މެދުއިރުމަތީގައި ހިނގަމުންދާ ހަނގުރާމައާ ގުޅިގެން އެ ސަރަހައްދުގެ ވައިގެ ދަތުރުފަތުރަށް ބުރޫއަރައި، ރާއްޖެއަށް އަންނަ ޓޫރިސްޓުންގެ އަދަދު ވަރަށް ބޮޑަށް ދަށަށް ގޮސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އާންމުކުރި އެންމެ ފަހުގެ ހިސާބުތަކަށް ބަލާއިރު، މިދިޔަ ހޯމަ ދުވަހު ރާއްޖެ އައިސްފައިވަނީ 4،107 ޓޫރިސްޓުންނެވެ. މިއީ މި އަހަރުގެ މިހާތަނަށް އެންމެ މަދުން ޓޫރިސްޓުން އައި ދުވަހެވެ. މީގެ ކުރިން މި އަހަރު އެންމެ މަދުން ޓޫރިސްޓުން އައި ދުވަހެއްގެ ގޮތުގައި ރެކޯޑު ކުރެވިފައިވަނީ ޖެނުއަރީ 1 އެވެ. އެ ދުވަހު ރާއްޖެ އައީ 5،929 ޓޫރިސްޓުންނެވެ.

އަހަރުން އަހަރަށް އަޅައިބަލާއިރު، މި މަހުގެ ފުރަތަމަ ދެ ދުވަހު ރާއްޖެ އައި ޓޫރިސްޓުންގެ އަދަދު ވަނީ މިދިޔަ އަހަރުގެ އެ މުއްދަތާ އަޅައިބަލާއިރު 37 އިންސައްތަ ދަށަށް ގޮސްފައެވެ. މި އަދަދުތައް ދަށަށް ދިއުމުގެ މައިގަނޑު ސަބަބަކީ މެދުއިރުމަތީގެ މަސްރަހު ނުތަނަވަސްވެ، ގިނަ ގައުމުތަކެއްގެ ވައިގެ ސަރަހައްދު ބަންދުކުރުމެވެ. ދުނިޔޭގެ އެކި ކަންކޮޅުތަކުން ރާއްޖެއަށް ޓޫރިސްޓުން އުފުލައިދޭ މައިގަނޑު ދެ މަރުކަޒު ކަމަށްވާ ޔޫއޭއީ އާއި ގަތަރުގެ އެއާލައިންތަކުގެ އޮޕަރޭޝަންތައް ހުއްޓުމަކަށް އައިތާ މިއަދަށް މިއީ ފަސްވަނަ ދުވަހެވެ.

މިއަދު އެކަނިވެސް ގަލްފު ގައުމުތަކުގެ އެއާލައިންތަކުން ރާއްޖެ އަންނަން އޮތް ނުވަ ފްލައިޓެއް ވަނީ ކެންސަލްކޮށްފައެވެ. ވޭތުވެދިޔަ ފަސް ދުވަހުގެ ތެރޭގައި ރާއްޖެއަށް އައުމަށާއި ރާއްޖެއިން ފުރުމަށް ހަމަޖެހިފައި އޮތް ސަތޭކައެއްހާ ފްލައިޓު މިހާތަނަށް ވަނީ ކެންސަލްކޮށްފައެވެ.

މީގެ އިތުރުން، ވައިގެ ސަރަހައްދު ބަންދުކުރުމާ ގުޅިގެން ގަލްފުގެ ތިން އެއާލައިނެއްގެ ބޯޓުތައް މިވަގުތު ވެސް ވެލާނާ އިންޓަނޭޝަނަލް އެއާޕޯޓުގައި ވަނީ ގްރައުންޑްވެފައެވެ. އޭގެ ތެރޭގައި ގަތަރު އެއާވޭސްގެ ދެ ބޯޓަކާއި، އެމިރޭޓްސް އަދި އިއްތިހާދު އެއާވޭސްގެ ބޯޓެއް ހިމެނެއެވެ.

ތަފާސްހިސާބުތަކުން ދައްކާ ގޮތުގައި ރާއްޖެ އަންނަ ކޮންމެ ހަތަރު ޓޫރިސްޓުންގެ ތެރެއިން އެކަކީ ގަލްފު ގައުމުތަކުން ނުވަތަ އެ ސަރަހައްދުން ޓްރާންސިޓުވެގެން އަންނަ މީހެކެވެ. އެހެންކަމުން، މެދިއިރުމަތީގެ ފްލައިޓުތަކަށް އަންނަ ކޮންމެ ބަދަލެއްގެ ސަބަބުން ރާއްޖޭގެ ފަތުރުވެރިކަމަށް ބޮޑު ނޭދެވޭ އަސަރެއް ކުރަމުންދާކަން މި ހިސާބުތަކުން ސާފުވެއެވެ.