ސަރުކާރުގެ ޓެކްސީ ލައިންގެ ހިދުމަތް ކުރިއަށް އޮތް ފިތުރު އީދު ދުވަހު ފެށުމަށް މަސައްކަތް ކުރަމުންދާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު އަމީން ވިދާޅުވީ، ސަރުކާރުގެ އަމާޒަކީ، މި މަހުގެ 18 ވަނަ ދުވަހު ޓެކްސީ ލައިންގެ ހިދުމަތް ފެށުން ކަމަށެވެ. ނަމަވެސް ހިދުމަތް ފަށާނީ ލިމިޓެޑް ހިދުމަތްތަކަކާ އެކު ކަމަށާއި، ފަހުން ހިދުމަތް ފުޅާކޮށް ތަރައްގީ ކުރާނެ ކަމަށް ވަޒީރު ވިދާޅުވިއެވެ.

"އަޅުގަނޑުމެން މި ބަލަނީ މިހާރު މިއޮތް ތާވަލާ އެއްގޮތަށް މިކަން ކުރެވޭތޯ." ވަޒީރު ވިދާޅުވިއެވެ.

ވަޒީރު ވިދާޅުވީ، ޓެކްސީ ލައިންގެ ހިދުމަތް ފެށުމަށް ޖުމްލަ 150 ކާރު ރާއްޖެ ގެނައުމަށް ނިންމާފައިވާ ކަމަށެވެ. ކާރުތައް ގެންނާނީ ދެ ބެޗަކަށް ބަހާލައިގެން ކަމަށާއި، ފުރަތަމަ ބެޗުގެ ކާރުތައް ލަންކާ ޕޯޓަށް ގެނެވި، މި މަހުގެ 11 ވަނަ ދުވަހު ރާއްޖެ ގެނެވޭނެ ކަމަށް އެމްޓީސީސީން މައުލޫމާތު ދީފައިވާކަމަށް ވަޒީރު ވިދާޅުވިއެވެ. އަދި ދެ ވަނަ ބެޗު ގެނެވޭނެ ތާރީހު ކަށަވަރުވާނީީ އަންނަ ހުކުރު ދުވަހު ކަމަށް ވެސް ވަޒީރު ވަނީ ވިދާޅުވެފައެވެ.

ވަޒީރު މިއަދު ވިދާޅުވީ ރާއްޖެއަށް ގެންނަ ކާރުތަކަކީ ތިން މޮޑެލެއްގެ ކާރުތަކެއް ކަމަށާއި، އޭގެ ތެރެއިން ދެ މޮޑެލެއްގެ ކާރު ތައްޔާރުކުރަނީ ޗައިނާގައި ކަމަށެވެ. އަދި ތިން ވަނަ މޮޑެލް ތައްޔާރުކުރަނީ ތައިލެންޑުގައި ކަމަށް ވަޒީރު ވިދާޅުވިއެވެ.

ހަމައެއާއެކު ޓެކްސީލައިންގެ ޚިދުމަތް ދިނުމަށްޓަކައި ޖުމްލަ 407 ޑްރައިވަރުން ބޭނުންވާ ކަމަށް ވަޒީރު ވިދާޅުވިއެވެ. އޭގެ ތެރެއިން 285 ޑްރައިވަރުން ހޯދަނީ ފުލްޓައިމްކޮށް މަސައްކަތް ކުރާ ގޮތަށް ކަމަށާއި، ބާކީ 122 ޑްރައިވަރުން ހޯދަނީ ޕާޓްޓައިމްކޮށް މަސައްކަތް ކުރާ ގޮތަށް ކަމަށް ވަޒީރު ވިދާޅުވިއެވެ.

އޭގެ އިތުރުން ވަޒީރު ވިދާޅުވީ، ކުރިން ކަނޑައެޅި ތާރީހުތަކަށް ހިދުމަތް ނުފެށި ލަސްވީ، ކާރުތަކަށް ބަދަލުތަކެއް ގެންނަން ޖެހުމުން ކަމަށެވެ. އެގޮތުން ކާރުތަކަކީ މޫދާއި ކައިރީގައި އޮޕަރޭޓްކުރަން ޖެހޭ ކާރުތަކަށް ވުމުން، ރާއްޖޭގެ ވެށްޓާއި އެކަށީގެންވާ ބަދަލުތަކެއް ގެންނަން ޖެހުނު ކަމަށް ވަޒީރު ވިދާޅުވެފައިވެއެވެ.

ނަމަވެސް ބަދަލުތައް ގެނެސް ކާރުތައް ގެނައުމުގެ މަސައްކަތް ފެށިފައިވާތީ، އިތުރު ލަސްވުމެއް ނެތި ހިދުމަތް ފެށޭނެ ކަމުގެ އުންމީދު ބޮޑު ކަމަށް ވަޒީރު މިއަދު ވިދާޅުވިއެވެ.