އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާއި އެކުވެރި އަރަބި އިމާރާތް (ޔޫއޭއީ) ގެ ރައީސް ޝެއިޚް މުހައްމަދު ބިން ޒާޔިދު އަލް ނަހްޔާން އަބޫދާބީގައި ބޭއްވެވި ބައްދަލުކުރެއްވުމުގައި ސައޫދީ އަރަބިއްޔާގެ މަންދޫބުން ބައިވެރިވި ކަމަށް ފެތުރެމުންދާ ޚަބަރުތައް ސައޫދީ އަރަބިއްޔާއިން ދޮގުކޮށްފިއެވެ.

ސައޫދީގެ މަސްދަރަކުން އަރަބް ނިއުސްއަށް މައުލޫމާތު ދެމުން ބުނެފައިވަނީ، އެ ބައްދަލުވުމުގައި ސައޫދީގެ މަންދޫބަކު ހާޒިރުވެވަޑައިގެން އިންނެވި ކަމަށް ބުނެ ދެކެވޭ ވާހަކަތަކުގައި އެއްވެސް ހަގީގަތެއް ނެތް ކަމަށެވެ.

މި ޚަބަރު ފެތުރެން މެދުވެރިވީ އިޒްރޭލުގެ ނޫސްވެރިއެއް ކަމަށްވާ ދްރޯރ ބަލަޒާދާ ސޯޝަލް މީޑިއާގައި ކުރި ޕޯސްޓަކާ ގުޅިގެންނެވެ.

އޭނާ ބުނެފައިވަނީ ނަތަންޔާހޫއާއި ޝެއިޚް މުހައްމަދު ބައްދަލުކުރެއްވުމަށްފަހު ބޭއްވި ފުޅާ ބައްދަލުވުމެއްގައި ސައޫދީގެ މަންދޫބުން ބައިވެރިވި ކަމަށެވެ. އަދި އެ ބައްދަލުވުމުގައި ސަރަހައްދީ ސެކިއުރިޓީއާއި، އީރާނާއި ހޫސީންގެ ނުރައްކާތަކުގެ އިތުރުން ސަރަހައްދީ ދިފާއީ ނިޒާމުތަކާ ބެހޭގޮތުން މަޝްވަރާކުރެވުނު ކަމަށްވެސް އޭނާ ތުހުމަތުކޮށްފައިވެއެވެ.

އެމިރޭޓްސް ނިއުސް އޭޖެންސީން ރިޕޯޓްކޮށްފައިވާ ގޮތުގައި އިޒްރޭލުގެ ބޮޑުވަޒީރު ނަތަންޔާހޫ އަބޫދާބީއަށް ކުރެއްވި މި ޒިޔާރަތުގައި ދެ ގައުމުގެ ގުޅުން ބަދަހިކުރުމާއި ތަރައްގީކުރުމުގެ ގޮތްތަކާ މެދު ދެ ބޭފުޅުން މަޝްވަރާކުރެއްވިއެވެ.

އިޒްރޭލުގެ އިސް ތިން އޮފިޝަލަކު ރޮއިޓާސްއަށް މައުލޫމާތު ދެއްވަމުން ވިދާޅުވެފައިވަނީ ދެ ލީޑަރުންގެ މެދުގައި ބޭއްވުނު މި ބައްދަލުވުން ހަ ގަޑިއިރަށް ދެމިގެންދިޔަ ކަމަށާއި، މައިގަނޑު ގޮތެއްގައި މަޝްވަރާކުރެވުނީ އީރާނުގެ މައްސަލަތަކަށް ކަމަށެވެ.