މެދުއިރުމަތީގައި އިޒްރޭލާއި އެމެރިކާ ގުޅިގެން އިރާނާ ދެކޮޅަށް ފަށާފައިވާ ހަނގުރާމަ ކުރިއަށްދާނަމަ، އޭގެ ނޭދެވޭ އަސަރު ދިވެހިރާއްޖެއަށް ވަރަށް ބޮޑަށް ކުރާނެ ކަމަށް އިނަރ މޯލްޑިވްސްގެ ސީއީއޯ މުހައްމަދު ފިރާޤް ވިދާޅުވެއްޖެއެވެ.

މިއަދު އެކްސްގައި ހިއްސާކުރެއްވި ޕޯސްޓެއްގައި ފިރާޤް ވަނީ، މި ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ގޮންޖެހުންތަކާ މެދު ކަންބޮޑުވުން ފާޅުކުރައްވާފައެވެ. އޭނާ ވިދާޅުވި ގޮތުގައި، ހަނގުރާމަ ދިގުލައިގެންދާ ނަމަ ރާއްޖެއަށް އޭގެ އަސަރު ކުރާނެކަމީ އިންކާރު ކުރެވެން ނެތް ހަގީގަތެކެވެ.

ފިރާޤްގެ ވާހަކައިގައި އެންމެ ބޮޑަށް ފާހަގަކުރެއްވި އެއް ކަމަކީ، މިފަދަ ބޮޑު ނުރައްކަލެއް ކުރިމަތީގައި އޮތްއިރުވެސް، ރާއްޖޭގައި ހަގީގީ ކޮންޓިންޖެންސީ ޕްލޭނެއް ނުވަތަ ކުއްލި ހާލަތްތަކުގައި އަމަލުކުރާނެ ރޭވުމެއް އެކުލަވާލެވިފައި ނެތްކަމުގެ ހިތާމަވެރި ހަގީގަތެވެ. އޭނާ ވިދާޅުވީ، އެތެރޭގެ ސިޔާސީ ބަހުސްތަކުގެ ތެރެއިން އެކަނި ކޮންމެ ގޮންޖެހުމަކަށް ހައްލެއް ނުހޯދޭނެ ކަމަށެވެ.

"މިފަދަ ވަގުތުތަކުގައި ސިޔާސީ ކަންކަމުން ބޭރަށް ބަލާ، ކުރިއަށް އޮތް ނުރައްކާތައް ދެނެގަނެ، އަޅުގަނޑުމެންގެ ވަށައިގެންވާ ހަގީގަތްތަކަށް ލޯ ހުޅުވާލަން ޖެހޭ،" ފިރާޤް ވިދާޅުވިއެވެ.

މީގެ އިތުރުން، އޭނާ ވަނީ ދުރާލާ ރޭވުންތައް ރޭވުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ. ފިރާޤް ވިދާޅުވި ގޮތުގައި، ކުރިމަތިވެދާނެ ބުރޫއެރުމަކަށް ތައްޔާރުވެ، ގައުމުގެ މުސްތަގުބަލު ރައްކާތެރިކުރުމަށްޓަކައި އެންމެހާ ފަރާތްތަކުން ޒިންމާދާރުކަމާއެކު އަމަލުކުރުމަކީ މިވަގުތަށް ނުހަނު ބޭނުންތެރި ކަމެކެވެ.

ދުނިޔޭގެ މަސްރަހުގައި ހިނގަމުންދާ މިފަދަ ބޮޑެތި ހަމަނުޖެހުންތަކުގެ ސަބަބުން، އިގްތިސާދީ ގޮތުންނާއި އިޖުތިމާއީ ގޮތުން ރާއްޖެއަށް ކުރިމަތިވެދާނެ ނުރައްކާތަކުން ސަލާމަތްވުމަށްޓަކައި ހަރުދަނާ ފިޔަވަޅުތަކެއް އެޅުމަށް ފިރާޤް ވަނީ އިލްތިމާސް ކުރައްވާފައެވެ.