އަވަހާރަކޮށްލާފައިވާ ‏އީރާނުގެ ރޫޙީ ލީޑަރު އާޔަތުﷲ ޢަލީ ޚާމަނާއީގެ ރަސްމީ އެކްސް (ކުރީގެ ޓްވިޓަރ) އެކައުންޓުން އިސްރާއީލަށް ވަރުގަދަ އިންޒާރެއް ފޮނުވައިފިއެވެ.

މި ހަނގުރާމަ ފެށުނު ފަހުން އެ އެކައުންޓުން ކޮށްފައިވަނީ އެންމެ ދެ ޕޯސްޓެވެ. ފުރަތަމަ ޕޯސްޓަކީ ހަނގުރާމަ ފެށުނު ދުވަހު ކުރި ޕޯސްޓެކެވެ. އެ ޕޯސްޓުގައި "ބިސްމި" ގެ އިނގިރޭސި މާނައާއެކު، މުއުމިނުންގެ ތެރެއިން اللّٰه އަށް ވީ ޢަހުދު ފުއްދައި، ޝަހީދުވެދިޔަ މީހުންނާއި ޝަހީދުވުމުގެ އިންތިޒާރުގައި ތިބި މީހުންގެ ވާހަކަ ބަޔާންކުރާ ސޫރަތުލް އަޙްޒާބުގެ 23 ވަނަ އާޔަތުގެ މާނަ ހިމަނާފައިވެއެވެ. މިއީ ޚާމަނާއީ ޝަހީދުވެވަޑައިގެންފިކަން ނުސީދާކޮށް އަންގައިދިނުމަށް ކުރި ޕޯސްޓެއް ކަމަށް ބެލެވެއެވެ.

ދެވަނަ ޕޯސްޓު ކުރީ މީގެ ގަޑިއެއްހާއިރު ކުރިންނެވެ. އެ ޕޯސްޓުގައިވާ ކުރެހުމުން ފެންނަނީ ބިމުގެ އަޑީގައި ވަރުގަދަ މިސައިލެއް ތައްޔާރުކުރާ މަންޒަރާއި، އެ މިސައިލް ދަތުރުކޮށް އިސްރާއީލުގެ ބޮޑު ސިޓީއަކަށް ވަރުގަދަ ޙަމަލާއެއް އަރާ މަންޒަރެވެ. އެ ފޮޓޯއާއެކު ލިޔެފައިވަނީ، ޒަޔަނިސްޓުން ހެދީ ވަރަށް ބޮޑު ގޯހެއް ކަމަށާއި، اللّٰه ގެ އިރާދަފުޅާއެކު އޭގެ ނަތީޖާއެއްގެ ގޮތުން އެމީހުންނަށް ގޮތް ހުސްވާނެ ކަމަށެވެ.

މި ޕޯސްޓާއެކު ހުޅަނގުގެ މީޑިއާތަކުގައި ވަނީ ބޮޑު ސުވާލެއް އުފެދިފައެވެ. އީރާނުގެ ރަސްމީ ސިޔާސަތަކީ ނިއުކްލިއަރ ހަތިޔާރު އުފެއްދުމަކީ އިސްލާމީ ޝަރީޢަތާ ޚިލާފު ކަމެއް ކަމަށް ބަލައި، އެފަދަ ހަތިޔާރު ނުއުފެއްދުމެވެ. ނަމަވެސް، އީރާނުގެ އަސްކަރީ ޤާބިލުކަން ހުރި މިންވަރުން ބޭނުންވެއްޖެ ހިނދެއްގައި ނިއުކްލިއަރ ބޮމެއް އުފެއްދުމަކީ އެ ގައުމަށް އުނދަގޫ ކަމެއް ނޫން ކަމަށް ދިރާސާކުރާ ފަރާތްތަކުން ބުނެއެވެ.

އިސްރާއީލުގެ ވަރުގަދަ ޖާސޫސީ ނިޒާމަށް އީރާނުގެ މިފަދަ ސިއްރުތައް އެނގޭނެ ކަމަށް ބެލެވުނު ނަމަވެސް، ޚާމަނާއީގެ ރަސްމީ އެކައުންޓުން މިފަދަ ސީރިއަސް އިންޒާރެއް ދިނުމަކީ ކުޅިވަރަކަށް ކުރާނެ ކަމެއް ނޫން ކަމަށް މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ.