީ މެންބަރު ޔޫސުފް ރަޝީދު އެވެ. ރައްޔިތުންގެ މަޖިލީހުން މި ބިލު ފާސްކުރީ މިދިޔަ ޑިސެމްބަރު މަހުގެ ތިން ވަނަ ދުވަހުއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ބިލު ތަސްދީގުކުރެއްވީ އެ މަހުގެ ހަވަނަ ދުވަހުއެވެ. ގާނޫނުގައިވާ ގޮތުގެ މަތިން، މިއަށް އަމަލުކުރަން ފަށާފައި މިވަނީ ތަސްދީގުކޮށް ގެޒެޓުގައި ޝާއިއުކުރި ތާރީހުން ފެށިގެން ތިން މަސްދުވަސް ހަމަވުމާ ގުޅިގެންނެވެ.

މި އިސްލާހުގެ ދަށުން ވަކި ޝަރުތުތަކެއް ފުރިހަމަވާ ހާލަތްތަކުގައި މަރުގެ އަދަބު ދިނުމަށް ވަނީ ކަނޑައަޅާފައެވެ. އެގޮތުން 350 ގްރާމަށްވުރެ އިތުރަށް ކެނެބިސް އެތެރެކުރުމާއި، 250 ގްރާމަށްވުރެ އިތުރަށް ޑައިމޯފިން އެތެރެކުރުމާއި، ގާނޫނުގެ ޖަދުވަލު 1 ގައިވާ އެހެން މަސްތުވާއެއްޗެއް 100 ގްރާމަށްވުރެ އިތުރަށް އެތެރެކުރުން ހިމެނެއެވެ.

މިޤާނޫނުގައި މަރުގެ އަދަބު ތަންފީޒު ކުރުމުގައި ހަރުދަނާ އުސޫލުތަކެއް ވަނީ ކަނޑައަޅާފައެވެ. އެގޮތުން މަރުގެ އަދަބު ކަނޑައެޅިއްޖެނަމަ، އެ ހުކުމުގެ ހުރިހާ ގާނޫނީ ނުކުތާތަކެއް މަތީ މަރުހަލާގެ ކޯޓަކުން ބަލަންވާނެއެވެ. އަދި އަދަބު ތަންފީޒު ކުރެވޭނީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުން އެގޮތަށް ހުކުމް ކުރުމުންނެވެ.

މި ގާނޫނުގެ ދަށުން އުމުރަށް ޖަލަށްލުމުގެ އަދަބު ނުވަތަ މަރުގެ އަދަބު ކަނޑައަޅާފައިވާ ކުށްތަކަކީ އެއްވެސް ސިފައެއްގައި އަދަބު މާފުކޮށްދެވޭނެ ނުވަތަ ލުއިކޮށްދެވޭނެ ކުށްތަކެއް ނޫންކަމަށްވެސް ވަނީ ކަނޑައަޅާފައެވެ.

މީގެ އިތުރުން، މަސްތުވާތަކެތި އެތެރެކުރުމުގައި ބައިވެރިވާ މީހުންނަށް ދޭ އަދަބުތައްވެސް ވަނީ ހަރުކަށިކޮށްފައެވެ. އެގޮތުން 20 އަހަރުގެ ޖަލު ހުކުމަކާއެކު، 75،000 ރުފިޔާއާއި 7.5 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުމަށްވެސް އާ ގާނޫނުގައި ވަނީ ހިމަނާފައެވެ.