ސްރީލަންކާގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން އަދި ސްރީލަންކާގެ ގާނޫނުހަދާ މަޖިލީހުގެ މެންބަރު ނަމާލް ރާޖަޕަކްސަ، 2013 ވަނަ އަހަރު އެއާބަސް މަތިންދާބޯޓު ގަތުމުގައި ހިންގި ބޮޑު ކޮރަޕްޝަނުގެ މައްސަލައަކާ ގުޅިގެން ހައްޔަރުކޮށްފިއެވެ.

ސްރީލަންކާގެ އެންޓި-ކޮރަޕްޝަން ކޮމިޝަން (ސީއައިއޭބީއޯސީ) އިން ބުނި ގޮތުގައި، އެއްއިރެއްގައި ލަންކާގެ އެންމެ ނުފޫޒުގަދަ އާއިލާގެ ގޮތުގައި އޮތް ރާޖަޕަކްސަ އާއިލާގެ މެންބަރު، އުމުރުން 40 އަހަރުގެ ނަމާލް އެ އިދާރާއަށް ހާޒިރުކުރީ 2.3 ބިލިއަން ޑޮލަރުގެ އެއާބަސް މުއާމަލާތާ ގުޅޭގޮތުން ސުވާލުކުރުމަށެވެ. އަދި ސުވާލުކުރުމަށްފަހު އޭނާ ހައްޔަރުކޮށްފައިވާ ކަމަށާއި، ކޯޓަށް ހާޒިރުކުރުމުގެ މަސައްކަތް ކުރަމުންދާ ކަމަށް އެ ކޮމިޝަނުގެ އޮފިޝަލަކު ވިދާޅުވިއެވެ. ނަމަވެސް، އޭނާގެ މައްޗަށް ރަސްމީކޮށް އުފުލާފައިވާ ދައުވާތަކުގެ ތަފްސީލެއް އަދި ހާމަކޮށްފައެއް ނުވެއެވެ.

ނަމާލްގެ ވަކީލު ނިޝާންތަ ދަޔާނަންދަ ވެސް ވަނީ އޭނާ ހައްޔަރުކުރިކަން ކަށަވަރުކޮށްދީފައެވެ. މި މައްސަލައަކީ 2016 ވަނަ އަހަރު އޭރުގެ އާ ސަރުކާރުން ބާތިލުކުރި އެއާބަސް ބޯޓުތައް ގަތުމުގެ މައްސަލައެކެވެ. މަތިންދާބޯޓު ގަތުމުގެ މުއާމަލާތުގެ ތެރެއިން ރިޝްވަތު ނެންގެވި ކަމުގެ ތުހުމަތުގައި، މިދިޔަ މެއި މަހު ކުރީގެ ރައީސް މަހިންދަ ރާޖަޕަކްސައާ ވެސް ސީއައިއޭބީއޯސީން ވަނީ ސުވާލުކޮށްފައެވެ.

މި ތަހުގީގު މައިގަނޑު ގޮތެއްގައި އަމާޒުވެފައިވަނީ، ޔޫރަޕުގެ މަތިންދާބޯޓު އުފައްދާ އެއާބަސް ކުންފުނިން، ބޯޓުތައް ވިއްކުމުގެ މުއާމަލާތުގެ ތެރެއިން ލަންކާގެ އިސް ވެރިންނަށާއި ސިޔާސީ ފަރާތްތަކަށް ރިޝްވަތުގެ ގޮތުގައި ފައިސާ ފޮނުވި ކަމަށް ކުރެވޭ ތުހުމަތުތަކަށެވެ. އެހެންނަމަވެސް، ރާޖަޕަކްސަގެ އާއިލާއިން މި ތުހުމަތުތައް ދޮގުކުރަމުން ބުނަނީ މިއީ ސިޔާސީ މަގުސަދެއްގައި ކުރާ ތުހުމަތުތަކެއް ކަމަށެވެ.

ސްރީލަންކަން އެއާލައިންސްގެ ކުރީގެ ޗީފް އެގްޒެކެޓިވް ކަޕިލާ ޗަންދްރަސޭނާ، މިދިޔަ މާޗު މަހު ތަހުގީގަށް ދިން ބަޔާނުގައި ވިދާޅުވެފައިވަނީ ނަމާލް ރާޖަޕަކްސައަށް ރިޝްވަތުގެ ގޮތުގައި ގާތްގަނޑަކަށް ބައި މިލިއަން ޑޮލަރު ދެއްވި ކަމަށެވެ. ކޯޓަށް ހުށަހެޅި ލިޔުންތަކުން އެނގޭ ގޮތުގައި 2013 ވަނަ އަހަރު ތިން ފަހަރެއްގެ މަތިން ޖުމްލަ 60 މިލިއަން ރުޕީސް (އޭރުގެ ރޭޓުން ގާތްގަނޑަކަށް 461،000 އެމެރިކާ ޑޮލަރު) ނަމާލަށް ދީފައިވެއެވެ. ނަމަވެސް، ފަހުން ޗަންދްރަސޭނާ ވަނީ މަޖުބޫރުކޮށްގެން ދިން ބަޔާނެއް ކަމަށް ބުނެ އެ ވާހަކަތައް އަނބުރާ ގެންގޮސްފައެވެ. އޭގެ ފަހުން، އަލުން ހައްޔަރުކުރަން ކުޑަތަންވެފައި ވަނިކޮށް، މިދިޔަ މެއި މަހު ޗަންދްރަސޭނާ ވަނީ ތިމާގެ މީހެއްގެ ގޭގައި މަރުވެފައި އޮއްވާ ފެނިފައެވެ. އޭނާ މަރުވި ސަބަބު އަދި މިހާތަނަށް ދެނެގަނެވިފައެއް ނުވެއެވެ.

އެމެރިކާ، އިނގިރޭސިވިލާތް އަދި ފްރާންސްގެ ކަމާބެހޭ އިދާރާތަކުން ގުޅިގެން ކުރިން ހިންގި ތަހުގީގަކުން ހާމަވި ގޮތުގައި، ސްރީލަންކާއަށް 10 އެއާބަސް ބޯޓު ގަތުމުގެ އެއްބަސްވުމުގެ ދަށުން ރިޝްވަތުގެ ގޮތުގައި 16 މިލިއަން ޑޮލަރު ދިނުމަށް އެއާބަސް ކުންފުނިން އެއްބަސްވެފައިވެއެވެ. އަދި މި ސްކޭންޑަލް ފަޅާއެރުމުގެ ކުރިން ޗަންދްރަސޭނާއަށް 1.7 މިލިއަން ޑޮލަރު ވަނީ ޖަމާކޮށްދީފައެވެ. މި ބޯޓުތައް ގަތުމަށް ކެބިނެޓުގެ ހުއްދަ ހޯދާފައިވަނީ 2005 އިން 2015 އަށް މަހިންދަ ރާޖަޕަކްސަގެ ވެރިކަމުގައެވެ.

މި މައްސަލަތަކާއި ދަރަނީގެ ސަބަބުން ސްރީލަންކަން އެއާލައިންސް ވަނީ ގާތްގަނޑަކަށް 2 ބިލިއަން ޑޮލަރުގެ ބޮޑު ގެއްލުމަކާ ކުރިމަތިލާން ޖެހިފައެވެ. އަދި ދަރަނިވެރިވެފައިވާ އެ ގައުމީ އެއާލައިން ޕްރައިވެޓައިޒް ކުރުމަށް ތަކުރާރުކޮށް ކުރި މަސައްކަތްތައް ވެސް މިހާތަނަށް ވަނީ ނާކާމިޔާބުވެފައެވެ.