ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މާލީ ބަޔާން މިއަދު ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި އާންމު ކޮށްފިއެވެ.

މާލީ ބަޔާނުގައި ވާގޮތުން ރައީސްގެ ބީއެމްއެލްގެ ދިވެހި ރުފިޔާ އެކައުންޓްގައި 184،845.52 ރުފިޔާ ހުރިއިރު ބީއެމްއެލްގެ ސޭވިސް އެކައުންޓްގައި 1،701،470.44 ރުފިޔާ އެބަހުއްޓެވެ. އަދި އިސްލާމިކް ބެންކުގެ ސޭވިންގްސް އެކައުންޓްގައި ވަނީ 1،000 ރުފިޔާ އެވެ.

މީގެ އިތުރުން މޯލްޑިވްސް ފައިނޭންސް އެންޑް ލީސިންގ ކޮމްޕެން ނެގި ލޯނަކަށް މިވަގުތާ ހަމައަށް ނުދެއްކި 1،319،265.13 ރުފިޔާ އޮތް ކަމަށްވެސް މާލީ ބަޔާނުގައިވެއެވެ.

މާލީ ބަޔާނުގައި ވާގޮތުން ވޭތުވެދިޔަ ހަ މަސް ދުވަހު މުސާރައިގެ ގޮތުގައި ރައީސަށް ލިބިވަޑައިގެންފައިވަނީ 282،024.00 ރުފިޔާއެވެ. އަދި ހުޅުމާލޭ ރޯހައުސް އަކުން ކުލީގެ ގޮތުގައި 240،000 ރުފިޔާ ލިބިވަޑައިގެންފައިވެ އެވެ. އަދި މ. ފިޤް އިން 180،000 ރުފިޔާ ލިބިވަޑައިގެންފައިވެއެވެ.

ރައީސްގެ މިލްކިއްޔާތުގައިވާ މ. ދިމްޔާތަކީ ވާރުތައިން ލިބިވަޑަައިގެންފައިވާ ބިމެއްކަން މާލީ ބަޔާނުގައި ފާހަގަކޮށްފައިވެއެވެ. ހުޅުމާލެ އެމްބަރ ޓެރަސް 2 ގެ އަގަކީ 5،919،500.00 ރުފިޔާއެވެ. ހއ. ވަަށަފަރުގައިވާ ރައީސްގެ ދިމްޔާތު ނަމަކަށްކިޔާ ބިމުގެ އަގަކީ 150،000 ރުފިޔާއެވެ. މ. ފިޤްގެ ބައެއް ރައީސަށް ލިބިވަޑައިގެންފައިވަނީ ހިބައިންނެވެ.

މީގެ އިތުރުން 260،000 ރުފިޔާގެ ކާރެއް އެމަނިކުފާނުގެ މިލްކިއްޔާތުގައިވެއެވެ.

ހަމައެއާއެކު ރައީސްގެ އަނބިކަނބަލުން މެޑަމް ސާޖިދާ މުހައްމަދަށް އެލަވަންސްގެ ގޮތުގައި 199،99.98 ރުފިޔާ ލިބިވަޑައިގެންފައިވެއެވެ. އަދި އެކަމަނާއަށް ދިމްޔާތު ޕްރައިވެޓް ލިމިޑެޓުން މުސާރައިގެ ގޮތުގައި 78،000 ރުފިޔާ ލިބިވަޑައިގެންފައިވެއެވެ. މީގެ އިތުރުން މިނިސްޓްރީ އޮފް ހެލްތު، ފެމިލީ އެންޑް ވެލްފެއަރގެ ކޮންސަލްޓަންޓްގެ މަގާމުގައި ހުންނެވުމުން މުސާރައިގެ ގޮތުގައި ހަ މަސްދުވަސްތެރޭ 4،927.32 ރުފިޔާ ލިބިވަޑައިގެންފައިވެއެވެ.

މިއަދު އާއްމު ކޮށްފައިވާ ނައިބު ރައީސްގެ މާލީ ބަޔާނުގައިވާ ގޮތުން އެމަނިކުފާނަށް މިދިޔަ ހަ މަސްދުވަހުގެ ތެރޭގައި މުސާރައިގެ ގޮތުގައި 314،664 ރުފިޔާ ލިބިފައިވެއެވެ. ނައިބުރައީސްގެ ބީއެމްއެލް އެކައުންޓުގައި 8،390 ރުފިޔާ އަދި އިސްލާމިކް ބޭންކުގައި ހުރީ 39 ރުފިޔާއެވެ. އޭގެއިތުރުން އިސްލާމިކް ބޭންކުގެ ޑޮލަރު އެކައުންޓުގައި 397 ޑޮލަރު އެބަހުއްޓެވެ.