ފަރުބަދައެއްގެ މަތީގައި އޮތް ކޯރަކުން ހިޔަޅެއް ފެން ބޯން ހުއްޓައި، އެ ކޯރުގެ ތިރީގައި އޮތް ވާދީއެއްގެ ތެރޭގައި ކުޑަ ކަންބަޅިބަކަރިއެއް ފެން ބޯން ހުއްޓާ އޭނާއަށް ފެނުނެވެ.

ހިޔަޅު ކޯރުގެ ތިރިއަށް ފައިބައިގެން ގޮސް، އެ ކަންބަޅިބަކަރިއާ އަރާ ހަމަކުރިއެވެ. ކަންބަޅިބަކަރި ޝިކާރަކޮށްލުމަށްޓަކައި ބަހަނާއެއް ހޯދަމުން ހިޔަޅު ބުންނެވެ. "ތިޔަ ފެން ބޮނީ އަހަރެންގެ ކޯރުންނެވެ. ތިޔަ ކުރަނީ އަހަރެން ބޯން ހުރި ފެންގަނޑު ތަޣައްޔަރެވެ"

"އޭ ހިޔަޅާއެވެ! އަހަރެން ތިޔަ ފެންގަނޑު ނުތާހިރު ކުރާނީ ކިހިނެއް ހެއްޔެވެ؟" ކަންބަޅިބަކަރި އިއުތިރާޒު ކުރިއެވެ. "އަހަރެން މިހުރީ ވާދީގެ ތިރީގައެވެ. ތިޔަބޭފުޅާ ފެން ތިޔަ ބޯލައްވަނީ ފަރުބަދަމަތީގެ މަތީ ހިސާބަކުންނެވެ."

ކަންބަޅިބަކަރި އެ ބުނީ ތެދު ވާހަކައެއް ކަމުން ހިޔަޅު ކުޑަކޮށް ހައިރާންވިއެވެ. އެހެންކަމުން، އެ ސޮރުގެ ގަޔަށް ޖެހިގަތުމަށްޓަކައި އެހެން ބަހަނާއެއް ބޭނުންވިއެވެ.

"މީގެ ތިން މަސް ކުރިން އަހަރެން ގަހެއްގެ ހިޔަލުގައި ގަދައަށް ނިދާފައި އޮއްވައި، ތިޔަ ސޮރު 'ބޭ' 'ބޭ' ކިޔައިގެން އެހާ ބާރަށް ހަޅޭއްލެވުމުގެ ސަބަބުން އަހަރެންގެ ނިދި ގެއްލި، މުޅި ދުވަސް ހަލާކުވެގެން ދިޔައެވެ،" ހިޔަޅު ބުންޏެވެ.

"އަހަރެންގެ އުމުރަކީ އެންމެ ދެ މަސް ދުވަހެވެ. ވީއިރު މީގެ ތިން މަސް ކުރިން އަހަރެން ތިޔަބޭފުޅާގެ ނިދި ހަރާބުކުރާނީ ކިހިނަކުން ހެއްޔެވެ؟" ވިސްނުން ތޫނު ކުޑަ ކަންބަޅިބަކަރި ޖަވާބުދިނެވެ.

މިހާރު ހިޔަޅު ހުރީ ގޮތް ހުސްވެފައެވެ. އޭނާ ދެއްކި އެއްވެސް ވާހަކައެއްގައި ބުއްދިވެރިކަމެއް ނެތެވެ. ނަމަވެސް އޭނާގެ ނުބައި ރޭވުން ފުރިހަމަކުރުމަށްޓަކައި ކޮންމެވެސް އެހެން ބަހަނާއެއް ދައްކަން އޭނާ ބޭނުންވިއެވެ.

"އެހެންވީމާ އެއީ 'ބޭ' 'ބޭ' ކިޔައި އަހަރެންގެ ނިދި ނަގާލި ތިޔަ ސޮރުގެ ބޮޑުބޭބެއެވެ."

މިހެން ބުނެ، ހިޔަޅު އެ ކުޑަ ކަންބަޅިބަކަރީގެ ގަޔަށް ފުންމައިގަނެ، އޭގެ ވަރުގަދަ ދަތްތަކުން އެ ސޮރު ހިފައިގަނެގެން ގަސްތަކުގެ ތެރެއަށް ދަމާފައި ގެންގޮސްފިއެވެ.

އަނިޔާވެރިއަކަށް އޭނާގެ އަނިޔާވެރިކަން އެހެންމީހަކަށް ދެއްކުމަށް އެއްވެސް އުޒުރެއް ނުވަތަ ބަހަނާއެއް ބޭނުމެއް ނުވާނެއެވެ!