މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް ފައިސާގެ ޢަދަދު، 2025 ވަނަ އަހަރު މުޅި އަހަރަށް ލިބުނު ޖުމުލަ ޢަދަދަށް ވުރެ އިތުރުވެއްޖެ ކަމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ޢާންމުކޮށްފައިވާ ހިސާބުތަކަށް ބަލާއިރު، 1 ޖަނަވަރީ 2026 އިން ފެށިގެން 30 ސެޕްޓެމްބަރު 2026 ގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109،262،025.69 (އެއްސަތޭކަ ނުވަ މިލިއަން، ދެ ލައްކަ ފަސްދޮޅަސް ދެ ހާސް، ފަންސަވީސް ރުފިޔާ ފަސްދޮޅަސް ނުވަ ލާރި) ވަނީ ބަލައިގަނެފައެވެ.

މިއީ 2025 ވަނަ އަހަރު އެއްކޮށް ލިބުނު 106،456،071.00 ރުފިޔާއާ އަޅާބަލާއިރު 2،805،954.69 ރުފިޔާގެ ކުރިއެރުމެކެވެ. މިއީ 2025 ވަނަ އަހަރު ބަލައިގަތް ޖުމުލަ ޢަދަދާ އަޅާބަލާއިރު ގާތްގަނޑަކަށް 2.64 އިންސައްތައިގެ ކުރިއެރުމެކެވެ.

އިސްލާމީ ކަންތައްތަކާއި އައުޤާފާ ބެހޭ ވުޒާރާގެ ތަފާސްހިސާބުތައް ދައްކާގޮތުން، މި އަހަރުގެ ސެޕްޓެމްބަރު 30 ގެ ނިޔަލަށް ދިވެހި ފައިސާއިން 108،739،116.62 ރުފިޔާ ލިބިފައިވާއިރު، ބޭރު ފައިސާގެ ގޮތުގައި 34،021.41 ޔޫ.އެސް ޑޮލަރު ވެސް ވަނީ މުދަލު ޒަކާތުގެ ގޮތުގައި ލިބިފައެވެ.

ވޭތުވެދިޔަ އަހަރު ޒަކާތުގެ ގޮތުގައި ލިބުނު ޖުމުލަ ޢަދަދަށްވުރެ މި އަހަރު ލިބުނު މިންވަރު އިތުރުވެފައި ވާއިރު، އަހަރު ނިމެން އަދި ތިން މަސްދުވަސް ބާކީ އެބައޮތެވެ. އެހެންކަމުން، މި އަހަރުގެ އޮކްޓޫބަރު މަހުން ފެށިގެން ޑިސެމްބަރު މަހުގެ ނިޔަލަށް ލިބޭ ފައިސާއާއެކު، އަހަރު ނިމޭއިރު މުދަލު ޒަކާތުގެ ގޮތުގައި ލިބޭ ޖުމުލަ ޢަދަދު މިހާރަށްވުރެ ބޮޑުތަނުން އިތުރުވެގެންދާނެ ކަމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ލަފާކޮށްފައިވެއެވެ.