މަގުބޫލު ސްޓްރީމިންގް ޕްލެޓްފޯމް ނެޓްފްލިކްސްގެ އެންމެ ކާމިޔާބު އެއް ސީރީޒް ކަމަށްވާ 'ބްރިޖަޓަން' ސީޒަން 4 ގެ ފަހު އެޕިސޯޑްތައް ރިލީޒްކުރުމާއެކު، އެ ސީރީޒް އަލުން ދުނިޔޭގެ ނެޓްފްލިކްސް ޗާޓުގެ އެއްވަނަ މަގާމު ކަށަވަރުކޮށްފިއެވެ.

ފެބްރުއަރީ 23 އިން މާރިޗު 1 އާ ދެމެދު މި ސީރީޒަށް 28 މިލިއަން ވިއުސް ލިބިފައިވާ ކަމަށް ނެޓްފްލިކްސްގެ ތަފާސްހިސާބުތަކުން ދައްކައެވެ. މިއީ މި ސީޒަނުގެ ފަހު ހަތަރު އެޕިސޯޑް އާންމުކުރުމާ ގުޅިގެން ބެލުންތެރިންގެ މެދުގައި އުފެދުނު ބޮޑު ޝައުގުވެރިކަމެއްގެ ނަތީޖާއެވެ.

ނެޓްފްލިކްސްއިން ވިއުސް ބަލަނީ މުޅި ސީޒަނަށް ބެލި ޖުމްލަ ގަޑިއިރު، އެ ސީޒަނެއްގެ މުޅި ދިގުމިނުން ގެއްލައިގެން ކަމަށްވާތީ، 28 މިލިއަން ވިއުސްގެ ގޮތުގައި ފާހަގަކޮށްފައިވަނީ ހަތަރުވަނަ ސީޒަނުގެ ހުރިހާ އެޕިސޯޑަކަށް ލިބުނު ޖުމްލަ އެންގޭޖްމަންޓެވެ.

މި ސީޒަން އެންމެ ފުރަތަމަ ރިލީޒްކުރި ހަފުތާގައި 39.7 މިލިއަން ވިއުސް ލިބިފައިވެއެވެ. ދެވަނަ ބައި ރިލީޒްކުރުމާއެކު ވިއުސް 29 އިންސައްތަ ދަށްވި ނަމަވެސް، މިއީ މިފަދަ ގޮތަކަށް ބައިބަޔަށް ރިލީޒްކުރާ އެހެން ސީރީޒްތަކާ އަޅާބަލާއިރު ވަރަށް ކުޑަ ދަށްވުމެކެވެ. މިސާލަކަށް 'ސްޓްރޭންޖަރ ތިންގްސް' ގެ ފަހު ބައި ރިލީޒްކުރުމުން ވިއުސް 42 އިންސައްތަ ދަށްވެފައިވެއެވެ. މިއިން އެނގެނީ ބްރިޖަޓަންގެ ލޯބީގެ ވާހަކައަށް ބެލުންތެރިންގެ މެދުގައި އޮތް ތަރުހީބު ވަރުގަދަކަމެވެ.

'ބްރިޖަޓަން' އަކީ މިހާރުވެސް ނެޓްފްލިކްސްގެ އެންމެ ގިނަ ބަޔަކު ބަލާ އިނގިރޭސި ބަހުން ގެނެެސްދޭ ސީރީޒްތަކުގެ ތެރޭގައި ހިމެނޭ، އެ ޕްލެޓްފޯމުގެ އެންމެ މުހިންމު އެއް އުފެއްދުމެވެ.

މިދިޔަ ހަފުތާގެ ނެޓްފްލިކްސް ޗާޓުގެ ދެވަނައިގައި އޮތީ 'ދަ ނައިޓް އޭޖެންޓް' ސީޒަން 3 އެވެ. އެ ސީރީޒަށް 9.9 މިލިއަން ވިއުސް ލިބިފައިވާއިރު، އެ ސީރީޒްގެ ކުރީގެ ސީޒަންތަކަށް ވެސް ބެލުންތެރިންގެ ބޮޑު ތަރުހީބެއް ވަނީ ލިބިފައެވެ. އެގޮތުން ސީޒަން 1 އަށް 2.9 މިލިއަން އަދި ސީޒަން 2 އަށް 2.7 މިލިއަން ވިއުސް ވަނީ ލިބިފައެވެ.