ދިވެހިރާއްޖޭގައި މަސްތުވާތަކެއްޗާ ގުޅުންހުރި ކުށްތައް އަހަރުން އަހަރަށް ބޮޑުތަނުން އިތުރުވަމުން ގޮސް، މި ހިނގާ އަހަރުގެ މިހާތަނަށް ފުލުހުންނަށް ރިޕޯޓުކުރި އެފަދަ މައްސަލަތަކުގެ އަދަދު 2,100 އަށްވުރެ މައްޗަށް އަރައިފިއެވެ.

މިއީ ފާއިތުވި ފަސް އަހަރާ އަޅާބަލާއިރުވެސް ރެކޯޑު މިންވަރެކެވެ.

ފުލުހުންގެ ވެބްސައިޓުގައި އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މި އަހަރުގެ މިހާތަނަށް އެ އިދާރާއަށް ހުށަހެޅިފައިވާ ޖުމްލަ 10,258 މައްސަލައިގެ ތެރެއިން 20.8 އިންސައްތައަކީ މަސްތުވާތަކެއްޗާ ގުޅުންހުރި މައްސަލަތަކެވެ. އެގޮތުން މި އަހަރު މިހާތަނަށް މި ބާވަތުގެ 2,132 މައްސަލައެއް ފުލުހުންނަށް ވަނީ ރިޕޯޓުކޮށްފައެވެ.

ފާއިތުވި އަހަރުތަކުގެ ތަފާސްހިސާބުތަކަށް ބަލާއިރު، މިދިޔަ އަހަރު ރިޕޯޓުކޮށްފައިވަނީ މަސްތުވާތަކެތީގެ 2,066 މައްސަލައެވެ. އަދި 2024 ވަނަ އަހަރު 1,670 މައްސަލަ، 2023 ވަނަ އަހަރު 1,752 މައްސަލަ، 2022 ވަނަ އަހަރު 1,420 މައްސަލަ އަދި 2021 ވަނަ އަހަރު ރިޕޯޓުކޮށްފައިވަނީ 1,447 މައްސަލައެވެ. މި ހިސާބުތަކުން އެނގޭ ގޮތުގައި ރާއްޖޭގައި މަސްތުވާތަކެތީގެ މައްސަލަތައް އަންނަނީ އަހަރަކަށްވުރެ އަހަރެއް ބޮޑުތަނުން އިތުރުވަމުންނެވެ.

ފާއިތުވި ތިން އަހަރުގެ ތެރޭގައިވެސް ފުލުހުންނަށް ހުށަހެޅޭ ޖުމްލަ މައްސަލަތަކުގެ އަދަދު އަހަރަކު 12,000 އިން މަތީގައި އުޅޭއިރު، ލިސްޓުގެ އެންމެ ކުރީގައި އުޅެނީ ވައްކަމުގެ މައްސަލަތަކެވެ. އެއަށްފަހު އެންމެ ގިނައިން ހުށަހެޅެނީ މަގުމަތީގެ އެކްސިޑެންޓުތަކާއި މަސްތުވާތަކެތީގެ މައްސަލަތަކެވެ. އެގޮތުން މި އަހަރުގެ މިހާތަނަށް ވައްކަމުގެ 2,830 މައްސަލައެއް އަދި އެކްސިޑެންޓާ ގުޅުންހުރި 2,462 ރިޕޯޓެއް ވަނީ ފުލުހުންނަށް ލިބިފައެވެ.

މަސްތުވާތަކެތީގެ ވަބާ ރާއްޖޭގައި ފެތުރިފައިވާ މިންވަރު ހާމަކުރަމުން ނޭޝަނަލް ޑްރަގް އޭޖެންސީ (އެންޑީއޭ) އިން ބުނެފައިވަނީ، ރާއްޖޭގައި މަސްތުވާތަކެތި ބޭނުންކުރާ މީހުންގެ އަދަދު 10,000 އަށްވުރެ އިތުރު ކަމަށެވެ. މީގެއިތުރުން، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާންވެސް ވަނީ މި ވަބާއިން ސަލާމަތްވުމަށްޓަކައި ދެވޭ ފަރުވާގެ ނިޒާމު އެންމެ އެކަށީގެންވާ ގޮތެއްގައި އަދިވެސް ނުދެވޭކަން ފާހަގަކުރައްވައި ކަންބޮޑުވުން ފާޅުކުރައްވާފައެވެ.

މި ނުރައްކާތެރި ވަބާ ހުއްޓުވުމަށްޓަކައި ދިވެހި ސަރުކާރުން ވަނީ މިދިޔަ އަހަރު މަސްތުވާތަކެއްޗާ ބެހޭ ޤާނޫނަށް ހަރުކަށި އިޞްލާޙުތަކެއް ގެނެސްފައެވެ. އެގޮތުން، ރާއްޖެއަށް ވަކި މިންވަރަކަށްވުރެ ގިނައިން މަސްތުވާތަކެތި އެތެރެކޮށްފިނަމަ ނުވަތަ ބޭރުކުރަން އުޅެފިނަމަ މަރުގެ އަދަބު ދެވޭ ގޮތަށް ޤާނޫނު ވަނީ ހަރުކަށިކޮށްފައެވެ.