ސިވިލް ސަރވިސްގެ ޚިދުމަތްތައް ހަރުދަނާކޮށް، މުވައްޒަފުންގެ ހުނަރާއި ގާބިލުކަން އިތުރުކުރުމުގެ މަގުސަދުގައި ބާއްވާ "ސިވިލް ސަރވިސް ކޮންފަރެންސް 2026" މިއަދު ރަސްމީކޮށް ފަށައިފިއެވެ.

މި ކޮންފަރެންސް ފައްޓަވައިދެއްވީ މިނިސްޓަރ އޮފް އެޑިޔުކޭޝަން ޑރ. އިސްމާޢިލް ޝަފީޢުއެވެ.

ރާއްޖޭގައި އޮތް އެންމެ ބޮޑު މަސައްކަތްތެރިންގެ ދަފްތަރު ކަމަށްވާ ސިވިލް ސަރވިސްގެ ދަށުން 35,000 އަށްވުރެ ގިނަ މުވައްޒަފުން ދަނީ ޤައުމީ ޚިދުމަތުގައި މަސައްކަތް ކުރަމުންނެވެ. މި މުވައްޒަފުންގެ ވަޒީފާއާއި ގުޅުންހުރި މުހިއްމު މަސައްކަތްތައް ހަރުދަނާކުރުމަށް ކޮންމެ ދެ އަހަރުން އެއް އަހަރު ބާއްވާ މި ކޮންފަރެންސަކީ، މި ސިލްސިލާގެ ދަށުން ބޭއްވޭ 5 ވަނަ ކޮންފަރެންސެވެ. ފުރަތަމަ ކޮންފަރެންސް 2014 ވަނަ އަހަރު ބޭއްވިއިރު ބައިވެރިވީ 80 އެއްހާ މުވައްޒަފުންނެވެ. ނަމަވެސް މިއަހަރުގެ ކޮންފަރެންސްގައި ސްކޫލްތަކާއި، ހޮސްޕިޓަލްތަކާއި، ސިޓީ ކައުންސިލްތަކުގެ އިތުރުން ރަށު ކައުންސިލްތައް ހިމެނޭހެން 300 އެއްހާ ފަރާތުން ބައިވެރިވެފައިވެއެވެ.

މިއަހަރުގެ ކޮންފަރެންސް ފެށުމުގެ ރަސްމިއްޔާތުގައި ވާހަކަދައްކަވަމުން ސިވިލް ސަރވިސް ކޮމިޝަންގެ ރައީސް އަލްއުސްތާޛް މުޙައްމަދު މުޖުތާޒް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް 2.0" ތަސައްވުރާއެކު ސިވިލް ސަރވިސްގެ ޚިދުމަތްތަކަށް އިންގިލާބީ ބޮޑު ބަދަލެއް އަންނާނެ ކަމަށެވެ.

އެގޮތުން ޓެކްނޮލޮޖީގެ އެހީގައި ރައްޔިތުންނަށް ފޯރުކޮށްދޭ ޚިދުމަތްތައް އަވަސްކުރުމާއި، މިހާރު ދިމާވާ ގޮންޖެހުންތަކަށް ޢިލްމީ ހައްލު ހޯދުމަށް މި ކޮންފަރެންސްގެ ތެރޭގައި މަޝްވަރާކުރެވޭނެއެވެ. މީގެ އިތުރުން، 2009 ވަނަ އަހަރުން ފެށިގެން މުސާރައިގެ ކުރިއެރުން ނުލިބި ތިބި ގިނަ އަދަދެއްގެ މުވައްޒަފުންނަށް، މިދިޔަ އަހަރުގެ ނޮވެންބަރު މަހު މުސާރައިގެ ކުރިއެރުން ދީފައިވާކަންވެސް މުޖުތާޒް ފާހަގަކުރެއްވިއެވެ.

މި ފަހަރުގެ ކޮންފަރެންސްގައި ތަފާތު 8 ދާއިރާއަކުން 18 ދިރާސީ ކަރުދާސް ހުށަހެޅުމަށް ވަނީ ހަމަޖެހިފައެވެ. ކޮންފަރެންސް ހުޅުވުމުގެ ރަސްމިއްޔާތުގެ ތެރެއިން، 2026 އިން 2030 ގެ ނިޔަލަށް އެކުލަވާލާފައިވާ ސިވިލް ސަރވިސްގެ އާ އެކްޝަން ޕްލޭން އިފްތިތާޙްކޮށް، ކޮންފަރެންސްގެ އެބްސްޓްރެކްޓް ފޮތް ވެސް ވަނީ ނެރެފައެވެ.

ސިވިލް ސަރވިސް ކޮމިޝަނުން ހާމަކުރި ގޮތުގައި މި ކޮންފަރެންސްގެ ސަބަބުން މާލެއާއި އަތޮޅުތަކުގައި މަސައްކަތްކުރާ މުވައްޒަފުންގެ މެދުގައި އޮތް ފަރަގުތައް ކުޑަވެގެންދާނެއެވެ. އަދި ދައުލަތުގެ އެކި އިދާރާތަކުގެ މެދުގައި އޮންނަ ގުޅުން ބަދަހިވެ، ޤައުމީ ފެންވަރުގައި ޚިދުމަތުގެ ފެންވަރު މަތިކުރުމަށް މަގުފަހިވެގެންދާނެ ކަމަށް އެ ކޮމިޝަނުން ބުނެއެވެ.