ޔޫއީއެފްއޭ ކޮލިފައިންގެ ގްރޫޕްގައި ކްރޮއޭޝިއާގެ ފަހަތުން ދެވަނަ ހޯދުމަށްފަހު، ޗެކިއާއަށް ވޯލްޑް ކަޕުން ފުރުސަތު ލިބުނީ މިދިޔަ މާރިޗު މަހު ކުޅުނު ޕްލޭ-އޯފް މެޗުތަކުންނެވެ.

ސެމީ ފައިނަލްގައި ރިޕަބްލިކް އޮފް އަޔަލޭންޑް ބަލިކުރުމަށްފަހު، ޕްރާގްގައި ކުޅުނު ފައިނަލް މެޗުގައި ޑެންމާކާ ވާދަކޮށް، އިތުރު ވަގުތުގެ ކުޅުން ނިމުނުއިރު 2-2 އިން އެއްވަރުވެފައި ވަނިކޮށް، ޕެނަލްޓީގައި (3-1 އިން) ކުރިހޯދައިގެން ޗެކިއާއިން ވަނީ 20 އަހަރުގެ މެދުކެނޑުމަކަށްފަހު ފީފާ ވޯލްޑް ކަޕް 2026 އިން ޖާގަ ކަށަވަރުކޮށްފައެވެ. އުތުރު އެމެރިކާގައި ބާއްވާ މި މުބާރާތުގައި އެ ގައުމު ހިމެނެނީ ގްރޫޕް އޭ ގައެވެ. މި ގްރޫޕްގައި ދެން ހިމެނެނީ މުބާރާތް ބާއްވާ އެއް ގައުމު ކަމަށްވާ މެކްސިކޯގެ އިތުރުން ސައުތު އެފްރިކާއާއި ސައުތު ކޮރެއާއެވެ.

ވޯލްޑްކަޕް ކޮލިފައިންގެ ޕްލޭ-އޯފްގެ ފޯރިގަދަ މޮޅުވުންތަކަކީ ޗެކިއާގެ ކޯޗު ކޫބެކްގެ އިރުޝާދުގެ ދަށުން އެ ޓީމުން ކުޅުނު ފުރަތަމަ މެޗުތަކެވެ. އުމުރުން 74 އަހަރުގެ ކޫބެކް ޓީމާ ހަވާލުވީ 2025 ވަނަ އަހަރުގެ ޑިސެމްބަރު މަހު، ކޮލިފައިންގައި ފެރޯ އައިލެންޑްސް އަތުން ބަލިވުމާ ގުޅިގެން މަގާމުން ވަކިކުރި އިވާން ހަޝެކްގެ ބަދަލުގައެވެ. ކޫބެކަކީ ކުރިން ސްޕާޓާ ޕްރާގަށް ކުޅުނު ކާމިޔާބު ގޯލްކީޕަރެކެވެ. އޭނާ ކޯޗިންގް ކެރިއަރު ފެށީ 1980 ގެ ކުރީކޮޅުގައެވެ.

ފީފާ ވޯލްޑް ކަޕް 2026 ގައި ޗެކިއާގެ މެޗުތައް:

11 ޖޫން: ކޮރެއާ ރިޕަބްލިކް އާއި ޗެކިއާ - އެސްޓާޑިއޯ ގުއަޑަލަޖާރާ

18 ޖޫން: ޗެކިއާ އާއި ސައުތު އެފްރިކާ - އެޓްލާންޓާ ސްޓޭޑިއަމް

24 ޖޫން: ޗެކިއާ އާއި މެކްސިކޯ - މެކްސިކޯ ސިޓީ ސްޓޭޑިއަމް

ޗެކިއާގެ ފުޓްބޯޅަ ތާރީޚަށް ބަލާއިރު، ކުރީގެ ޗެކޯސްލޮވާކިއާގެ ނަމުގައި އެ ގައުމުން ވަނީ 1934 އަދި 1962 ވަނަ އަހަރުގެ ވޯލްޑް ކަޕް ފައިނަލްގައި ކުޅެފައެވެ. 1934 ވަނަ އަހަރުގެ ފައިނަލްގައި އިޓަލީ އަތުން ބަލިވިއިރު، 1962 ވަނަ އަހަރު ޗިލީގައި ބޭއްވި މުބާރާތުގެ ފައިނަލްގައި ބްރެޒިލް އަތުން ވަނީ ބަލިވެފައެވެ.

އެ ގައުމުގެ އެންމެ ފާހަގަކޮށްލެވޭ އެއް ކުޅުންތެރިއަކީ 1934 ވަނަ އަހަރުގެ މުބާރާތުގައި 5 ގޯލާއެކު އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދި އޮލްޑްރިކް ނެޖެޑްލީއެވެ. އޭނާ ވަނީ ޖުމްލަ 7 ލަނޑު ވޯލްޑް ކަޕްގައި ޖަހާފައެވެ. ދެން އެންމެ ގިނަ ލަނޑު ޖަހާފައިވަނީ 5 ލަނޑާއެކު ތޯމަސް ސްކޫރާވީއެވެ. މީގެއިތުރުން ލަޑިސްލާވް ނޮވާކް ވަނީ ތިން ވޯލްޑް ކަޕެއްގައި 12 މެޗު ކުޅެފައެވެ.

ޗެކޯސްލޮވާކިއާގެ ތާރީޚީ ކާމިޔާބީތަކުގެ ތެރޭގައި 1958 ވަނަ އަހަރު އާޖެންޓީނާ 6-1 އިން ބަލިކުރުމާއި، 1990 ވަނަ އަހަރުގެ ކުއާޓާ ފައިނަލަށް ދަތުރުކުރުން ހިމެނެއެވެ.