ފުލުހުންގެ ޤާނޫނީ ވާޖިބު އަދާކުރުމުގެ ތެރޭގައި ނިޔާވާ އޮފިސަރުންގެ އާއިލާތަކަށް ފުލުހުންގެ މުއައްސަސާ މެދުވެރިކޮށް ބޭސްފަރުވާގެ އިންތިޒާމު ހަމަޖައްސައިދޭންޖެހޭ ގޮތަށް ފުލުހުންގެ ވަޒީފާއާ ބެހޭ ގަވާއިދަށް އިސްލާހު ގެނެސް ސަރުކާރުގެ ގެޒެޓުގައި އާންމުކޮށްފިއެވެ.

މި އިސްލާހުގެ ދަށުން، ޚިދުމަތުގައި އުޅެނިކޮށް ނިޔާވާ ފުލުހުންގެ އާއިލާތަކަށް، އާންމުކޮށް ފުލުހުންނާއި އެ މީހުންގެ އާއިލާތަކަށް ދެމުން އަންނަ އުސޫލުން ބޭސްފަރުވާގެ ޚިދުމަތްތައް ފޯރުކޮށްދިނުން ފުލުހުންގެ ޚިދުމަތަށް ވަނީ ލާޒިމުކޮށްފައެވެ.

މީގެއިތުރުން، ވާޖިބު އަދާކުރަމުންދަނިކޮށް ނިޔާވާ އޮފިސަރުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމުގެ އިޚްތިޔާރުވެސް އާ އިސްލާހުގައި ވަނީ ހިމަނާފައެވެ. އެފަދަ ނިންމުމެއް ނިންމާނީ އެ އޮފިސަރަކު ނިޔާވި ހާލަތަށާއި، ދިމާވި ހާދިސާގެ ކަންކަން ހިނގައިދިޔަ ގޮތުގެ އިތުރުން މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓް ބޯޑަށް ހުށަހަޅައިގެން އެ ބޯޑުންނެވެ.

މިއަހަރުގެ ޖަނަވަރީ މަހު އާންމުކުރި އޮޑިޓް ރިޕޯޓަކުން ދައްކާ ގޮތުގައި، 2019 އިން 2024 މުއްދަތުގެ ނިޔަލަށް ފުލުހުންނާއި އެފަރާތްތަކުގެ އާއިލާތަކުގެ ބޭސްފަރުވާއަށް 618.9 މިލިއަނަށްވުރެ ގިނަ ރުފިޔާ (618,949,192ރ.) ވަނީ ޚަރަދުކޮށްފައެވެ.

އަދި އެ މުއްދަތުގެ ތެރޭގައި ސިފައިންނާއި އެމީހުންގެ އާއިލާތަކުގެ ބޭސްފަރުވާއަށް 601 މިލިއަނަށްވުރެ ގިނަ ރުފިޔާ (601,061,300ރ.) ވަނީ ޚަރަދުވެފައެވެ.