ކުރީގެ ރައީސް އިބްރާހީމް މުޙައްމަދު ޞާލިޙަކީ ވެރިކަމުގެ އާރާއި ބާރުގެ ފަހަތުން ދުވާނެ ބޭފުޅެއް ނޫން ކަމަށާއި، އެމަނިކުފާނަކީ ކަންކަމުގައި ފުންކޮށް ވިސްނަވައިގެން މަޝްވަރާއާއެކު ގޮތް ނިންމަވާ ހަރުދަނާ ސިޔާސީ ލީޑަރެއް ކަމަށް އެމަނިކުފާނުގެ ކޮއްކޯފުޅު އަލީ ނިޔާޒް ވިދާޅުވެއްޖެއެވެ.

ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ރައީސް ޞާލިޙު ވާދަކުރައްވާނެތޯ އުފެދެމުންދާ ސުވާލުތަކާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ނިޔާޒް ވިދާޅުވީ، ރައީސް ޞާލިޙަކީ ކުއްލި ކުއްލިއަށް ގޮތް ނިންމަވައި، އިރުއިރުކޮޅާ ނިންމެވުންތައް ބަދަލުކުރައްވާ ބޭފުޅެއް ނޫންކަން ދިވެހި ރައްޔިތުންނަށް ސާބިތުކޮށްދެއްވާފައިވާ ކަމަށެވެ.

އަދި އެމަނިކުފާނު ޤައުމަށް ކޮށްދެއްވި ޚިދުމަތްތަކުގެ އަގު ވަޒަންކުރާ އެތައް ރައްޔިތުންނެއް ތިބިކަން ފާހަގަކުރައްވަމުން، އެމަނިކުފާނު އަބަދުވެސް މަސައްކަތް ކުރައްވާނީ ވަގުތާއި ހާލަތަށް ބައްލަވައި ޤައުމާއި ޕާޓީގެ މަޞްލަޙަތުގައި ކަމަށް ނިޔާޒް ވިދާޅުވިއެވެ.

ކުރިއަށް އޮތް އިންތިޚާބުގައި ރައީސް ޞާލިޙު ވާދަނުކުރައްވާ ހާލަތެއްގައި އަމަލުކުރައްވައިފާނެ ތިން ގޮތެއް ނިޔާޒް ވަނީ ފާހަގަކުރައްވާފައެވެ. އެއީ:

އެމަނިކުފާނާއެކު ސިޔާސީގޮތުން މަސައްކަތްކުރެއްވި ޓީމުގެ ބޭފުޅަކު މަޝްވަރާއާއެކު ކުރިމަތިލުމުން އެ ފަރާތަކަށް ތާއީދުކުރުން، އިންތިޚާބުގައި ވާދަކުރައްވާނެކަން ދުރާލާ އިޢުލާންކުރައްވާ އެހެން ކެންޑިޑޭޓަކަށް ތާއީދުކުރުން، ނުވަތަ ވަކި ފަރާތަކަށް ތާއީދު ނުކޮށް ހިމޭނުން ހުންނެވުމެވެ.

އަލީ ނިޔާޒް ބުރަވެވަޑައިގަންނަވާ ގޮތުގައި، ކުރިއަށް އޮތް އިންތިޚާބުގައި ރައީސް ޞާލިޙު ވާދަނުކުރެއްވުމުގެ ފުރުޞަތު ބޮޑެވެ.

ނަމަވެސް އެމްޑީޕީއަށް ކުރިއަށް އޮތް ރިޔާސީ އިންތިޚާބު ކާމިޔާބުކުރުމަށްޓަކައި ރައީސް ޞާލިޙުގެ ސިޔާސީ ތަޖުރިބާ ވަރަށް މުހިންމު ކަމަށާއި، އެމަނިކުފާނުގެ ނިންމެވުން އެންމެ މުނާސަބު ވަގުތުގައި އާންމުކުރައްވާނެ ކަމަށް އުންމީދުކުރައްވާ ކަމަށްވެސް ނިޔާޒް ވިދާޅުވިއެވެ.