ރޭ މާލެ ސަރަހައްދަށް ކުރި ވިއްސާރައިގައި ހުޅުމާލެއަށް ވަރަށް ބޮޑަށް ހޮނުއަޅައި، އެ ސަރަހައްދުގެ ދިރިއުޅޭ ރައްޔިތުންގެ މެދުގައި ބޮޑު ބިރުވެރިކަމެއް އުފެދިއްޖެއެވެ.

"ރަސް އޮންލައިން" އަށް މައުލޫމާތު ދިން ހުޅުމާލޭގެ ގިނަ އަދަދެއްގެ އާންމުން ވަނީ މިރޭ ތަޖުރިބާ ކުރަންޖެހުނު ނުރައްކާތެރި ހާދިސާގެ ތަފްސީލްތައް ހިއްސާކޮށްފައެވެ.

ހުޅުމާލޭގެ ދެވަނަ ފިޔަވަހީގައި ދިރިއުޅެމުންދާ މީހަކު ކިޔައިދިން ގޮތުގައި، މިރޭ އެޅި ހޮނުތަކަކީ އޭނާގެ މުޅި ހަޔާތުގައިވެސް ތަޖުރިބާކުރި އެންމެ ބާރުގަދަ އަދި އެންމެ ނުރައްކާތެރި ހޮނުތަކެވެ.

އޭނާ ސިފަކުރި ގޮތުގައި މީގެ ކުރިން މިފަދަ ބާރުގަދަ އަޑުފަށަކާއެކު ގުގުރައި، ހޮނު އެޅި މަންޒަރެއް ދެކެފައެއް ނުވެއެވެ. މި ހާދިސާގެ ސަބަބުން ގިނަ ބަޔަކަށް ނަފްސާނީ ގޮތުންވެސް ބޮޑު ސިހުމެއް ލިބިފައިވާކަން އޭނާ ފާހަގަކުރިއެވެ.

މީގެ އިތުރުން، މި ހާދިސާ ދިމާވި ވަގުތު ހުޅުމާލޭގައި ހުރި އެހެން މީހަކު މައުލޫމާތު ދެމުން ބުނީ، ހޮނު އެޅި ވަގުތު އިވުނު ގަދަ އަޑުފަށްގަނޑާއެކު މުޅި ސަރަހައްދު ގުގުމައިގެން ދިޔަ ކަމަށެވެ.

އަދި އެ ވަގުތު އެ ސަރަހައްދުގައި ހުރި ބައެއް ބޮޑެތި އިމާރާތްތަކަށް ލޮޅުން އަރައި، ބިންގަނޑު ގުޑައިގެން ދިޔަ ކަމުގެ އިހުސާސް ކުރެވުނު ކަމަށްވެސް އޭނާ ބުންޏެވެ.

މި ބާރުގަދަ ގުގުރުމާއެކު ބައެއް ތަންތަނުން އަލިފާން ކަނި ބުރައިގެން ދިޔަ މަންޒަރު ފެނުމަކީ ލިބުނު އިތުރު ބިރުވެރިކަމެއްގެ ގޮތުގައި އާންމުން ސިފަކުރެއެވެ.

މިރޭ ކުރި ވިއްސާރައިގައި ހުޅުމާލޭގެ އެކި ސަރަހައްދުތަކަށް ހޮނު އެޅުމުގެ ސަބަބުން ބައެއް އިލެކްޓްރޯނިކް ސާމާނުތަކަށް ގެއްލުން ލިބިފައިވާ ކަމުގެ މައުލޫމާތު ލިބެމުންދާއިރު، ކަމާބެހޭ އިދާރާތަކުން އަދި މިކަމާ ގުޅޭ ރަސްމީ ތަފްސީލެއް ހާމައެއް ނުކުރެއެވެ.

ނަމަވެސް، މޫސުން ގޯސްވެ ގުގުރާ ވަގުތުތަކުގައި ކަރަންޓު ސާމާނު ބޭނުންކުރުމުގައި ސަމާލުވުމަށް ކަމާބެހޭ ފަރާތްތަކުން އަބަދުވެސް އިރުޝާދު ދެމުންދެއެވެ.