މަގު ކޮނުމުގެ މަސައްކަތްތައް ކުރިއަށްދާއިރު އިހުމާލުން ކަރަންޓު ކޭބަލްތަކަށް ގެއްލުންވެ، ކަރަންޓުގެ ޚިދުމަތް މެދުކެނޑިއްޖެނަމަ އަލުން ކަރަންޓު ދިނުމަށް ހިނގާ އެންމެހައި ޚަރަދުތައް އެ އިހުމާލުވި ފަރާތަކުން ދައްކަންޖެހޭނެ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ހާމަކޮށްފިއެވެ.

ސްޓެލްކޯއިން ބުނެފައިވަނީ މަގު ކޮނުމުގެ އެކި މަސައްކަތްތައް ކުރަމުންދާއިރު އެ ކުންފުނީގެ ކަރަންޓު ވިއުގަ އަދި ކޭބަލްތަކަށް ގެއްލުންވެ، ކަރަންޓުގެ ޚިދުމަތް މެދުކެނޑޭ މައްސަލަތައް ދުވަހެއް ދުވަހަކަށް އިތުރުވަމުންދާ ކަމަށެވެ.

މީގެ ސަބަބުން އާންމު ރައްޔިތުންނަށް ގިނަ ދަތިތަކަކާއި ތަކުލީފުތަކަކާ ކުރިމަތިލާންޖެހޭކަން އެ ކުންފުނިން ފާހަގަކުރެއެވެ.

އެ ކުންފުނިން ބުނި ގޮތުގައި މަގު ކޮނުމުގެ ތެރޭގައި ކަރަންޓު ކެނޑޭ ހާލަތްތަކުގައި އެކަމަށް އިހުމާލުވާ ފަރާތްތައް ޒިންމާދާރުކުރުވައި، މައްސަލަ ހައްލުކޮށް އަލުން ޚިދުމަތް ފޯރުކޮށްދިނުމަށް ހިނގާ ހުރިހާ ޚަރަދެއް އެ ފަރާތަކުން ދޭންޖެހޭގޮތަށް މިހާރު ވަނީ ނިންމާފައެވެ.

މިއީ ކަރަންޓުގެ ޚިދުމަތް މެދުކެނޑުމުން ރައްޔިތުންނަށް ދިމާވާ އުނދަގޫތަކުން ސަލާމަތްކޮށް، ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތެއް ފޯރުކޮށްދިނުމުގެ މަގުސަދުގައި ނިންމި ނިންމުމެއް ކަމަށްވެސް ސްޓެލްކޯއިން ފާހަގަކުރެއެވެ.

އެހެންކަމުން، މަގު ކޮނުމުގެ އެންމެހާ މަސައްކަތްތައް ކުރިއަށްގެންދާ ފަރާތްތަކުން ސްޓެލްކޯގެ ކަރަންޓު ވިއުގައަށް ގެއްލުން ނުވާނެހެން އިތުރަށް ޒިންމާދާރުވެ، ރަނގަޅަށް ރާވައިގެން ފަރުވާތެރިކަމާއެކު މަސައްކަތްތައް ކުރިއަށްގެންދިއުމަށް އެ ކުންފުނިން ވަނީ އިލްތިމާސްކޮށްފައެވެ.