ވ. އަތޮޅު އަލިމަތާ ކައިރީގައި އޮންނަ ފުން ހޮހަޅައަކަށް ފީނަން ގޮސް އުޅުނު އިޓަލީގެ ފަސް ޑައިވަރަކު މަރުވި ހިތާމަވެރި ހާދިސާއާ ގުޅިގެން، ދިވެހިރާއްޖެ އާއި އިޓަލީގެ ކަމާބެހޭ އިދާރާތަކުން ފުޅާ ދާއިރާއެއްގައި ތަހުގީގުތައް ފަށައިފިއެވެ.

މިދިޔަ ބުރާސްފަތި ދުވަހު ހިނގި މި ހާދިސާގައި ގެއްލުނު މީހުންގެ ތެރެއިން އެކެއްގެ ހަށިގަނޑު ހަމަ އެދުވަހު ފެނިފައިވާއިރު، ބާކީ ތިބި ހަތަރު މީހުން ހޯދިފައިވަނީ ރާއްޖޭގެ ސިފައިންނާއި ފުލުހުންގެ އިތުރުން 'ޑޭން ޔޫރަޕް' ޖަމިއްޔާއަށް ނިސްބަތްވާ ފިންލެންޑުގެ ތިން ތަޖުރިބާކާރަކު ގުޅިގެން މިދިޔަ ހޯމަ ދުވަހު ކުރި މަސައްކަތުންނެވެ.

އޭގެ ތެރެއިން ދެ މީހެއްގެ ހަށިގަނޑު އިއްޔެ ވަނީ ގާތްގަނޑަކަށް 200 ފޫޓު އަޑިން، އެ ހޮހަޅައިގެ ތިންވަނަ ޗެމްބަރު ތެރެއިން ނަގާފައެވެ. އަދި ބާކީ ތިބި ދެ މީހުންގެ ހަށިގަނޑު ބޭރަށް ނެގުމުގެ ނުރައްކާތެރި އޮޕަރޭޝަން މިއަދުވެސް ދަނީ ކުރިއަށްދަމުންނެވެ.

އިޓަލީގެ 'އަންސާ' ނޫހުން ރިޕޯޓްކޮށްފައިވާ ގޮތުގައި، އެ ގައުމުގެ ޕްރޮސިކިއުޓަރުން މިހާރު ވަނީ އިހުމާލުން މީހަކު މަރުވުމުގެ މައްސަލައެއްގެ ގޮތުގައި މި ހާދިސާ ތަހުގީގު ކުރަން ފަށާފައެވެ.

މި ތަހުގީގުގެ ދަށުން، މަރުވި ފަސް މީހުންގެ ހަށިގަނޑު އިޓަލީއަށް ގެންގޮސް އޮޓޮޕްސީ ހެދުމަށް ހަމަޖެހިފައިވާއިރު، އެ މީހުން ފީނުމަށް ބޭނުންކުރި 'ޑިއުކް އޮފް ޔޯކް' ސަފާރީގެ ފަރާތްތަކާ ސުވާލުކުރުމަށްވެސް ވަނީ ނިންމާފައެވެ.

މީގެ އިތުރުން ދިވެހި ސަރުކާރުގެ ތަރުޖަމާނު މުހައްމަދު ހުސައިން ޝަރީފް 'އޭޕީ' ނޫސް އެޖެންސީއަށް މައުލޫމާތު ދެއްވަމުން ވިދާޅުވީ، މި ދަތުރު އިންތިޒާމު ކުރި ފަރާތްތަކުން ފުރިހަމަކުރަންޖެހޭ ރޭވުންތަކާއި ރައްކާތެރިކަމުގެ ފިޔަވަޅުތައް އަޅާފައިވޭތޯ ދިވެހި ސަރުކާރުންވެސް ބަލަމުން އަންނަ ކަމަށެވެ.

ޔުނިވަރސިޓީ އޮފް ޖެނޯއާގެ މޮނިކާ މޮންޓެފަލްކޯން އިސްވެ ހުރެ ކުރިއަށްގެންދިޔަ މި ޑައިވިން ޓީމަކީ ސައިންޓިފިކް ދިރާސާއެއްގެ ބޭނުމުގައި ފީނަން އުޅުނު ބައެކެވެ. އޮފިޝަލުން ސިފަކުރައްވާ ގޮތުގައި، އެ މީހުން ފީނި ސަރަހައްދަކީ އިންތިހާއަށް ފުން، އޮއިގަދަ އަދި ހޮހަޅައިގެ ތެރޭގައި ފެންނަ މިންވަރު ސުމަކަށް ތިރިވެފައި އޮތުމުގެ ސަބަބުން ނުހަނު ނުރައްކާތެރި ތަނެކެވެ.

މި ހާދިސާގައި މަރުވެފައިވަނީ ޔުނިވަސިޓީގެ ޕްރޮފެސަރެއް ކަމަށްވާ މޮނިކާ މޮންޓެފަލްކޯން (51އ) އާއި، އޭނާގެ އަންހެން ދަރިފުޅު އަދި ދަރިވަރު ޖޯޖިއާ ސޮމާކަލް (20އ) އާއި، ޔުނިވަސިޓީގެ ދިރާސާވެރިން ކަމަށްވާ މިއުރިއަލް އޮޑެނީނޯ (31އ) އަދި ފެޑެރިކޯ ގުއަލްޓިއޭރީ (31އ) ގެ އިތުރުން ޑައިވިން އިންސްޓްރަކްޓަރު ގިއަންލޫކާ ބެނެޑެޓީ (41އ) އެވެ.

މި ހިތާމަވެރި ހާދިސާއަށް އިތުރު ފުން ހިތާމައެއް ލިބިގެންދިޔައީ، ގެއްލުނު ޑައިވަރުން ހޯދުމުގެ ނުރައްކާތެރި ސަލާމަތީ އޮޕަރޭޝަންގައި އުޅެނިކޮށް، ދިވެހި ސިފައިންގެ (އެމްއެންޑީއެފް) އެންމެ ތަޖުރިބާކާރު އެއް ޑައިވަރު ކަމަށްވާ ސްޓާފް ސާޖަންޓް މުހައްމަދު މަހުދީ ވެސް މިދިޔަ ހޮނިހިރު ދުވަހު ނިޔާވުމާ ގުޅިގެންނެވެ.