ރައްޔިތުން މަޖިލީހުގެ ރުހުން ހޯދުމަށް ފޮނުވާފައިވާ ރައީސް ޑރ. މުހައްމަދު މުއިއްޒުގެ ކެބިނެޓްގެ 22 ބޭފުޅުންގެ ތެރެއިން ފަސް ވަޒީރަކަށް ރުހުން ނުދިނުމަށް މަޖިލީހުގެ މެޖޯރިޓީ ޕާޓީ، އެމްޑީޕީގެ ޕާލިމެންޓްރީ ގްރޫޕްގައި މަޝްވަރާ ކުރަމުންދާކަން "ރަސް އޮންލައިން" އަށް ކަށަވަރު ވެއްޖެއެވެ.

އެމްޑީޕީގެ ޕާލިމެންޓްރީ ގުރޫޕުގެ މެންބަރަކު "ރަސް އޮންލައިން" އާއި ވާހަކަދައްކަވަމުން ވިދާޅުވީ ރައީސް ޑރ. މުއިއްޒު ރުހުން ހޯދަން ފޮނުއްވި 22 ވަޒީރުންގެ ތެރެއިން ރުހުން ނުދޭން މަޝްވަރާ ކުރަމުން ގެންދާ ފަސް ބޭފުޅުންނަކީ އެބޭފުޅުންގެ ފަރާތުން ތަފާތު މައްސަލަތައް ފާހަގަ ކުރެވިފައިވާ ފަސް ބޭފުޅުން ކަމަށެވެ. އޭނާވަނީ އޭގެތެރެއިން ބައެއް ބޭފުޅުންނަށް ރުހުން ނުދޭން ނިންމި ބައެއް މައްސަލަތައް ވެސް ފާހަގަ ކުރަށްވާފައެވެ. ނަމަވެސް ބައެއް ޒާތީ ސަބަބުތައް ހުރުމުން އެކަން އަދި ތިލަ ނުކުރުމަށް އޭނާ ވަނީ އެދިވަޑައިގެންފައެވެ.

އެމްޑީޕީގެ ޕާލިމެންޓްރީ ގްރޫޕުން ރުހުން ނުދޭން މަޝްވަރާކުރަމުންދާ ފަސް ބޭފުޅުންގެ ތެރެއިން ހަތަރު ބޭފުޅުންގެ ނަން، ނޫހާ އެމައުލޫމާތު ހިއްސާ ކުރެއްވި މެންބަރު ވަނީ ހާމަކުރަށްވާފައެވެ.

އެގޮތުން ރުހުން ނުދޭ ބޭފުޅުންގެ ތެރޭގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ، ކަމުގެ މަގާމަށް އައްޔަނު ކުރެއްވި ޢަލީ އިޙްސާނާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، ކަމުގެ މަގާމަށް އައްޔަނު ކުރެއްވި މުޙައްމަދު ސަޢީދާއި، މިނިސްޓަރ އޮފް އިސްލާމިކް އެފެއާޒް، ކަމުގެ މަގާމަށް އައްޔަނު ކުރެއްވި ޑޮކްޓަރ މުޙައްމަދު ޝަހީމް ޢަލީ ސަޢީދާއި އަދި މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، ކަމުގެ މަގާމަށް އައްޔަނު ކުރެއްވި ޑޮކްޓަރ ޢަލީ ހައިދަރު އަޙްމަދު ހިމެނޭކަން މައުލޫމާތު ދެއްވި މެންބަރު ވަނީ ކަށަވަރު ކޮށްދެއްވާފައެވެ.

ވަޒީރުންގެ މަޖިލީހަށް ރައީސް ޑރ. މުހައްމަދު މުއިއްޒު ޢައްޔަންކޮށްފައިވާ 22 ބޭފުޅުންގެ ނަން، ރައްޔިތުންގެ މަޖިލީހުގެ ރުހުން ހޯދުމަށްޓަކައި މަޖިލީހަށް ފޮނުއްވީ މިއަދު ކަމަށް ރައީސް އޮފީހުން ބުނެފައި ވެއެވެ.