ދުނިޔޭގެ ދިރިއުޅުމަކީ ގިނަގުނަ ގޮންޖެހުންތަކާއި ދަތިތަކުން ފުރިފައިވާ ދިރިއުޅުމެކެވެ. މިފަދަ ދަތިތަކާ ކުރިމަތިލާން ޖެހި، ކާމިޔާބީއާ ހަމައަށް ދެވޭނީ ހިތްވަރުގަދަ، ޢަޒުމް ވަރުގަދަ ބައަކަށެވެ. ހިތްވަރަކީ އިންސާނާގެ ދިރިއުޅުމުގައި ކޮންމެހެންވެސް ބޭނުންތެރި ސިފައެކެވެ. އެއީ ހަމައެކަނި ބިރުގަންނަ ކަންކަމާ ކުރިމަތިލުން އެކަންޏެއް ނޫނެވެ. އެއީ ދިރިއުޅުމުގެ އެކި ހާލަތްތަކުގައި ސާބިތުކަމާއެކު ދެމިހުރުމެވެ. މިފަހަރު މި ހިމަނާލަނީ ހިތްވަރުގަދަ މީހެއްގެ ކިބައިގައި ހުންނާނެ ބައެއް ސިފަތަކެވެ.

ހިތްވަރުގަދަ މީހެއްގެ އެންމެ ފާހަގަކޮށްލެވޭ އެއް ސިފައަކީ ވަރުގަދަވުމެވެ. އެމީހުން ބިރުގަންނަ ކަންކަމަށް ފުރަގަސްނުދީ، އެކަންކަމާ ކުރިމަތިލައެވެ. ނޭނގޭ ކަންކަން ކުރާއިރު ހާސްވުމުގެ ބަދަލުގައި އެކަންކަން ހައްލުކުރުމަށްޓަކައި މަސައްކަތްކުރެއެވެ. ދަތިތަކާއި ގޮންޖެހުންތަކާ ކުރިމަތިވުމުން، އެމީހުންގެ ޢަޒުމް އިތުރަށް ވަރުގަދަވެ، ކަންކަމުން އަރައިގަތުމަށް މަސައްކަތްކުރެއެވެ. އަދި ލަނޑުދަނޑިތައް ހާސިލްކުރުމަށްޓަކައި ގަދައަޅައި މަސައްކަތްކޮށް، އެކަމަށްޓަކައި ކުރިމަތިވާ ކޮންމެ ހުރަހަކަށް ކެތްތެރިވެއެވެ.

މި މީހުންނަކީ ޒިންމާދާރު ބަޔަކަށް ވެފައި، އެހެން މީހުންނަށް ނަމޫނާ ދައްކާ ލީޑަރުންނަށް ވެއެވެ. އެމީހުންގެ ޢަމަލުތަކާއި ނިންމުންތަކުގެ ޒިންމާ ނަގައި، އެހެން މީހުންނަށް އިރުޝާދު ދީ، ހާއްސަކޮށް ދަތި ހާލަތްތަކުގައި އެހީތެރިވެއެވެ. އަދި ރަނގަޅު ކަންކަމަށް އަޑުއުފުލައި، ހައްގު ބަސް ބުނެ، ހިތްވަރާއެކު މަސައްކަތްކުރެއެވެ. ހަމައެއާައެކު އެމީހުންގެ ނިންމުންތަކުގައި ސާބިތުކަންމަތީ ދެމިހުރެއެވެ.

މީގެ އިތުރުން ހިތްވަރުގަދަ މީހުންގެ ކިބައިން އޯގާތެރިކަމާއި އިންސާފުވެރިކަން ވެސް ފެނެއެވެ. އެމީހުންނަކީ ހަަމައެކަނި ޖިސްމާނީ ގޮތުން ހިތްވަރުގަދަ ބައެއް ނޫނެވެ. އެއީ އަޚްލާގީ ގޮތުން ވެސް ހިތްވަރުގަދަ ބަޔަކަށް ވެއެވެ. ނިކަމެތިންނާއި އަނިޔާ ލިބޭ މީހުންނަށް އެހީވެ، އިންސާފު ގާއިމްކުރުމަށް މަސައްކަތްކުރެއެވެ. އަދި އެހެން މީހުންނަށް އޯގާތެރިވެ، ހެޔޮކަންތައް ކުރުމުގައި ހިތްވަރުގަދަކޮށް ހަރަކާތްތެރިވެއެވެ.