އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް "ބޮޑު އަސްކަރީ އޮޕަރޭޝަނެއް" ފައްޓަވާފައިވާކަން ރަސްމީކޮށް އިޢުލާނު ކުރައްވައިފިއެވެ.

ފްލޮރިޑާގައި ހުންނަވައި ދެއްވި ބަޔާނެއްގައި ރައީސް ޓްރަމްޕް ވިދާޅުވީ، މި އޮޕަރޭޝަނުގެ މައިގަނޑު މަޤްޞަދަކީ ކުރިމަތިވެދާނެ ނުރައްކާތަކުން އެމެރިކާގެ ރައްޔިތުން ސަލާމަތްކުރުން ކަމަށެވެ.

އަދި މި މަސައްކަތުގައި އެމެރިކާގެ ފައުޖުތަކާއި އިސްރާއީލުގެ އަސްކަރިއްޔާ ފުރިހަމައަށް ގުޅިގެން މަސައްކަތް ކުރަމުންދާކަން ފާހަގަކުރައްވައި، އީރާނުގެ ރިވޮލިއުޝަނަރީ ގާޑް ކޯ ގެ ކޮމާންޑް ސެންޓަރުތަކާއި "މިސައިލް ސިޓީތައް" ނުވަތަ މިސައިލް ރައްކާކުރާ މަރުކަޒުތައް ނައްތާލުމުގެ މަސައްކަތް ކުރިއަށްދާކަން އެމަނިކުފާނު ކަށަވަރުކޮށްދެއްވިއެވެ.

މީގެ އިތުރުން، އީރާނުން ދީފާނެ ހަމަލާއަކަށް ރައްދު ދިނުމުގައި އެއްވެސް ޤައުމަކުން ތެހެރާނަށް އެހީތެރިވެއްޖެ ނަމަ، އެ ޤައުމަކަށް "ހިތްދަތި އަދި ބިރުވެރި ނަތީޖާތަކަކާ" ކުރިމަތިލާން ޖެހޭނެ ކަމުގެ ވަރުގަދަ އިންޒާރެއް ވެސް ރައީސް ޓްރަމްޕް ވަނީ ދެއްވާފައެވެ. މި އޮޕަރޭޝަނަކީ އީރާނުގެ ނުރައްކާތެރި ހަތިޔާރުގެ ޤާބިލްކަން ކުޑަކުރުމަށް އަޅާ ފިޔަވަޅެއްގެ ގޮތުގައި އެމެރިކާ ސަރުކާރުން ސިފަކުރެއެވެ.