މާލެ ސަރަހައްދުގައި ކުލި ބޮޑުވަމުންދާ މައްސަލައަށް ހައްލެއް ހޯދުމުގެ ގޮތުން ކުލި ކޮންޓްރޯލް ކުރުމަށް ބިލެއް ރައްޔިތުންގެ މަޖިލީހަށް ހުށަހެޅުމަކީ ސަރުކާރުގެ ވިސްނުމެއް ނޫން ކަމަށް ސަރުކާރުގެ ތަރުޖަމާނު މުހައްމަދު ޝަރީފް (މުންދު) ވިދާޅުވެއްޖެއެވެ.

"ރަސް އޮންލައިން" އިން ކުރި ސުވާލަކަށް ޖަވާބު ދެއްވަމުން ތަރުޖަމާނު ވަނީ، ކުލި ކޮންޓްރޯލް ކުރުމަކީ މި ސަރުކާރުގެ ސިޔާސަތެއް ނޫން ކަމަށް ސާފުކޮށްދެއްވާފައެވެ.

ސަރުކާރުން ގަބޫލުކުރާ ގޮތުގައި ގާނޫނަކުން ކުލި ހިފެހެއްޓުމުގެ ބަދަލުގައި، ގިނަ އަދަދެއްގެ ބޯހިޔާވަހިކަމުގެ މަޝްރޫއުތައް ހިންގައި މާކެޓަށް ގެދޮރު އިތުރުކޮށްގެން މާލޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދޭނެއެވެ.

​މާލޭ ސަރަހައްދުގައި ދިރިއުޅޭ ރައްޔިތުންނަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ގެދޮރުގެ ކުލި އިންތިހާއަށް ބޮޑުވުމުގެ މައްސަލައެވެ. އާމްދަނީއާ ނުބައްދަލު މިންވަރަކަށް ކުލިތައް އުފުލެމުންދިއުމުގެ ސަބަބުން، ގިނަ އާއިލާތަކަކަށް ވަނީ ދިރިއުޅުމުގެ ޒަރޫރީ ބޭނުންތައް ފުއްދުމުގައި ބޮޑެތި ތާށިކަމަކާ ކުރިމަތިލާންޖެހިފައެވެ. ވަޒީފާއާ ތައުލީމުގެ ބޭނުމަށް ރާއްޖޭގެ އެކި ކަންކޮޅުތަކުން މާލެއަށް ހިޖުރަކުރާ މީހުންގެ އަދަދު އިތުރުވަމުންދާއިރު، އެއާ އެއްވަރަށް ކުލީގެ ބާޒާރު ކޮންޓްރޯލް ކުރެވޭނެ ހަރުދަނާ ނިޒާމެއް ނެތުމަކީ މި މައްސަލަ އިތުރަށް ގޯސްވާން މެދުވެރިވާ މައިގަނޑު ސަބަބެވެ.

​މި މައްސަލައަށް ދާއިމީ ހައްލެއް ހޯދުމަށްޓަކައި ހުޅުމާލެއާއި ގުޅީފަޅު ފަދަ ސަރަހައްދުތަކުން ބޯހިޔާވަހިކަމުގެ ބިޔަ މަޝްރޫއުތައް ހިންގަމުންދިޔަ ނަމަވެސް، ކުލީގެ ބާޒާރަށް އަދިވެސް އެދެވޭ ބަދަލެއް އައިސްފައެއް ނުވެއެވެ. އާންމުންގެ ގިނަ ބަޔަކު ގަބޫލުކުރާ ގޮތުގައި، މިކަމަށް އޮތް އެންމެ އެދެވޭ ހައްލަކީ ގާނޫނީ އޮނިގަނޑެއްގެ ތެރެއިން ކުލި ކޮންޓްރޯލް ކުރެވޭނެ އުސޫލުތަކެއް ކަނޑައެޅުމެވެ. އެހެންނޫންނަމަ، މާލޭ ސަރަހައްދުގެ އިޖުތިމާއީ އަދި އިގްތިސާދީ ފަންތިއަށް މިކަމުގެ ނޭދެވޭ އަސަރު މެދުނުކެނޑި ފޯރަމުންދާނެއެވެ.