ބަރުދަން ލުއިކުރުމަށް ދުނިޔޭގެ މަގުބޫލުކަން ހޯދާފައިވާ "އޮޒެމްޕިކް" އަދި "ވީގޯވީ" ފަދަ ޖީ.އެލް.ޕީ-1 ބޭސްތަކަކީ ހަމައެކަނި ހަށިގަނޑުގެ ބަރުދަން ލުއިކޮށްދޭ އެއްޗެއް ނޫން ކަމަށާއި، އިންސާނާގެ އުމުރުން ދުވަސްވުމާ ގުޅިފައިވާ ބައޮލޮޖިކަލް މަސައްކަތްތައް ލަސްކޮށްދިނުމުގެ ބާރު އެ ބޭސްތަކުގައި ހުރެދާނެ ކަމަށް އައު ދިރާސާއަކުން ދައްކައިފިއެވެ.

"ނޭޗަރ ކޮމިއުނިކޭޝަންސް" މަޖައްލާގައި ޝާއިޢުކޮށްފައިވާ މި ދިރާސާއިން ދައްކާ ގޮތުގައި، މި ބޭސްތަކުގައި ހިމެނޭ މައިގަނޑު މާއްދާއެއް ކަމަށްވާ "ސެމަގްލޫޓައިޑް" އަކީ އިންސާނާގެ ހަށިގަނޑު މުސްކުޅިވުމާ ގުޅިފައިވާ ޑީ.އެން.އޭ މާކަރުތައް އިތުރުވުން މަޑުޖައްސާލަދޭ މާއްދާއެކެވެ. ސައިންސް ޑެއިލީން ރިޕޯޓްކޮށްފައިވާ ގޮތުގައި، މިއީ ޖީ.އެލް.ޕީ-1 ބޭހަކުން އިންސާނާގެ އުމުރުން ދުވަސްވުމުގެ މަރުހަލާތަކަށް ނުފޫޒު ފޯރުވާކަން ސައިންޓިފިކް ތަހުލީލުތަކުން ކަށަވަރުވި ފުރަތަމަ ފަހަރެވެ.

މި ދިރާސާ މައިގަނޑު ގޮތެއްގައި އަމާޒުކޮށްފައިވަނީ އެޗް.އައި.ވީ އާއެކު ދިރިއުޅޭ މީހުންނަށެވެ. އެއީ އެ ބައްޔަކީ ހަށިގަނޑުގެ ދިފާއީ ނިޒާމަށް އަންނަ ބަދަލުތަކާއި އިންފްލެމޭޝަންގެ ސަބަބުން، އާންމު މީހުންނަށްވުރެ އަވަހަށް މުސްކުޅިވުމުގެ އަލާމާތްތައް ފެންނަ ބައެއް ކަމަށްވާތީއެވެ. ދިރާސާގެ ބައިވެރިންގެ ތެރެއިން ސެމަގްލޫޓައިޑް ބޭނުންކުރި މީހުންގެ ހަށިގަނޑުގައި، ޕްލެސީބޯ (ބޭހެއް ނޫން އެއްޗެއް) ބޭނުންކުރި މީހުންނާ އަޅާބަލާއިރު އުމުރުން ދުވަސްވުމާ ގުޅޭ ޑީ.އެން.އޭ މާކަރުތައް އިތުރުވާ މިންވަރު މަދުކަން ވަނީ ފާހަގަކުރެވިފައެވެ.

ސައިންސްވެރިން ގަބޫލުކުރާ ގޮތުގައި މި ބޭހުގެ ސަބަބުން އުމުރުން ދުވަސްވުން ލަސްކޮށްދެނީ ހަށިގަނޑުގައި އުފެދޭ އިންފްލެމޭޝަން ނުވަތަ ދުޅަހެޔޮކަން ކުޑަވުން މަދުކޮށްދީ، މެޓަބޮލިކް ދުޅަހެޔޮކަން އިތުރުކޮށްދޭތީއެވެ. މީގެ އިތުރުން، ހަށިގަނޑުގެ އެތެރޭގެ ގުނަވަންތަކުގެ ވަށައިގެން އުފެދޭ ނުރައްކާތެރި ސަރުބީ އާއި އެހެނިހެން ޓިޝޫތަކުގައި އުފެދޭ ބޭކާރު ސަރުބީ މަދުކުރުމަށް މި ބޭސް އެހީތެރިވެދެއެވެ. މީގެ ސަބަބުން ހަށިގަނޑުގެ ސެލްތައް މުސްކުޅިވުމަށް މަގުފަހިވާ ސިގްނަލްތައް މަދުވެގެންދެއެވެ.

ޔޫ.ސީ ސެން ޑިއޭގޯ ސްކޫލް އޮފް މެޑިސިންގެ އެސޯސިއޭޓް ޕްރޮފެސަރ މައިކަލް ކޯލީ ވިދާޅުވި ގޮތުގައި، މި ހޯދުމަކީ ސެމަގްލޫޓައިޑަކީ މުސްކުޅިވުން ހުއްޓުވާ ނުވަތަ މީހާ ހަގުކޮށްދޭ ބޭހެއް ކަމުގެ ހެއްކެއް ނޫނެވެ. ނަމަވެސް، މިއީ އުމުރުން ދުވަސްވުމާ ގުޅުންހުރި ބައޮލޮޖިކަލް މަރުހަލާތައް ލަސްކޮށްދޭނެ ކަމުގެ އުންމީދީ ނިޝާނެކެވެ.

މި ދިރާސާއިން އުންމީދީ ނަތީޖާތަކެއް ފެނުނު ނަމަވެސް، މިއީ އާންމު ދުޅަހެޔޮ ސިއްހަތެއްގައި ތިބޭ މީހުންގެ މުސްކުޅިވުން ލަސްކުރުމަށް ބޭނުންކުރެވިދާނެ ބޭހެއްގެ ގޮތުގައި ކަނޑައެޅުމުގެ ކުރިން، މިއަށްވުރެ ފުޅާ ދާއިރާއެއްގައި ކްލިނިކަލް ޓްރަޔަލްތައް ހަދަންޖެހޭނެ ކަމަށް ދިރާސާވެރިން ވަނީ ބުނެފައެވެ.