މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބިޔަ މަޝްރޫޢާ ގުޅޭގޮތުން، މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން ވިޔަފާރިވެރިންނާ ބައްދަލުކޮށް މުހިންމު މަޝްވަރާތަކެއް މިއަދު ބާއްވައިފިއެވެ.

މީރުމާގައި ބޭއްވުނު މި ބައްދަލުވުމުގައި ވިޔަފާރިވެރިންގެ މަންދޫބުންނާއެކު، އެމް.ޕީ.އެލްގެ ސީ.އީ.އޯ ކެޕްޓަން މުޙައްމަދު ޖުމާދު އަދި ކުންފުނީގެ އިސް މެނޭޖްމަންޓުން ބައިވެރިވެވަޑައިގެންނެވިއެވެ. މި ބައްދަލުވުމުގެ މައިގަނޑު މަޤްޞަދަކީ ބަނދަރު ބަދަލުކުރުމުގެ މަސައްކަތް ކުރިއަށްދާ ގޮތުގެ އެންމެ ފަހުގެ މަޢުލޫމާތު، މި މަޝްރޫޢުގެ މުހިންމު ހިއްސާދާރުން ކަމުގައިވާ ވިޔަފާރިވެރިންނާ ހިއްސާކުރުމެވެ. މި ބައްދަލުވުމުގައި ވިޔަފާރިވެރިން ވަނީ ތިލަފުށީގެ އޮޕަރޭޝަންތައް ވީހާވެސް ހަލުވި އަދި ފަސޭހަ ނިޒާމެއްގެ ދަށުން ކުރިއަށް ގެންދެވޭނެ ގޮތްތަކާ ގުޅޭގޮތުން އަގުހުރި ޚިޔާލުތަކެއް ހުށަހަޅާފައެވެ.

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢަކީ މާލޭ ބަނދަރަށް ދިމާވެފައިވާ ޖާގައިގެ ދަތިކަމާއި، މާލޭގެ މަގުތައް ތޮއްޖެހުމުގެ މައްސަލައަށް ދާއިމީ ޙައްލެއް ހޯދުމަށް ސަރުކާރުން ކުރިއަށްގެންދާ ނުހަނު މުހިންމު މަސައްކަތެކެވެ. މި މަޝްރޫޢާ ގުޅިގެން އެމް.ޕީ.އެލް އިން ދަނީ ކަމާބެހޭ ހުރިހާ ފަރާތްތަކަކާ ސިލްސިލާކޮށް ބައްދަލުކުރަމުންނެވެ. އެގޮތުން މިހާތަނަށް ސަރުކާރުގެ މިނިސްޓްރީތަކާއި، ކުންފުނިތަކުގެ އިތުރުން މީޑިއާ އަދި މަޖޫރީންނާ ވެސް ވަނީ މަޝްވަރާކޮށްފައެވެ.

ތިލަފުށީގައި އަލަށް ތަރައްޤީކުރާ ބަނދަރަކީ މާލޭ ބަނދަރަށްވުރެ 12 ގުނަ ބޮޑު ސަރަޙައްދެކެވެ. ޒަމާނީ ވަސީލަތްތަކާއެކު ޤާއިމުކުރާ މި "ސްޓޭޓް-އޮފް-ދި-އާޓް" މަލްޓި-ޕާޕަސް ބަނދަރަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިޤްތިޞާދީ ވަޢުދުފުޅުތަކުގެ ތެރެއިން ފާހަގަކޮށްލެވޭ މުހިންމު މަޝްރޫޢެކެވެ. މި ބަނދަރު ހުޅުވުމުން ވިޔަފާރިވެރިންނަށް 24 ގަޑިއިރު މެދުކެނޑުމެއްނެތި ޚިދުމަތް ލިބޭނެ ފުރިހަމަ ނިޒާމެއް ޤާއިމުވެގެންދާނެއެވެ.

އަންނަ އަހަރުގެ ނޮވެންބަރު މަހުގެ 11 ވަނަ ދުވަހު މި ބަނދަރުގެ ޚިދުމަތް ރަސްމީކޮށް ފެށޭނެކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ. މި ބަދަލާއެކު، ބަނދަރުގެ އޮޕަރޭޝަންތަކަށް ދިމާވެފައިވާ ގޮންޖެހުންތަކަށް ނިމުމެއް އައިސް، ރާއްޖޭގެ އިޤްތިޞާދީ ދުވެލި އިތުރަށް ހަލުވިވެގެންދާނެއެވެ.