ދިވެހިރާއްޖެއަށް ކުރިމަތިވެފައިވާ އެމެރިކާ ޑޮލަރުގެ ތާށިކަމަށް އެދެވޭ ހައްލެއް ނުލިބި، ބާޒާރުގައި ތަކެތީގެ އަގުތައް އިންތިހާއަށް އުފުލެމުންދާތީ އާންމު ރައްޔިތުންނަށް އޭގެ ނޭދެވޭ އަސަރު ވަރަށް ބޮޑަށް ކުރަމުންދާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ޑޮލަރު ލިބުމުގައި ހުރި ދަތިތަކުގެ ސަބަބުން އަމިއްލަ ވިޔަފާރިތަކަށް ޓެލެގްރާފިކް ޓްރާންސްފަރ (ޓީޓީ) ހެދުމަށް ހުރަސްއެޅި، ރާއްޖެއަށް މުދާ އެތެރެކުރުމުގައި ބޮޑެތި ގޮންޖެހުންތަކާ ކުރިމަތިލާން ޖެހިފައިވާ ކަމަށެވެ. އަދި މީގެ ސީދާ ނަތީޖާއެއްގެ ގޮތުން، ބާޒާރުގައި ތަކެތީގެ އަގުތައް އުފުލި، އޭގެ ހުރިހާ ބުރައެއް އުފުލަންޖެހިފައިވަނީ އާންމު ރައްޔިތުންނަށް ކަމަށް އެމަނިކުފާނު ފާހަގަކުރެއްވިއެވެ.

މީގެއިތުރުން، ސެޕްޓެމްބަރު މަސް ނިމޭއިރު ޑޮލަރުގެ 40 އިންސައްތަ މާރުކުރުން މަޖުބޫރުކުރުމާއި، ބޭރުގެ ޓުއާ އޮޕަރޭޓަރުންގެ އަތުން ޖީއެސްޓީ ނެގުން ލާޒިމުކޮށްގެން ދައުލަތަށް 160 މިލިއަން ޑޮލަރު ލިބޭނެ ކަމަށް ސަރުކާރުން އަންދާޒާކުރި ނަމަވެސް، އެއިން އެއްވެސް އަމާޒަކަށް ވާސިލުވެވިފައި ނުވާކަމަށް ވިދާޅުވެ އެމަނިކުފާނު ވަނީ ކަންބޮޑުވުން ފާޅުކުރައްވާފައެވެ.

ނަމަވެސް، ރާއްޖެއަށް ދިމާވެފައިވާ ޑޮލަރުގެ ތާށިކަން ހައްލުކޮށް، ބޭރު ފައިސާގެ ރިޒާވް ހަރުދަނާ ކުރުމަށްޓަކައި ސަރުކާރުން މިހާރުވެސް ދަނީ މުހިންމު ފިޔަވަޅުތަކެއް އަޅަމުންނެވެ. މިގޮތުން، ރާއްޖެއަށް ވަންނަ ބޭރު ފައިސާ ބޭންކިންގ ނިޒާމުގެ ތެރެއަށް ވެއްދުމަށްޓަކައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވާއިދުތަކަށް ބަދަލު ގެނައުމާއި، ފަތުރުވެރިކަމުގެ ދާއިރާއިން ލިބޭ ޑޮލަރު ރާއްޖޭގެ ބޭންކުތައް މެދުވެރިކޮށް މާރުކުރުން ހަރުދަނާ ކުރުމުގެ މަސައްކަތް ސަރުކާރުން ދަނީ ކުރަމުންނެވެ. އަދި ބޭރުގެ މާލީ އިދާރާތަކާ ގުޅިގެން ކަރަންސީ ސްވަޕް ފެސިލިޓީތައް ހޯދުމާއި، އިމްޕޯޓް ޚަރަދުތައް ކުޑަކުރުމަށްޓަކައި ރާއްޖެއިން ބޭރުން މުދާ އެތެރެކުރުމުގައި އެ ގައުމެއްގެ ފައިސާއިން މުއާމަލާތު ކުރެވޭނެ އިންތިޒާމުތައް ހަމަޖެއްސުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.