ފަލަކީ އިލްމުވެރިން ވަނީ މިހާތަނަށް ހޯދިފައިވާ އެންމެ ހޫނު ތަރީގެ ދިރިއުޅެވޭ ފަދަ ސަރަހައްދުން އާ ޕްލެނެޓެއް ހޯދާފައެވެ. 'އެޗްޑީ 156295 ބީ' ގެ ނަން ދެވިފައިވާ މި ޕްލެނެޓު ދައުރުކުރަނީ 'އެޗްޑީ 156295' ނަމަކަށް ކިޔާ 'އޭ-ޓައިޕް' ގެ ބޮޑު ތަރިއެއްގެ ވަށައިގެންނެވެ.

މި ތަރިއަކީ އިރަށްވުރެ ގާތްގަނޑަކަށް ދެގުނަ ބޮޑު އަދި ފިނިހޫނުމިން 7,500 ސެލްސިއަސްއަށް އަރާ، އިރަށްވުރެ ނުވަގުނަ އަލިގަދަ ތަރިއެކެވެ. މި ތަރި އޮތީ ބޫމީއާ ގާތްގަނޑަކަށް 140 އަލިއަހަރު ދުރުގައެވެ.

މި ޕްލެނަޓަކީ އިރަވީ ނިޒާމުގެ އެންމެ ބޮޑު ޕްލެނެޓެއް ކަމަށްވާ ޖުޕިޓަރަށްވުރެ ގާތްގަނޑަކަށް ހަގުނަ ބޮޑު ޕްލެނެޓެކެވެ. މި ޕްލެނެޓް އޭގެ ތަރީގެ ވަށައިގެން ބުރެއް ޖެހުމަށް ގާތްގަނޑަކަށް 2,200 ދުވަސް (ގާތްގަނޑަކަށް 6 އަހަރު) ނަގާއިރު، އޭގެ ތަރިއާ ދެމެދު ހުންނަނީ ގާތްގަނޑަކަށް 4 އެސްޓްރޯނޮމިކަލް ޔުނިޓް (އޭޔޫ) ގެ ދުރުމިނެކެވެ.

މި ދުރުމިނުގެ ސަބަބުން މި ޕްނެލެޓަށް ލިބެނީ ބޫމީއަށް އިރުން ލިބޭ އަލީގެ ގާތްގަނޑަކަށް 60 އިންސައްތަ އަލިއެވެ.

ނާސާގެ 'ޓްރާންސިޓިންގ އެކްސޯޕްލެނެޓް ސާވޭ ސެޓެލައިޓް' (ޓެސް) ބޭނުންކޮށްގެން ކުރި މި ހޯދުމުގައި ސައިންސްވެރިން ބޭނުންކޮށްފައިވަނީ 'ޕަލްސޭޝަން ޓައިމިންގ' ނަމަކަށް ކިޔާ ޚާއްޞަ އުކުޅެކެވެ. 'އެޗްޑީ 156295' އަކީ ގަވާއިދުން އަލި ބަދަލުވާ 'ޑެލްޓާ ސުކޫޓީ' ބާވަތުގެ ތަރިއަކަށްވުމުން، އޭގެ އަލިއަށް އަންނަ ކުދި ބަދަލުތަކުން ޕްލެނެޓުގެ ގުރެވިޓީގެ އަސަރު ވަނީ ދެނެގަނެވިފައެވެ.

ސައިންސްވެރިން ލަފާކުރާ ގޮތުގައި މި ޕްލެނެޓް ހަގީގަތުގައި ވުމުގެ ފުރުސަތު އޮތީ 50 އިންސައްތައެވެ. މި ދިރާސާގެ ތަފްސީލު ވަނީ 'ދި އެސްޓްރޯފިޒިކަލް ޖާނަލް' ގައި ޝާއިޢުކޮށްފައެވެ.