އީރާނުގެ ރޫހާނީ ލީޑަރު އާޔަތުﷲ އަލީ ހާމަނާއީ އަވަހާރަކޮށްލި ކޮށްލުން ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް ހަރުކަށި އިބާރާތުން ކުށްވެރިކުރައްވައިފިއެވެ.

އެމެރިކާ އާއި އިޒްރޭލު ގުޅިގެން ދިން ހަމަލާއެއްގައި ހާމަނާއީ އަވަހާރަކޮށްލުމާ ގުޅިގެން، އެކްސްގައި ކުރެއްވި ޕޯސްޓެއްގައި މައުމޫން ވިދާޅުވީ، އިހުލާސްތެރި މުސްލިމެއްގެ ހައިސިއްޔަތުން އެ އަމަލު ކުށްވެރިކުރައްވާ ކަމަށެވެ. އަދި އެމަނިކުފާނުގެ ފުރާނަފުޅަށް ބަރަކާތް ލައްވައި، އީރާނުގެ ރައްޔިތުންނަށާއި އާއިލާއަށް ކެތްތެރިކަން މިންވަރު ކުރެއްވުމަށް އެދި މައުމޫން ދުއާ ކުރެއްވިއެވެ.

ދިވެހިރާއްޖޭގެ ވެރިކަން 30 އަހަރު ކުރެއްވި މައުމޫންއަކީ އަބަދުވެސް މެދުއިރުމަތީގެ ގައުމުތަކާ ގާތް ގުޅުމެއް ބާއްވަވާ ބޭފުޅަކަށް ވާއިރު، މި ހާދިސާއާ ގުޅިގެން ދިވެހި ސަރުކާރާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަކި އެއްޗެއް ވިދާޅުނުވާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިކަމާ ގުޅޭގޮތުން ސުވާލު ކުރުމުން، ރައީސް މުއިއްޒު ވަނީ ސީދާ ޖަވާބެއް ދެއްވަން އިންކާރު ކުރައްވާފައެވެ.

ހާމަނާއީ އަވަހާރަކޮށްލި ހާދިސާއާ ގުޅޭގޮތުން ވާހަކަ ދެއްކެވުމުގެ ބަދަލުގައި، ރައީސް މުއިއްޒު ފާހަގަކުރެއްވީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދޭ ހަމަލާތައް ކުށްވެރިކުރައްވާ ކަމަށެވެ. ނަމަވެސް، އޭގެ ފަހުން އެމަނިކުފާނު ވަނީ އިޒްރޭލާއި އެމެރިކާއިން ދޭ ހަމަލާތަކަކީ ވެސް ގޯސް އަމަލުތަކެއްގެ ގޮތުގައި ސިފަކުރައްވާފައެވެ.

ސަރުކާރުގެ މި ހަނުހުރުމާއި މެދުއިރުމަތީގެ މަޝްރަހާ މެދު ގެންގުޅޭ ސިޔާސަތަށް އާންމުންގެ މެދުގައި މިހާރު ވަނީ ބޮޑެތި ބަހުސްތަކެއް އުފެދިފައެވެ.