ބޮލީވުޑްގެ މަޝްހޫރު އެކްޓަރު ރަންވީރު ސިންގާއެކު މަސައްކަތް ނުކުރުމަށް ފެޑެރޭޝަން އޮފް ވެސްޓަން އިންޑިއާ ސިނެ އެމްޕްލޯއީޒް (FWICE) އިން މީގެ ކުރިން ނެރުނު އިލްތިމާސް އެ ޖަމިއްޔާއިން އަނބުރާ ގެންގޮސްފިއެވެ. މި ނިންމުމާއެކު، ކުރިއަށް އޮތް ފިލްމު "ޑޮން 3" އިން ރަންވީރު ވަކިވި ކަމަށް ބުނެ އުފެދުނު ހިޔާލުތަފާތުވުންތަކަށް ވަނީ ނިމުމެއް އައިސްފައެވެ.

މި މައްސަލަ އުފެދުނީ "ޑޮން 3" ގެ މަސައްކަތް ފެށުމަށް ކުޑަދުވަސްކޮޅަކަށް ވެފައި ވަނިކޮށް، ރަންވީރު އެ ފިލްމުން ވަކިވި ކަމަށް ބުނެ އުފެއްދުންތެރިން ޝަކުވާ ހުށަހެޅުމާ ގުޅިގެންނެވެ. އުފެއްދުންތެރިން ބުނާ ގޮތުގައި، ފިލްމުގެ ޕްރީ-ޕްރޮޑަކްޝަނަށާއި ރާއްޖެއިން ބޭރުގައި ކުރަންޖެހޭ ތައްޔާރީތަކަށް އޭރު ބޮޑެތި ހަރަދުތަކެއް ވަނީ ކޮށްފައެވެ.

މި ޝަކުވާއާ ގުޅިގެން މެއި މަހުގެ 25 ވަނަ ދުވަހު FWICE އިން ވަނީ މައްސަލަ ވަކި ގޮތަކަށް ނިމެންދެން ރަންވީރާއެކު މަސައްކަތް ނުކުރުމަށް މެންބަރުންނަށް އަންގާފައެވެ. ނަމަވެސް، ރަންވީރުގެ ފަރާތުން ފޮނުވި ގާނޫނީ ނޯޓިސްއަކާ ގުޅިގެން އެ ފެޑެރޭޝަނުން މިހާރު ވަނީ އެ ނިންމުން ބަދަލުކޮށްފައެވެ.

FWICE ގެ ރައީސް ބީ.އެން. ތިވާރީ ވިދާޅުވި ގޮތުގައި ފިލްމީ ސިނާއަތުގެ ފުރިހަމަ ތާއީދު ރަންވީރަށް އެބައޮތެވެ. އަދި އެ ޖަމިއްޔާގެ އިސް މުޝީރު އަޝޯކް ޕަންޑިތު ފާހަގަކުރެއްވި ގޮތުގައި، ފަންނާނުން މަސައްކަތް ކުރުން މަނާކުރުމުގެ ރަސްމީ ބާރެއް އެ ޖަމިއްޔާއަކަށް ނޯވެއެވެ. އޭނާ އިތުރަށް ވިދާޅުވީ ފިލްމީ ދާއިރާގެ އެކި ޖަމިއްޔާތަކުން އެދިގެން މި ނިންމުން މުރާޖައާކޮށްފައިވާ ކަމަށާއި، މަޝްވަރާގެ އަލީގައި މި މައްސަލަ މުޅިން ހައްލުވާނެ ކަމަށް އުއްމީދު ކުރައްވާ ކަމަށެވެ.

މި މައްސަލައާ ގުޅޭގޮތުން ރަންވީރު ސީދާ އެއްޗެއް ބުނެފައި ނުވި ނަމަވެސް، އޭނާގެ ވަކީލުން ބުނެފައިވަނީ އޭނާ އިންޑިއާގެ ފިލްމީ ދާއިރާއަށާއި "ޑޮން" ފްރެންޗައިޒަށް ވަރަށް ބޮޑަށް އިހުތިރާމް ކުރާ ކަމަށެވެ.

ފަރްހާން އަޚްތަރު ޑައިރެކްޓްކުރާ "ޑޮން 3" އަކީ ބޮލީވުޑްގެ އެންމެ ކާމިޔާބު އެކްޝަން ފްލްމުތަކުގެ ތެރޭގައި ހިމެނޭ ސިލްސިލާއެކެވެ. 1978 ވަނަ އަހަރު އަމީތާބް ބައްޗަން ފެށި މި ސިލްސިލާގައި ފަހުން ޝާހްރުކް ޚާން ވެސް ވަނީ މަސައްކަތް ކޮށްފައެވެ. "ޑޮން 3" ގައި ލީޑް ރޯލު ކުޅުމަށް ހަމަޖެހިފައިވަނީ ރަންވީރު ސިންގްއެވެ. މަމަވެއް ދެން އެކަން އެހެންދާނެކަން ޔަޤީނެއްނޫނުވެ.

ރަންވީރު ސިންގާއަކީ "ޕަދްމާވަތު" އަދި "ގަލީ ބޯއި" ފަދަ ފިލްމުތަކުން ބޮޑު މަޤުބޫލުކަމެއް ހޯދާފައިވާ ތަރިއެކެވެ. އޭނާ އެންމެ ފަހުން ފެނިގެންދިޔަ "ދުރަންދަރު" އަކީ ވެސް ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމެކެވެ.