މި މަހުން ފެށިގެން ކޮންމެ ހަފްތާއަކު އެއް ދުވަހު ނޫސްވެރިންނާ ބައްދަލުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާ އެއްގޮތަށް، އެމަނިކުފާނުގެ ފުރަތަމަ ނޫސްވެރިންގެ ބައްދަލުވުން މާދަމާ ބޭއްވުމަށް ނިންމައިފިއެވެ.

ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދު މިރޭ ވިދާޅުވި ގޮތުގައި، މިއަހަރުގެ ރިޔާސީ ބަޔާނުގައި ރައީސް އިޢުލާން ކުރެއްވި ގޮތަށް ކުރިއަށްދާ މި ބައްދަލުވުން އޮންނާނީ މާދަމާ ހެނދުނު 10:00 ގައެވެ.

ރައީސުލްޖުމްހޫރިއްޔާގެ އިތުރުން، ވަޒީރުންގެ މަޖިލީހުގެ މެންބަރުން ވެސް ހަފްތާއަކު އެއްފަހަރު ނޫސްވެރިންނާ ބައްދަލުކުރެއްވުމުގެ ސިލްސިލާ މިހާރު ވަނީ ފެށިފައެވެ. އެގޮތުން، ޓޫރިޒަމް މިނިސްޓަރު ތޯރިގް އިބްރާހިމް މިއަދު ވަނީ ނޫސްވެރިންގެ ބައްދަލުވުމެއް ބާއްވަވައި މަޢުލޫމާތު ހިއްސާކުރައްވާފައެވެ.

މި ބައްދަލުވުންތަކަކީ ސަރުކާރުގެ މަސައްކަތްތަކާ ގުޅޭ މަޢުލޫމާތު ސީދާ ރައީސް އަދި ވަޒީރުންގެ ފަރާތުން މީޑިއާތަކަށް ފޯރުކޮށްދިނުމަށް ރައީސް ނިންމަވާފައިވާ ނިންމެވުމެކެވެ.

ރައީސް މުޢިއްޒު ކުރިން ހާމަކުރައްވާފައިވާ ގޮތުގައި، ކޮންމެ ހޯމަ ދުވަހެއްގެ ހެނދުނު 10:00 އިން 11:00 އަށް އެމަނިކުފާނު ނޫސްވެރިންނާ ބައްދަލުކުރައްވާނެއެވެ. ނަމަވެސް ރަސްމީ ދަތުރުފުޅެއްގައި އުޅުއްވުން ނުވަތަ ބަންދު ދުވަހަކާ ދިމާވުން ފަދަ ޚާއްޞަ ޙާލަތްތަކުގައި ޝެޑިއުލަށް ބަދަލު އައުން އެކަށީގެންވާ ކަމަށް އެމަނިކުފާނު ވިދާޅުވެފައިވެއެވެ.

މާޗް މަހުން ފެށިގެން ކޮންމެ ވަޒީރަކު ވެސް ހަފްތާއަކު އެއް ގަޑިއިރު ނޫސްވެރިންނަށް ވަގުތު ދެއްވުމަށް ހަމަޖެހިފައިވާއިރު، މި ބައްދަލުވުންތަކުގެ ތާވަލު ރައީސް އޮފީހުން ދަނީ އާންމުކުރަމުންނެވެ.