ފްލައިޓްރޭޑަރ24 ގެ ތަފާސްހިސާބުތަކުން ދައްކާ ގޮތުގައި، ޕާޝިއަން ގަލްފް ސަރަހައްދުން އީރާނާ ކައިރިން ދަތުރުކުރަމުންދިޔަ އެމެރިކާގެ އެއާފޯސްގެ ކޭސީ-135 މަރުކާގެ ބޯޓަކުން ކުއްލި ހާލަތު އަންގައިދޭ "7700" އިމަޖެންސީ ސިގްނަލް ފޮނުވައިފިއެވެ.

ޔުނައިޓެޑް އެރަބް އެމިރޭޓްސްގެ އަލް ދާފްރާ އެއާބޭހުން ފުރައިގެން ދަތުރުކުރި މި ބޯޓުގެ ސިގްނަލް ކެނޑިފައިވަނީ ގަތަރުގެ މަތިން ދަތުރުކުރަމުން ދަނިކޮށް ކަމަށް ރިޕޯޓްތައް ބުނެއެވެ.

ފްލައިޓް ޑޭޓާތަކުން ފެންނަ ގޮތުގައި، ބޯޓުގެ އުސްމިން ދަށްކުރުމުގެ ކުރިން އެ ސަރަހައްދުގެ ވައިގެ ތެރޭގައި ބޯޓު ވަނީ ބުރުޖަހާފައެވެ. ނަމަވެސް، މި ހާދިސާ ދިމާވާން މެދުވެރިވި ސީދާ ސަބަބެއް އަދި މިހާތަނަށް ކަށަވަރު ކުރެވިފައެއް ނުވެއެވެ.

މި ހާދިސާއާ ގުޅޭގޮތުން އީރާނުގެ ފާރްސް ނިއުސް އެޖެންސީން ވެސް ރިޕޯޓްކޮށްފައިވާއިރު، އެމެރިކާގެ އަސްކަރިއްޔާއިން ނުވަތަ އީރާނުގެ ރަސްމީ ފަރާތަކުން ވެސް އަދި މިހާތަނަށް ވަކި އެއްޗެއް ބުނެފައެއް ނުވެއެވެ.

ކޭސީ-135 އަކީ އެމެރިކާގެ އެއާފޯސްއިން ދުރު ރާސްތާގެ އަސްކަރީ މިޝަންތަކުގައި ބޭނުންކުރާ، ވައިގެ ތެރޭގައި ތެޔޮ އެޅުމުގެ ގާބިލުކަން ލިބިފައިވާ ހަތަރު އިންޖީނުލީ މަތިންދާބޯޓެކެވެ.

މި ހާދިސާ ހިނގާފައި މިވަނީ ސަރަހައްދީ މަސްލަހަތު ނުތަނަވަސްވެފައިވާ ދަނޑިވަޅެއްގައެވެ.