ދީނީ އިލްމުވެރިން ސިޔާސީ މުފައްކިރުންނަށް ބަދަލުވީމާ ގޮވާނީ މޮޔަ ކަމަށް ވިލިމާލޭ ދާއިރާގެ ޕީއެންސީ މެމްބަރު މުޙައްްމަދު އިސްމާޢިލް ވިދާޅުވެއްޖެއެވެ.

މެންބަރު މުޙައްމަދު އިސްމާޢިލް މިހެން ވިދާޅުވީ، ޤައުމުގެ އިސްތިޤްލާލާއި މިނިވަންކަން ދެމެހެއްޓުމަކީ ކޮންމެ މުވާޠިނެއްގެ މައްޗަށް ވާޖިބުވެގެންވާ ކަމެއް ކަމަށް ދީނީ ޢިލްމުވެރިޔާ ޑރ. މުޙައްމަދު އިޔާޒް ވިދާޅުވުމާ ގުޅިގެންނެވެ. ޑރ. އިޔާޒް މިހެން ވިދާޅުވީ، ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެއިން، ޔުނައިޓެޑް އަރަބް އެމިރޭޓްސް (ޔޫއޭއީ) ގެ އީގަލް ހިލްސް ކުންފުންޏަށް 500 ހެކްޓަރުގެ ބިން 99 އަހަރުގެ މުއްދަތަށް ދިނުމަށް ސަރުކާރުން ނިންމުމާ ގުޅިގެންނެވެ.

އެކަމާ ގުޅިގެން ޑރ. އިޔާޒް ވިދާޅުވީ، ދިގު މުއްދަތަކަށް ރާއްޖޭގެ ބައެއް ބޭރުބަޔަކަށް ކުއްޔަށް ދިނުމަކީ ޤައުމުގެ މިނިވަންކަން ގެއްލިގެން ހިނގައިދާނެ ކަމެއް ކަމަށް ގިނަބަޔަކު ބުނަމުންދާ ކަމަށެވެ. އަދި އެކަމުގެ ފުރަގަހުގައި އަޑިނޭނގޭ އެތަށް ކަމެއް ހުރިކަމަށް ތުހުމަތު ކުރެވެމުންދާއިރު އެކަންކަމުގެ ޙަޤީޤަތް ބަޔާންކޮށް ސާފުކޮށްދިނުމަކީ ސަރުކާރުގެ މައްޗަށް ލާޒިމް ކަމެއް ކަމަށް ޑރ. އިޔާޒް ވިދާޅުވެފައިވެއެވެ.

"އެއްވެސް ކަމެއް ނުފޮރުވާ ހާމަކަން ބޮޑު ގޮތެއްގައި ވެރިކަން ކުރައްވާނެ ކަމަށް ޑރ. މުޢިއްޒު ވަނީ ވަޢުދުވެވަޑައިގެންފައި. ވަޢުދާއި އެއްގޮތަށް ޢަމަލު ކުރެއްވުމަށް ރައީސަށް އިލްތިމާސް ކުރަން." ޑރ. އިޔާޒް ވިދާޅުވެފައިވެއެވެ.

މި ބަހުސްގައި ޑރ. އިޔާޒަށް ރައްދު ދެއްވަމުން މެންބަރު މުޙައްމަދު އިސްމާޢީލް ވިދާޅުވީ، ދީނީ އިލްމުވެރިން ސިޔާސީ މުފައްކިރުންނަށް ބަދަލުވުމުން ގޮވާނީ މޮޔަ ކަމަށެވެ.

"މި އިލްމުވެރިޔާ ބޭނުންވީމަ ބޭނުންވާހާ ގޮތަކަށް ބޭނުންވާހާ ވާހަކައެއް ފަތުރަންވީ." މެންބަރު މުޙައްމަދު ވިދާޅުވިއެވެ.

މުޙައްމަދު މިހެން ވިދާޅުވެފައިވާއިރު، ރަސްމާލެ މަޝްރޫއުގެ ދަށުން ހިއްކުމަށް ހަމަޖެހިފައިވާ 1،010 ހެކްޓަރުގެ ބިމުގެ ތެރެއިން 500 ހެކްޓަރުގެ ބިން، ދުނިޔޭގެ މުއްސަނދިންނަށް އަމާޒުކޮށްގެން ހަދާ އެޕާޓްމަންޓްތައް ތަރައްގީކޮށް ވިއްކުމަށް އީގަލް ހިލްސް ކުންފުންޏާ ހަވާލުކުރީ މިދިޔަ ހޯމަ ދުވަހުއެވެ. އަދި އެ ކުންފުނިން މިހާރު ވަނީ އެ ތަންތަން ވިއްކުމުގެ މަސައްކަތް ވެސް ފަށާފައެވެ.

ރަސްމާލެއިން ޔޫއޭއީ ކުންފުންޏަށް ބިން ދިން މައްސަލަ ބާތިލުކުރަން މިހާރުވަނީ ސުޕްރީމް ކޯޓަށްވެސް ހުށައަޅާފައެވެ.