ދިވެހިރާއްޖޭގެ ޢާންމު ތަންތަނުގައި އިޖްތިމާޢީ އަދި އަދަބީ މިންގަނޑުތަކާ ޚިލާފަށް ހެދުން އަޅައިގެން އުޅޭ ފަރާތްތަކާ މެދު ޤާނޫނީ ފިޔަވަޅު އަޅާނެ ކަމަށް މޯލްޑިވްސް ޕޮލިސް ސަރވިސްއިން ހާމަކޮށްފިއެވެ.

ފުލުހުންގެ ޚިދުމަތުން މިއަދު ނެރުނު ނޫސްބަޔާނެއްގައި ބުނެފައިވަނީ، ދިވެހިރާއްޖެއަކީ ސައްތައިން ސައްތަ މުސްލިމް ޤައުމަކަށް ވެފައި، ރާއްޖޭގެ ޤާނޫނުއަސާސީއާއި ޤާނޫނުތަކުން އިސްލާމީ އަދަބުތަކާއި އިޖްތިމާޢީ ރިވެތި މިންގަނޑުތައް ހިފެހެއްޓުމަށް ބާރުއަޅާ ކަމަށެވެ. ނަމަވެސް، ފަހަކަށް އައިސް މާލެއާއި އަތޮޅުތަކުގެ ޢާންމު އެކި ސަރަޙައްދުތަކުގައި އިޖްތިމާޢީ މިންގަނޑަށް ނުފެތޭ ގޮތަށް ކަންކަން ކުރަމުންދާކަން ފާހަގަކުރެވިފައިވާ ކަމަށް ފުލުހުން ބުނެފައިވެއެވެ.

ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށް ކަނޑައެޅިފައިވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކުރުމަށް ފުލުހުން އެދިފައިވެއެވެ. އަދި މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް، ފަތުރުވެރިންނަށް ޚިދުމަތް ދޭ ފަރާތްތަކުން ޚާއްސަ ސަމާލުކަމެއް ދިނުމަށް ފުލުހުން ވަނީ ހަނދާންކޮށްދީފައެވެ.

ފުލުހުން ބުނީ، ޢާންމު ރައްޔިތުން އެއްވެ އުޅޭ ޕާކުތަކާއި، މަގުމައްޗާއި، ކެފޭ/ރެސްޓޯރެންޓު ފަދަ ތަންތަނުގައި ޢާންމު އިޖްތިމާޢީ މިންގަނޑުތަކާ ކަނޑައެޅިގެން ޚިލާފަށް ހެދުން އަޅައިގެން އުޅުމަކީ މުޖުތަމަޢުގެ މަޞްލަޙަތު ގެއްލި، ޢާންމުންގެ ނުރުހުން އަމާޒުވާ ކަމެއް ކަމަށެވެ. އެހެންކަމުން، މިފަދަ ޢަމަލުތައް ހުއްޓުވުމަށްޓަކައި ކަމާބެހޭ ޤާނޫނުތަކުގެ ދަށުން އަޅަންޖެހޭ ފިޔަވަޅުތައް އަޅަމުން ގެންދާނެ ކަމުގެ އިންޒާރު ފުލުހުން ވަނީ ދީފައެވެ.

މީގެ އިތުރުން، އިސްލާމީ މާތް އަޚްލާޤާއި ދިވެހި މުޖުތަމަޢުގެ ޒަމާންވީ ރިވެތި އާދަކާދަތައް ދެމެހެއްޓުމަކީ ފަރުދީ ޒިންމާއެއްކަން ފާހަގަކޮށް، ހުރިހާ ރައްޔިތުންވެސް އިޖްތިމާޢީ މިންގަނޑުތަކަށް ޙުރުމަތްތެރިކޮށް ހިތުމަށް ފުލުހުން ވަނީ އިލްތިމާސްކޮށްފައެވެ.