ދިވެހިރާއްޖޭގެ ގައުމީ ނިޒާމަށް ބޮޑެތި ބަދަލުތަކެއް ގެންނަންޖެހިފައިވާ ކަމަށާއި، އެ އިސްލާހީ ބަދަލުތައް ގެނައުމުގެ ގާބިލުކަމާއި ސިޔާސީ ބާރުވެރިކަން ހުރި ހަމައެކަނި ބޭފުޅަކީ ކުރީގެ ރައީސް މުހައްމަދު ނަޝީދު ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.

އެމްޑީޕީގެ އެތެރޭގެ އިންތިޚާބުގެ ފޯރިގަދަވެފައިވާ މި ދަނޑިވަޅުގައި، ރައީސް ނަޝީދާއެކު އައްޑޫ ސިޓީއަށް ކުރައްވަމުންދާ ކެމްޕެއިން ދަތުރުފުޅުގެ ތެރެއިން ބޭއްވި ބައްދަލުވުމެއްގައި ވާހަކަދައްކަވަމުން ފައްޔާޒް ވިދާޅުވީ، ކޮންމެ ފަހަރަކު ސަރުކާރު ބަދަލުވާއިރު ރައްޔިތުންގެ އަސާސީ ހައްގުތައް ނިގުޅައިގަނެވޭ ގޮތަށް އޮތް އޮތުން ނިމުމަކަށް ގެންނަން ޖެހޭ ކަމަށެވެ. އަދި ޑިމޮކްރަސީ ގަބޫލުނުކުރާ ބަޔަކު ވޯޓުފޮށި މެދުވެރިކޮށް ވެރިކަމަށް އައިސް، ރައްޔިތުންގެ ހައްގުތަކަށް އަރައިގަތުން ހުއްޓުވުމަށްޓަކައި ގާނޫނުއަސާސީއަށް ޖޯހަރީ ބަދަލުތަކެއް ގެންނަންޖެހޭ ކަމަށް އޭނާ ފާހަގަކުރެއްވިއެވެ.

ފައްޔާޒް ހުށަހެޅުއްވި "ބޮޑު ބަދަލު" ތަކުގެ ތަފްސީލަށް ބަލާއިރު، އެންމެ މުހިންމު ކަމެއްގެ ގޮތުގައި އޭނާ ފާހަގަކުރެއްވީ ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިކުރުމެވެ. މިހާރުގެ ނިޒާމު އޮތްގޮތުން ރައީސުލްޖުމްހޫރިއްޔާއަށް އޮންނަ ބާރުތައް ބޮޑުކަން ފާހަގަކުރައްވައި ފައްޔާޒް ވިދާޅުވީ، އެ ބާރުތަކަކީ "ބޮޑުރަސްގެފާނަކަށްވުރެ ވެސް ބޮޑު" ބާރުތަކެއް ކަމަށާއި، އެ ބާރުތައް ދައުލަތުގެ އެކި މުއައްސަސާތަކުގެ މެދުގައި ބަހާލަން ޖެހޭ ކަމަށެވެ.

މީގެ އިތުރުން، މިނިވަން މުއައްސަސާތަކާއި ސުޕްރީމް ކޯޓުގެ ފަނޑިޔާރުން ވަކިކުރުމުގެ ބާރު ހަމައެކަނި ސިޔާސީ މީހުންގެ އަތްމަތީގައި އޮތުމުގެ ބަދަލުގައި، އެކަން ކުރެވޭނީ ރައްޔިތުންގެ ސީދާ ވޯޓަކުން ނުވަތަ ރިފަރެންޑަމްއަކުން ކަމަށް ކަނޑައަޅަންޖެހޭ ކަމަށްވެސް އޭނާ ވިދާޅުވިއެވެ. އަދި ގައުމުގެ ދަރަނި ނެގުމާއި ބަޖެޓުގެ ކަންކަމުގައި ހަމައެކަނި ރައްޔިތުންގެ މަޖިލީހުގެ މެޖޯރިޓީއަށް ބަރޯސާވުމުގެ ބަދަލުގައި، ރަށްރަށުގެ ކައުންސިލަރުންގެ ބަސް ހޯދަންޖެހޭ ގޮތަށް ނިޒާމު ބަދަލުކުރަންޖެހޭ ކަމަށް ފައްޔާޒް ވިދާޅުވިއެވެ.

ރައްޔިތުންގެ މަޖިލީހުގެ މެންބަރުންގެ އަދަދު ކޮންޓްރޯލް ކުރުމާ ގުޅޭގޮތުން ވާހަކަދައްކަވަމުން ފައްޔާޒް ހުށަހެޅުއްވީ، މަޖިލިސް މެންބަރުންގެ އަދަދު ވަކިވަރެއްގައި ހިފަހައްޓައި (ކެޕްކޮށް)، ކޮންމެ އަތޮޅަކުން މަދުވެގެން އެއް އަންހެން މެންބަރަކު ހުންނަންޖެހޭ ގޮތަށް ގާނޫނު ބަދަލުކުރުމަށެވެ.

މި ހުރިހާ ބަދަލުތަކެއް ގެނައުމަށްޓަކައި ރައީސް ނަޝީދުގެ ތާއީދަށް އެދިވަޑައިގަންނަވަމުން ފައްޔާޒް ވިދާޅުވީ، ޗެއާޕާސަން ކަމަށް ވާދަކުރައްވާ މީކާއިލް އަހުމަދު ނަސީމަކީ ގާބިލު ބޭފުޅެއް ނަމަވެސް، މިފަދަ ބޮޑު އިސްލާހީ މަސައްކަތެއް ކުރެވޭނެ ސިޔާސީ ބާރުވެރިކަން ހުރީ ރައީސް ނަޝީދުގެ ކިބައިގައި ކަމަށެވެ.

"މިއީ ހަމައެކަނި އެމްޑީޕީގެ ވެރިކަމެއް ހޯދުމަށް ކުރާ މަސައްކަތެއް ނޫން. މިއީ ކޮންމެ ބަޔަކު ވެރިކަމަށް އައި ނަމަވެސް ރައްޔިތުންގެ ހައްގުތައް ހިމާޔަތްކުރެވޭނެ ފަދަ ވަރުގަދަ ނިޒާމެއް ގާއިމްކުރުމަށް ކުރާ މަސައްކަތެއް،" ފައްޔާޒް ވިދާޅުވިއެވެ.

ފައްޔާޒްގެ ވާހަކަ ނިންމާލަމުން ފާހަގަކުރެއްވީ، ވެރިކަން ކުރާ ފަރާތްތަކުގެ ބާރުތައް ހިފެހެއްޓި، ރައްޔިތުންގެ ހައްގުތައް ކަށަވަރުވާނެ ފަދަ ނިޒާމެއްގެ ދަށުން ގައުމު އާ މިސްރާބަކަށް ގެންދިއުމަށް އެމްޑީޕީން ބޮޑު ވަކާލާތަކަށް ނުކުންނަން ޖެހިފައިވާ ކަމަށެވެ.