މަސްވެރިކަމުގެ ގައުމީ ދަފުތަރުގައި ރަޖިސްޓްރީވެފައިވާ މަސްވެރިންގެ ތެރެއިން 89 ފަރާތަކަށް ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ލޯނު ދޫކޮށްފައިވާ ކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހާމަކޮށްފިއެވެ.

މިއީ މަސްވެރިންނަށް ފަސޭހަކަމާއެކު މާލީ އެހީތެރިކަން ފޯރުކޮށްދިނުމުގެ މަގުސަދުގައި، މިދިޔަ އަހަރުގެ އެޕްރީލް މަހު ފިޝަރީޒް މިނިސްޓްރީއާއި ބީއެމްއެލްއާ ދެމެދު ވެވުނު އެއްބަސްވުމުގެ ދަށުން ދޫކުރަމުންދާ ލޯނުތަކެކެވެ. މިދިޔަ އަހަރުގެ މެއި މަހުން ފެށިގެން ދަފުތަރުގައި ހިމެނޭ މަސްވެރިންނަށް މި ލޯނުތައް ދޫކުރަމުން ދަނީ "ބީއެމްއެލް މަސްވެރިޔާ ޕޯޓަލް" މެދުވެރިކޮށެވެ.

މި އިންތިޒާމުގެ ސަބަބުން މަސްވެރިންގެ އާމްދަނީއަށް ބިނާކޮށް، ބޭންކުގެ އެކި މާލީ ހިދުމަތްތަކަށް ވާސިލުވުމުގެ ފުރުސަތު ވަނީ ވަރަށް ބޮޑަށް ފަހިވެގެން ގޮސްފައެވެ. މި ސްކީމުގެ ދަށުން ޝަރުތު ހަމަވާ މަސްވެރިންނަށް އެއްވެސް ރަހުނަކާ ނުލައި އަދި އިކުއިޓީއެއް ބޭނުންނުކޮށް 300,000 ރުފިޔާއާ ހަމައަށް ޕާސަނަލް ފައިނޭންސިން ނެގުމުގެ ފުރުސަތު ލިބިގެންދެއެވެ.

މީގެ އިތުރުން، މަސްވެރިންގެ އާމްދަނީއަށް ބަލައި ކްރެޑިޓް ކާޑު ދޫކުރުމާއި، ގެދޮރު ގަތުމާއި އިމާރާތްކުރުން ފަދަ ބޮޑެތި ބޭނުންތަކަށް ބޭނުންވާ ކްރެޑިޓް ފެސިލިޓީތަކަށް ވެސް ފަސޭހައިން ހުށަހެޅޭނެ ކަމަށް ބީއެމްއެލްއިން ވަނީ ބުނެފައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ މުހިންމު އަމާޒަކީ މަސްވެރިކަމަކީ ރަސްމީ މަސައްކަތެއްގެ ގޮތުގައި ބަލައިގަނެ، މަސްވެރިންނަށް ބޭންކިން ނިޒާމުގެ ތެރެއިން ލިބެންޖެހޭ ހުރިހާ މަންފާތަކެއް ހޯދައިދިނުމެވެ. އަދި މަސްވެރިންގެ ގައުމީ ދަފުތަރެއް އެކުލަވާލުމުގެ އެންމެ ބޮޑު ބޭނުމަކީ ވެސް މަސްވެރިންނަކީ އާމްދަނީ ލިބޭ ބައެއްކަން ކަށަވަރުކޮށްދީ، މާލީ އިދާރާތަކުގެ އިތުބާރު އެ ފަރާތްތަކަށް ހޯދައިދިނުމެވެ.

ފިޝަރީޒް މިނިސްޓްރީން ބުނީ، މިހާތަނަށް 89 މަސްވެރިއަކަށް ލޯނު ދޫކޮށްފައިވާއިރު، ކުރިއަށް އޮތް ތަނުގައިވެސް ދަފުތަރުގައި ހިމެނޭ އިތުރު ފަރާތްތަކަށްވެސް މި ފުރުސަތު ހުޅުވާލެވިފައި އޮންނާނެ ކަމަށެވެ. މަސްވެރިކަމުގެ ދާއިރާ ތަރައްގީކޮށް، މަސްވެރި އާއިލާތަކުގެ ދިރިއުޅުމުގެ ފެންވަރު މަތިކުރުމަށްޓަކައި މިފަދަ ފައިނޭންސިން ސްކީމްތަކަކީ ނުހަނު މުހިންމު ދައުރެއް އަދާކުރާ މަޝްރޫއުތަކެއްކަން އެ މިނިސްޓްރީން ފާހަގަކުރެއެވެ.