ތައިލެންޑްގެ ބެންކޮކްގެ ނިއު ޕެޗަބުރީ މަގުގައި ފެންބޮޑުވެފައިވަނިކޮށް، އެ ސަރަހައްދުގައި ޖެޓްސްކީއެއް ދުއްވި މީހަކު ތައި ފުލުހުން ހައްޔަރުކޮށް އޭނާގެ މައްޗަށް ދައުވާ އުފުލައިފިއެވެ.

މި ހާދިސާގެ ވީޑިއޯ ސޯޝަލް މީޑިއާގައި ވަނީ ވަރަށް ބޮޑަށް ފެތުރިފައެވެ.

މި ހާދިސާ ހިނގާފައިވަނީ މަގުގެ ބޮޑު ބައެއްގައި ފެންބޮޑުވެފައި އޮތް މައްކަސަން ސަރަހައްދުގައެވެ. އިންޓަނެޓްގައި ދައުރުވަމުންދާ ވީޑިއޯއިން ފެންނަ ގޮތުގައި، ޖެޓްސްކީ ދުއްވި މީހާ ބާރު ދުވެލީގައި ފެންގަނޑުގެ ތެރޭގައި ދުއްވައި، ކުއްލި އަނބުރުންތައް އަޅަމުންދިޔައިރު، އޭގެ ސަބަބުން އުފެދުނު ރާޅުތައް ކައިރީގައި ހުރި ގެތަކަށާއި، ދުވާރުތަކަށާއި، މަގުމަތީގައި ހުރި އެކި ބިނާތަކަށް ބުރައިގެން ދިޔައެވެ.

ޖެޓްސްކީ ދުއްވި މީހާ ވަނީ އޭނާގެ އަމިއްލަ ފޭސްބުކް އެކައުންޓުގައި "ބީކޭކޭ ޑްރިފްޓު" ގެ ނަމުގައި މި ވީޑިއޯ އާންމުކޮށްފައެވެ. އެ ވީޑިއޯއިން ފެންނަ ގޮތުގައި ފެންބޮޑުވެފައިވާ މަގުގައި ޖެޓްސްކީ ދުއްވަމުން ދިޔައިރު، ދުވާރުތަކަށާއި، ފައިމަގުގައި ހިނގާ މީހުން އަރާ ބްރިޖްތަކުގެ ހަރުފަތްތަކަށާއި، މަގުގެ އަރިމަތީގައިވާ ފާރުތަކަށް ފެން ބުރަމުންދިޔައެވެ.

ތައިލެންޑްގެ މީޑިއާތަކުން ރިޕޯޓްކޮށްފައިވާ ގޮތުގައި، ޖެޓްސްކީގެ ސަބަބުން އުފެދުނު ރާޅުތަކުގެ ސަބަބުން އެ ސަރަހައްދުގެ ރައްޔިތުންގެ މުދަލަށް ގެއްލުންވެފައިވާ ކަމަށް ތުހުމަތު ކުރެވެއެވެ. ނަމަވެސް، ލިބުނު ގެއްލުމުގެ ތަފްސީލާއި ގެއްލުން ލިބުނު ފަރާތްތަކުގެ މައުލޫމާތު އަދި ސާފެއް ނުވެއެވެ.

ފުލުހުންގެ އިބްތިދާއީ ސުވާލުތަކަށް ޖަވާބު ދެމުން، އެ މީހާ ބުނެފައިވަނީ ފެންބޮޑުވާ ހާލަތްތަކުގައި އަމަލުކުރަންޖެހޭ އަދަބުތަކާއި ސަގާފީ އުސޫލުތައް އޭނާއަށް ނޭނގޭ ކަމަށެވެ. އަދި ބޭރު ގައުމެއްގެ ރަހުމަތްތެރިއަކު އެފަދައިން ކަންތައް ކުރުމަށް އޭނާއަށް ހިތްވަރު ދިން ކަމަށާއި، އެއީ އެހެން ގައުމުތަކުގައި ވެސް ދަތި ހާލަތްތަކުގައި ތިބޭ މީހުންގެ މުނިފޫހިފިލުވައިދީ ހިތްހަމަޖައްސައިދިނުމަށް ކުރާ ކަމެއް ކަމަށް އެ ރަހުމަތްތެރިޔާ ބުނި ކަމަށް އޭނާ ކިޔައިދިނެވެ.

މީގެ އިތުރުން، އޭނާ އެ ސަރަހައްދަށް ދިޔައީ ތައިލެންޑްގެ ރަހުމަތްތެރިއަކާއެކު ކަމަށާއި، ޖެޓްސްކީ ދުއްވި މަންޒަރު ވީޑިއޯ ކުރީ އެ ރަހުމަތްތެރިޔާ ކަމަށް ވެސް އޭނާ ބުންޏެވެ.

ފުލުހުން މިހާރު ވަނީ އެ މީހާ ހައްޔަރުކޮށް، ގާނޫނީ ފިޔަވަޅު އެޅުމުގެ މަސައްކަތް ފަށާފައެވެ. އަދި ސެޕްޓެމްބަރު 28 ވަނަ ދުވަހު އޭނާ ކޯޓަށް ހާޒިރުކުރާނެ ކަމަށް ބެލެވެއެވެ.ކަމާބެހޭ ފަރާތްތަކުން ވަނީ އެ ހާދިސާގައި ބޭނުންކުރި ޖެޓްސްކީ ދައުލަތަށް ނެގުމުގެ އަމުރަކަށް ކޯޓުގައި އެދުމަށް ވެސް ނިންމާފައެވެ. ނަމަވެސް މިއީ އަދި ކޯޓުން ނިންމާފައިވާ ނިންމުމެއް ނޫނެވެ.

މި ހާދިސާއާ ގުޅިގެން އިންޓަނެޓްގައި ގިނަ ބައެއްގެ ސަމާލުކަން ވަނީ ލިބިފައެވެ. ފެންބޮޑުވުމުގެ ސަބަބުން އާންމުންނާއި ދަތުރުވެރިން ދަތިތަކާ ކުރިމަތިލަމުންދާ ވަގުތެއްގައި، އާންމު މަގުތަކުގައި މުނިފޫހިފިލުވުމުގެ ހަރަކާތްތައް ހިންގުމާ މެދު ގިނަ ބަޔަކު ދަނީ ބަހުސްކުރަމުންނެވެ.

https://globalnation.inquirer.net/339678/man-arrested-after-riding-jet-ski-through-bangkok-floods/amp