މެދުއިރުމަތީގައި އުފެދިފައިވާ ހަނގުރާމައިގެ ނުތަނަވަސްކަމުގެ ތެރެއިން، އެމެރިކާގެ ރައީސް ޑޮނަލްޑް ޓްރަމްޕް އީރާނަށް ވަރުގަދަ އިންޒާރެއް ދެއްވައިފިއެވެ. ރައީސް ޓްރަމްޕް ވިދާޅުވީ، އީރާނުން ޤަތަރާ ދެކޮޅަށް އެއްވެސް އަސްކަރީ ހަމަލާއެއް ދީފިނަމަ، އީރާނާއި ޤަތަރު ހިއްސާކުރާ ދުނިޔޭގެ އެންމެ ބޮޑު ގުދުރަތީ ގޭސް ފީލްޑް ކަމަށްވާ "ސައުތު ޕާސް" ގޮއްވާލާނެ ކަމަށެވެ.

މި މައްސަލަ ހޫނުވެގެން ދިޔައީ އިސްރާއީލުން އީރާނުގެ ސައުތު ޕާސް ގޭސް ފީލްޑަށް ދިން ހަމަލާއަކާ ގުޅިގެންނެވެ. އެހެންނަމަވެސް، ރައީސް ޓްރަމްޕް ވަނީ އެ ހަމަލާއަކީ އެމެރިކާގެ އެންގުމަކަށް ނުވަތަ އެމެރިކާގެ ބައިވެރިވުމެއް އޮވެގެން ދިން ހަމަލާއެއް ނޫން ކަމަށް ވިދާޅުވެފައެވެ. މި ހަމަލާގެ ރައްދުގައި އީރާނުން ވަނީ ޤަތަރާ ކައިރީގައިވާ ގަލްފް ސަރަހައްދުގެ ހަކަތައާ ގުޅުންހުރި މުހިންމު މަރުކަޒުތަކަށް އަމާޒުކޮށް ހަމަލާތަކެއް ދީފައެވެ. މިއާއެކު ސަރަހައްދީ ހަމަނުޖެހުން އިތުރަށް ފުޅާވެދާނެ ކަމުގެ ބިރު ވަނީ ބޮޑުވެފައެވެ.

ސައުތު ޕާސް ގޭސް ފީލްޑަކީ ދުނިޔޭގެ ހަކަތަ ފޯރުކޮށްދިނުމުގައި ވަރަށް މުހިންމު ދައުރެއް އަދާކުރާ ތަނެކެވެ. އީރާނުން ބޭނުންކުރާ ގޭހުގެ ގާތްގަނޑަކަށް %70 އާއި %75 އާ ދެމެދުގެ މިންވަރެއް އުފައްދަނީ މި ފީލްޑުންނެވެ. އީރާނުން މި ތަނަށް "ސައުތު ޕާސް" ގެ ނަމުން މުޚާޠަބު ކުރާއިރު، ޤަތަރުން މި ފީލްޑަށް ކިޔަނީ "ނޯތު ޑޯމް" ނުވަތަ "ނޯތު ފީލްޑް" އެވެ. މިއީ އޭޝިއާގެ ގައުމުތަކަށާއި ދުނިޔޭގެ އެކި ސަރަހައްދުތަކަށް ގޭސް ފޯރުކޮށްދޭ މައިގަނޑު މަޞްދަރެވެ.

ރައީސް ޓްރަމްޕްގެ ވާހަކަފުޅުގައި، އީރާނުން ހާލަތު އިތުރަށް ގޯސް ނުކޮށްފިނަމަ އިސްރާއީލުން އިތުރު ހަމަލާތަކެއް ނުދޭނެ ކަމަށް އިޝާރާތް ކުރެއްވިއެވެ. މި މެސެޖުން ދޭހަވަނީ މަސްލަހަތު ހިމާޔަތްކުރުމަށް ޓްރަމްޕް ކޮންމެސް ވަރަކަށް ޖެހިލުންވާން ފަށާފައިވާ ކަމެވެ. ޚާއްޞަކޮށް، އެމެރިކާގެ އަސްކަރީ އަދި ހަކަތައިގެ މުހިންމު މަސްލަހަތުތަކެއް އޮތް ޤަތަރު ދިފާއުކުރުމަށް އެމެރިކާ ތައްޔާރަށް އޮތްކަން ޓްރަމްޕް ވަނީ ހާމަކުރަށްވާފައެވެ.

މި ހަމަނުޖެހުންތަކުގެ ސަބަބުން ދުނިޔޭގެ ހަކަތައިގެ ބާޒާރު ވަނީ ނާޒުކު ފައްތަރެއްގައެވެ. ގޭސް ފޯރުކޮށްދިނުމަށް ބުރޫ އަރައިފިނަމަ، ތެލުގެ އަގު އުފުލި، ކަރަންޓު އުފެއްދުމަށާއި ދުނިޔޭގެ ސިނާއީ މަސައްކަތްތަކަށް ބޮޑެތި ގެއްލުންތަކެއް ލިބޭނެއެވެ. ކުރިއަށް އޮތް ދުވަސްތަކަކީ މި ކުރިމަތިލުންތައް ފިނިވެގެންދާނެތޯ ނުވަތަ މިއަށްވުރެ ނުރައްކާތެރި މަރުހަލާއަކަށް ބަދަލުވެގެންދާނެތޯ ކަނޑައެޅޭނެ މުހިންމު ދުވަސްތަކެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.