އެމްޑީޕީގެ ޗެއަރޕާސަންގެ މަޤާމުގައި ހުންނަވާ ބޭފުޅަކަށް، އެ މަޤާމުގައި ހުންނަވައިގެން ރިޔާސީ އިންތިޚާބުގައި ވާދަނުކުރެއްވޭ ގޮތް ހަދަންޖެހޭ ކަމަށް އެމްޑީޕީގެ ޗެއަރޕާސަންގެ މަޤާމަށް ވާދަކުރައްވާ ގަލޮޅު އުތުރު ދާއިރާގެ މަޖިލިސް މެންބަރު މީކާއީލް އަޙްމަދު ނަސީމް ވިދާޅުވެއްޖެއެވެ.

މީކާއީލް މިހެން ވިދާޅުވީ ސޯޝަލް މީޑިއާގެ މަންސައެއް ކަމަށްވާ "އެކްސް" ގައި ކުރެއްވި ޕޯސްޓެއްގައެވެ. އޭނާ ފާހަގަކުރެއްވި ގޮތުގައި ޕާޓީގެ އެންމެ އިސް އިދާރީ މަޤާމެއްގައި ހުރެ ރިޔާސީ ޕްރައިމެރީއެއްގައި ވާދަކުރުމަކީ އިންސާފުވެރި އިންތިޚާބަކަށް ހުރަސްއެޅިދާނެ ކަމެކެވެ.

ޗެއަރޕާސަންގެ މަޤާމްގައި ހުންނަ ފަރާތަކަށް، އެ މަގާމުގައި ހުރެ، ރިޔާސީ އިންތިހާބަކަށް ކުރިމަތިލެވިގެން ނުވާނެ!

2028ގެ ރިޔަާސީ ޕްރައިމެރީ އަކީ އިންސާފުވެރި އިންތިހާބަކަށް ހަދަން ކުރަންޖެހޭ ހުރިހާ މަސައްކަތެއް ކުރާނަން.#VoteMeekail#Ithubaaru#Meekail4CP pic.twitter.com/Bv5nPFc7OM

— Meekail Naseem (@MickailNaseem) May 21, 2026

މީގެ އިތުރުން މީކާއީލް ވިދާޅުވީ، ކުރިއަށް އޮތް 2028 ވަނަ އަހަރުގެ ރިޔާސީ ޕްރައިމެރީއަކީ އެންމެހައި މެންބަރުންނަށް އިތުބާރު ހުރި އަދި އިންސާފުވެރި އިންތިޚާބަކަށް ހެދުމަށްޓަކައި ކުރަންޖެހޭ ހުރިހާ މަސައްކަތްތަކެއް އޭނާގެ ލީޑަރޝިޕްގެ ދަށުން ކުރައްވާނެ ކަމަށެވެ.

އެމްޑީޕީގެ އެތެރޭގެ ޑިމޮކްރަސީ ވަރުގަދަކޮށް، ހަމަހަމަ ފުރުޞަތުތަކެއް ހޯދައިދިނުމަކީ ޕާޓީގެ ކުރިމަގަށް ކޮންމެހެން ބޭނުންތެރި ކަމެއްކަން ފާހަގަކުރައްވަމުން، އޭނާ ވަނީ "އިތުބާރު" އަދި "ވޯޓް މީކާއީލް" ހޭޝްޓެގްތަކާއެކު ކެމްޕޭން ވަރުގަދަކުރައްވާފައެވެ.