ވެލާނާ އިންޓަނޭޝަނަލް އެއާޕޯޓުގައި ޖެއްސީ އެމެރިކާގެ އާންމު ދަތުރުފަތުރުކުރާ (ސިވިލިއަން) ބޯޓެއް ކަމަށާއި، އެއީ ހަނގުރާމައާ އެއްވެސް ގުޅުމެއް ހުރި ފްލައިޓެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް މިކަން ހާމަކުރެއްވީ، އެމެރިކާގެ ހަނގުރާމަމަތީ ބޯޓެއް ރާއްޖޭގައި ޖައްސާފައިވާ ކަމަށް ބުނެ ސޯޝަލް މީޑިއާގައި ފޮޓޯ އާއި ވީޑިއޯތަކެއް ދައުރުވަމުންދާ ދަނޑިވަޅެއްގައެވެ.

ރައީސް ވިދާޅުވީ އެކަމާ ގުޅޭ މައުލޫމާތު ވަގުތުން ސާފުކުރެއްވި ކަމަށާއި، އެއީ ހަނގުރާމަމަތީ އުޅަނދެއް ނޫންކަން ކަށަވަރު ކުރެވިފައިވާ ކަމަށެވެ. އަދި އެ ބޯޓު ރާއްޖެ އައުމުގެ ހުއްދަ މާކުރިން ނަގާފައިވާކަން ފާހަގަކުރައްވަމުން ރައީސް ވިދާޅުވީ، އެ ބޯޓު ވީއައިއޭގައި ޖެއްސުމުގެ ހުއްދަ ހޯދާފައިވަނީ މިދިޔަ ޖެނުއަރީ މަހުގެ 17 ވަނަ ދުވަހު ކަމަށެވެ.

މީގެ އިތުރުން، އެ ބޯޓުގެ ދަތުރުގެ ތަފްސީލް ހިއްސާކުރައްވަމުން ރައީސް ވިދާޅުވީ، އެއީ ސީޝެލްސް އިން ފުރައިގެން ރާއްޖެ މަގުން ތައިލެންޑަށް ދިޔަ ބޯޓެއް ކަމަށެވެ. އެރޭގެ ވަގުތެއްގައި އެ ބޯޓު ރާއްޖެއިން ފުރައިގެން ގޮސްފައިވާ ކަމަށާއި، އެއީ އެއްވެސް ހާލެއްގައި ހަނގުރާމައިގެ އޮޕަރޭޝަނެއްގައި ބޭނުންކުރާ ބޯޓެއް ނޫން ކަމުގެ ޔަގީންކަން ރައީސް ވަނީ ރައްޔިތުންނަށް ދެއްވާފައެވެ.