މިއަދު ބޭއްވި ޕީއެންސީގެ ނޫސްވެރިންގެ ބައްދަލުވުމެއްގައި، ރައްޔިތުންގެ މަޖިލީހުގެ ނައިބު ރައީސްކަމުން ދިއްގަރު ދާއިރާގެ މެންބަރު އަހުމަދު ނާޒިމް ވަކިކުރުމާ ގުޅޭގޮތުން މަޖިލީހުގެ ރައީސް އަބްދުއްރަހީމް އަބްދުﷲ ވާހަކަފުޅު ދައްކަވައިފިއެވެ.

މި ބައްދަލުވުމުގައި ވާހަކަފުޅު ދައްކަވަމުން ރައީސް އަބްދުއްރަހީމް ފާހަގަކުރެއްވި ގޮތުގައި، ޕާޓީގެ އަސާސީ ގަވައިދުގެ 37 ވަނަ މާއްދާގެ ދަށުން، ޕާޓީގެ ދާއިރާތަކުގެ ރައީސުންނާއި ނައިބު ރައީސުން ޕާޓީއަށް ގެއްލުންވާ ފަދަ އަމަލުތައް ހިންގާނަމަ، އެ ފަރާތްތަކާމެދު ފިޔަވަޅު އެޅުމުގެ ފުރިހަމަ އިޚްތިޔާރު ޕާޓީގެ ލީޑަރޝިޕަށް ލިބިގެންވެއެވެ.

އެގޮތުން، ދާއިރާތަކުގެ ހިންގުން ހަރުދަނާކޮށް ޕާޓީގެ މަސައްކަތްތައް ވަރުގަދަ ކުރުމަކީ ލީޑަރޝިޕްގެ ޒިންމާއެއްކަމަށާއި، މިފަދަ ހާލަތްތަކުގައި ޕާޓީގެ މަސްލަހަތު އިސްކޮށް ފިޔަވަޅު އެޅުމުގެ ބާރު ލިބިފައިވާކަން އެމަނިކުފާނު ތަކުރާރުކުރެއްވިއެވެ.

​މީގެ އިތުރުން، ޕާޓީގެ އެތެރޭގެ ހިންގުމާ ގުޅޭގޮތުން ކުރެވުނު ސުވާލުތަކަށް ޖަވާބު ދެއްވަމުން، ވަކި މެންބަރަކު ޕާޓީން ވަކިކުރުމުގެ މައްސަލައަކީ ޕާޓީގެ އުސޫލުތަކާއި އެއްގޮތަށް ކުރިއަށްދާ ކަމެއްކަން ހާމަކުރެއްވިއެވެ. އަދި މިހާރުގެ ހާލަތަށް ބަލާއިރު، އެފަދަ އެއްވެސް މައްސަލައެއް ނުވަތަ ނުތަނަވަސްކަމެއް ނެތްކަން ފާހަގަކުރައްވައި، ޕާޓީގެ އެތެރޭގެ ކަންކަން ހަމަޖެހިފައިވާކަމުގެ ޔަގީންކަން އެމަނިކުފާނު ދެއްވިއެވެ.

މި ބައްދަލުވުމުގައި މަޖިލީހުގެ ރައީސް އަބްދުއްރަހީމް ދެއްކެވި ވާހަކަފުޅުން، ޕާޓީގެ ގަވައިދުތަކަށް ބޯލެނބުމާއި، ޕާޓީގެ މަސްލަހަތު ހިފެހެއްޓުމުގައި ލީޑަރޝިޕުން ދެމިތިބޭނެކަމުގެ ޔަގީންކަން ވަނީ ދެއްވާފައެވެ.