ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ސަރަޙައްދުގެ "ލީޑިންގ އެއަރޕޯޓް 2026" ގެ އެވޯޑު ވެލާނާ އިންޓަރނޭޝަނަލް އެއަރޕޯޓް (ވީ.އައި.އޭ) އިން ކާމިޔާބުކޮށްފިއެވެ. ކްރޮސްރޯޑްސް މޯލްޑިވްސްގައި ބޭއްވުނު "ވާރލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ" ގައި ވީ.އައި.އޭ ގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ގެ މެނޭޖިންގ ޑިރެކްޓަރ އަދި ސީ.އީ.އޯ އިބްރާހީމް ޝަރީފް މުޙައްމަދެވެ. މިއީ އިންޑިއަން އޯޝަން ސަރަޙައްދުގެ އެންމެ ކުރިއަރާފައިވާ އެއަރޕޯޓުގެ ޝަރަފު ވީ.އައި.އޭ އިން ހާސިލުކުރި 13 ވަނަ ފަހަރެވެ.

މި އަހަރުގެ އެވޯޑަށް ވީ.އައި.އޭ އާ ވާދަކޮށްފައިވަނީ މަޑަގަސްކަރައިގެ އިވާޓޯ އިންޓަރނޭޝަނަލް އެއަރޕޯޓާއި، ރީޔޫނިއަންގެ ރޯލަންޑް ގަރޯސް އެއަރޕޯޓާއި، ސީޝެލްސް އިންޓަރނޭޝަނަލް އެއަރޕޯޓުގެ އިތުރުން މޮރިޝަސްގެ ސަރ ސީވޫސަގުރ ރާމްގޫލަމް އިންޓަރނޭޝަނަލް އެއަރޕޯޓެވެ.

އެމް.އޭ.ސީ.އެލް އިން ހިންގަމުން އަންނަ ވީ.އައި.އޭ އަށް ލިބުނު މި ޝަރަފަކީ، އެ އެއަރޕޯޓުގެ އޮޕަރޭޝަންތަކާއި ޚިދުމަތްތަކުގެ ފެންވަރު މެދުކެނޑުމެއްނެތި ރަނގަޅުވަމުން އަންނަކަމުގެ ހެތްކެކެވެ. މިއީ ރާއްޖެއަށް ޒިޔާރަތްކުރާ ފަތުރުވެރިންނަށާއި ދަތުރުވެރިންނަށް ފުރިހަމަ ޚިދުމަތެއް ފޯރުކޮށްދިނުމަށް ކުރަމުންދާ މަސައްކަތްތަކަށާއި، ރާއްޖޭގެ ފަތުރުވެރިކަމުގެ ދާއިރާއަށް ލިބުނު ބޮޑު ކުރިއެރުމެކެވެ.

މި ކާމިޔާބީއާ ގުޅިގެން އެމް.އޭ.ސީ.އެލް ގެ މެނޭޖިންގ ޑިރެކްޓަރ އަދި ސީ.އީ.އޯ އިބްރާހީމް ޝަރީފް މުޙައްމަދު ވިދާޅުވީ، މިއީ މުވައްޒަފުންގެ ބުރަ މަސައްކަތާއި، އެއަރޕޯޓް ތަރައްޤީކުރުމަށް އެޅެމުންދާ ފިޔަވަޅުތަކުގެ އިތުރުން ހުރިހާ ބައިވެރިންގެ ފަރާތުން ލިބޭ އެއްބާރުލުމުގެ ނަތީޖާ ކަމަށެވެ. އަދި ރާއްޖޭގެ މައި ދޮރާށީގެ ހައިސިއްޔަތުން، ޚިދުމަތުގެ ފެންވަރު އުސްމިންތަކަކަށް ގެންގޮސް، ދަތުރުވެރިންނަށް ހިތްހަމަޖެހޭ ތަޖުރިބާއެއް ހޯދައިދިނުމާއެކު، ބައިނަލްއަޤުވާމީ ފެންވަރުގައި ވާދަކުރެވޭނެ ފަދަ ޒަމާނީ އެއަރޕޯޓަކަށް ވީ.އައި.އޭ ހެދުމަށް އަބަދުވެސް އިސްކަންދެއްވާނެ ކަމަށް އެމަނިކުފާނު ވިދާޅުވިއެވެ.

ވީ.އައި.އޭ ގެ އުމްރާނީ ވަސީލަތްތައް ތަރައްޤީކޮށް ޚިދުމަތްތައް ފުޅާކުރުމުގެ މަސައްކަތް ހަލުވިކަމާއެކު ކުރިއަށްދާއިރު، ދަތުރުވެރިންގެ ފަސޭހައަށްޓަކައި ޓާމިނަލްގެ އެކި ސަރަޙައްދުތަކަށް ޒަމާނީ ވަސީލަތްތައް ދަނީ އިތުރުކުރެވެމުންނެވެ. މި ބަދަލުތަކާއެކު، އެއަރޕޯޓުގެ ހިންގުން އިތުރަށް ހަރުދަނާވެ، ޚިދުމަތް ހޯދާ ކޮންމެ ދަތުރުވެރިއަކަށްވެސް ލުއިފަސޭހަ އަދި ހިތްގައިމު މާޙައުލެއް ފަހިވެގެންދާނެއެވެ.