އިރާނާ ދެކޮޅަށް ދެމުންދާ ހަމަލާތަކުގައި ސައުދީގެ ވައިގެ ސަރަހައްދާއި، ކަނޑުގެ ސަރަހައްދު ނުވަތަ ބިން ބޭނުންކުރުމުގެ ހުއްދަ ނުދޭނެކަމަށް ސަޢުދީ ސަރުކާރުން ހާމަކުރުމުން ސައުދީ އަރަބިއްޔާގައި ހުންނަވާ އިރާނުގެ ސަފީރު އަލީރެޒާ އިނާޔަތީ، އެކަމަށް މަރުހަބާ ވިދާޅުވެއްޖެއެވެ.

އޭއެފްޕީ ނިއުސް އެޖެންސީއަށް ދެއްވި ބަސްދީގަތުމެއްގައި ސަފީރު އިނާޔަތީ ވިދާޅުވީ، އީރާންގެ އިސްލާމީ ޖުމްހޫރިއްޔާއަށް ޙަމަލާދިނުމަށް ސައުދީގެ އެއްވެސް ސަރަހައްދެއް ބޭނުން ކުރުމުގެ ފުރުސަތު ނުދޭނެކަމަށް ސައުދީން ތަކުރާރުކޮށް ބުނަމުންދާ ބުނުމަށް އިރާނުން ވަރަށް ބޮޑަށް އިހުތިރާމްކުރާ ކަމަށެވެ. މިއީ އިޒްރޭލާއި އެމެރިކާއިން އިރާނަށް ދީފާނެ އިތުރު ހަމަލާއަކަށް އަމާޒުކޮށް ސައުދީން ނިންމާފައިވާ މުހިންމު ނިންމުމެއްކަން އޭނާ ފާހަގަކުރެއްވިއެވެ.

މި ހަމަލާތައް ފެށުމުގެ ކުރިންވެސް، ތެހެރާނާއި ވޮޝިންގޓަނާ ދެމެދު އޮތް ނުތަނަވަސްކަން ކުޑަކުރުމަށް ސައުދީ އަރަބިއްޔާއިން ވަނީ ޑިޕްލޮމެޓިކް ގިނަ މަސައްކަތްތަކެއް ކޮށްފައެވެ. އަދި އެ ދުވަސްވަރުވެސް ސައުދީން ވަނީ އިރާނަށް ހަމަލާދިނުމަށް އެގައުމުގެ ވައިގެ ސަރަހައްދު ބޭނުންކުރަން ފުރުސަތު ނުދޭނެކަން ކަށަވަރުކޮށްދީފައެވެ.

އެގޮތުން ސައުދީ އަަރަބިއްޔާގެ ވަލީއަހުދު މުޙައްމަދު ބިން ސަލްމާން، އީރާނުގެ ރައީސް މަސްއޫދު ޕެޒެޝްކިއަންއާ ފޯނުން ގުޅުއްވައި، އީރާނާ ދެކޮޅަށް ހިންގާ އެއްވެސް އަސްކަރީ ހަރަކާތަކަށް ސައުދީގެ ވައިގެ ސަރަހައްދު ނުވަތަ ބިން ބޭނުންކުރުމުގެ ފުރުސަތު ނުދޭނެ ކަމުގެ ޔަގީންކަން ވަނީ ދެއްވައިފައެވެ.

މި ނިންމުމުގެ ސަބަބުން ސަރަހައްދީ ހަމަޖެހުމަށް ބާރު ލިބިގެންދާނެ ކަމަށް އިރާނުން ގަބޫލުކުރެއެވެ. ސައުދީން މިފަދަ ނިންމުމެއް ނިންމާފައިވަނީ މެދުއިރުމަތީގެ މަސްރަހު ނުތަނަވަސްވެ ހަނގުރާމަ ހޫނުވެފައިވާ ދަނޑިވަޅެއްގައެވެ.