އަވަށްޓެރި ގައުމުތަކަށް ދެން ހަމަލާ ނުދޭނެކަމުގެ ޔަގީންކަން އީރާނުގެ ރައީސް މަސްއޫދު ޕެޒެޝްކިއަން ދެއްވައިފިއެވެ.

އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމަ ދެވަނަ ހަފްތާއަކަށް ދެމިގެން ގޮސްފައިވާއިރު، މަސްއޫދު ވަނީ އެހެން ގައުމަކުން އީރާނަށް ހަމަލާއެއް އަތުވެއްޖެނަމަ، ވަރުގަދަ ރައްދެއް ދޭނެކަމުގެ އިންޒާރުވެސް ދެއްވާފައެވެ.

ރައީސް މަސްއޫދު ވިދާޅުވީ، މި ނިންމުމަކީ އީރާނުގެ އިންތިގާލީ ލީޑަރޝިޕް ކައުންސިލުން ފާސްކޮށްފައިވާ ނިންމުމެއް ކަމަށެވެ. ވޭތުވެދިޔަ ދުވަސްތަކުގައި އަވަށްޓެރި ގައުމުތަކަށް ދެވުނު ހަމަލާތަކާ ގުޅިގެން ރައީސް ވަނީ އެ ގައުމުތަކުގެ ކިބައިން މައާފަށް އެދިވަޑައިގެންފައެވެ.

ސައުދީ އަރަބިއްޔާ، ގަތަރު، ޔޫއޭއީ، ކުވެއިތު، ބަހްރޭން އަދި އޮމާން ފަދަ ޖީސީސީގެ ގައުމުތަކަށް އީރާނުން ހަމަލާދީފައިވަނީ އެ ގައުމުތަކުގައި އެމެރިކާގެ އަސްކަރީ ވަސީލަތްތައް ހުރުމުގެ ސަބަބުން ކަމަށް އީރާނުން ބުނެއެވެ. މީގެ އިތުރުން އިރާގު، އުރުދުން، އަޒަރުބައިޖާން އަދި ތުރުކީއަށްވެސް މި ހަމަލާތަކުގެ ނޭދެވޭ އަސަރު ވަނީ ކޮށްފައެވެ.

މި ހަމަލާތަކުގެ ސަބަބުން ގަލްފް ސަރަހައްދުގެ ގައުމުތަކުން މީހުން މަރުވެ، މުދަލަށް ބޮޑެތި ގެއްލުންތަކެއް ލިބިފައިވެއެވެ. އަދި ވައިގެ ދަތުރުފަތުރުތަކަށް ބުރޫއަރައި، ދުނިޔޭގެ ބާޒާރުގައި ތެލާއި ގޭސް އުފެއްދުމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. މިއީ މުޅި ސަރަހައްދުގެ އިގްތިސާދަށް ލިބުނު ބޮޑު ލޮޅުމެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.

މިކަމާ ގުޅިގެން ގަތަރުގެ އެނާޖީ މިނިސްޓަރު ސައުދު އަލް-ކާބީ ވިދާޅުވީ، އީރާނާ ދެކޮޅަށް ކުރާ ހަނގުރާމަ އިތުރަށް ވަރުގަދަވެގެންދާނަމަ، މަދު ހަފްތާތަކެއްގެ ތެރޭގައި ގަލްފް ސަރަހައްދުން ބޭރުކުރާ ހަކަތައިގެ ބާވަތްތައް މެދުކެނޑިގެން ހިނގައިދާނެ ކަމަށެވެ. މީގެ ސަބަބުން ދުނިޔޭގެ އިގްތިސާދީ ކުރިއެރުމަށް ހުރަސްއެޅި، ހަކަތައިގެ އަގު އިންތިހާއަށް އުފުލި، ދުނިޔޭގެ އުފެއްދުންތެރިކަމަށް ބޮޑެތި ދަތިތަކެއް ކުރިމަތިވާނެ ކަމަށްވެސް އޭނާ ފާހަގަކުރެއްވިއެވެ.