ސަޢޫދީ ޢަރަބިއްޔާގައި 21 ދުވަހުގެ މުއްދަތަށް ކާރފިއު އިޢުލާނު ކޮށްފިއެވެ.

ކޯވިޑް-19 ގެ ނުރައްކާ ބޮޑުވެ، ސަޢޫދީގައި އެބަލި ކޮންޓްރޯލެއް ނެތި ފެތުރެމުންދާތީ، މިއަދުން ފެށިގެން 21 ދުވަހުގެ މުއްދަތަށް މުޅި ޤައުމުގައި ކާރފިއު އިޢުލާނުކުރުމަށް ރަސްގެފާނު ސަލްމާން ވަނީ އަމުރުކުރައްވާފައެވެ.

އިއްޔެގެ ވަގުތެއްގައި މައްކާ ސަރަޙައްދުގެ ހޮޓަލަކުން ގިނަ ޢަދަދެއްގެ ބަޔަކު ކޯވިޑް-19 އަށް ޝައްކު ކުރެވިގެން ވަނީ ޓެސްޓު ކޮށްފައެވެ. އަދި އޭގެ ތެރެއިން 72 މީހަކު ވަނީ އެ ބައްޔަށް ފައްސި ވެފައެވެ.

ކޯވިޑް-19 އާ ގުޅޭ ބައިނަލްއަޤްވާމީ އެހެނިހެން ޚަބަރުތަކަށް ބަލާލާއިރު، މިޞްރުގައި ކޯވިޑް-19 ގެ ބަލިމީހުންނަށް ފަރުވާކުރަނިކޮށް ޑރ.މަޙްމޫދު ޞަބްރީ ވަނީ ނިޔާވެފައެވެ. ޑރ.މަޙްމޫދު ޞަބްރީ އަކީ މި ބަލީގައި މިޞްރުގައި ނިޔާވި ފުރަތަމަ ޑޮކްޓަރެވެ. މިޞްރުގައި 300 އަށް ވުރެ ގިނަ މީހުން ކޯވިޑް-19 އަށް ޕޮޒިޓިވްވެ 14 މީހުންވަނީ މި ބަލީގައި ދުނިޔެ ދޫކޮށްފައެވެ. މީގެ ކުރިން މިޞްރުގެ އިސްލާމިކް މިނިސްޓްރީން ވަނީ މިސްކިތްތަކުގައި ޖަމާޢަތުގެ ނަމާދާ ހުކުރު ނަމާދުކުރުން 2 ހަފުތާއަށް މެދުކަނޑާލަން ނިންމާފައެވެ.

މުޅިދުނިޔެއިން ކޯވިޑް-19 އަށް ޕޮޒިޓިވް 345125 ކޭސް ފެނިފައިވާއިރު، އޭގެ ތެރެއިން 14778 މީހުން ވަނީ މިބަލީގައި ދުނިޔެ ދޫކޮށްފައެވެ.