ބަރުދަން ލުއިކުރުމަށް ދުނިޔޭގެ އެކި ކަންކޮޅުތަކުގައި ބޭނުންކުރަމުން އަންނަ "ޖީ.އެލް.ޕީ-1" އިންޖެކްޝަންތައް ބޭނުންކުރުން ހުއްޓާލުމުން، ލުއިވި ބަރުދަން ވަރަށް އަވަހަށް އަނބުރާ އަންނަކަން އާ ދިރާސާއަކުން ހާމަވެއްޖެއެވެ.

އޮކްސްފޯޑް ޔުނިވަރސިޓީ އިން ކުރިއަށްގެންދިޔަ މި ދިރާސާއާބެހޭގޮތުން ދިރާސާވެރިންނާ ހަވާލާދީ "ދަ ބްރިޓިޝް މެޑިކަލް ޖަރނަލް" ގައި ބުނެފައިވާގޮތުން މިދިރާސާ ކުރެވުނު ތަހުލީލުތައް ބިނާވެފައިވަނީ ބަރުދަން ލުއިކުރާ ބޭސްތައް ބޭނުންކުރުން ހުއްޓާލުމަށްފަހު ހަށިގަނޑަށް އަންނަ ބަދަލުތައް ބެލުމަށް ހެދި 37 ކްލިނިކަލް ޓްރަޔަލްއެއްގެ މައްޗަށެވެ. މި ޓްރަޔަލްތަކުގައި 9,000 އަށްވުރެ ގިނަ މީހުން ބައިވެރިވެފައިވެއެވެ. ދިރާސާއިން ދައްކާގޮތުގައި، އޮޒެމްޕިކް އަދި މޮންޖާރޯ ފަދަ އިންޖެކްޝަންތައް ހުއްޓާލާތާ އެއް އަހަރު ދުވަހުގެ ތެރޭގައި، ގިނަ މީހުންގެ ބަރުދަން ކުރިން ހުރިވަރަށްވުރެ ވެސް އިތުރުވެގެންދެއެވެ.

އާންމުގޮތެއްގައި މި ބޭސްތައް ހުއްޓާލުމުން މަހަކު 0.4 ކިލޯގެ ރޭޓުން ބަރުދަން އިތުރުވާކަމަށް ދިރާސާއިން ދައްކައެވެ. އަދި ގިނަ މީހުން 1.7 އަހަރުގެ ތެރޭގައި ކުރިން ހުރި ބަރުދަނަށް އެނބުރިދެއެވެ. ނަމަވެސް، ސެމަގްލޫޓައިޑް އަދި ޓިރްޒެޕަޓައިޑް ފަދަ އާ ބޭސްތައް ބޭނުންކުރާ މީހުންގެ ބަރުދަން އިތުރުވާ މިންވަރު މިއަށްވުރެ އަވަސް ކަމަށް ދިރާސާއިން ވަނީ ހާމަވެފައެވެ. އެގޮތުން އެފަދަ މީހުންގެ ބަރުދަން މަހަކު 0.8 ކިލޯގެ ރޭޓުން އިތުރުވާކަން ވަނީ ފާހަގަކުރެވިފައެވެ.

މިކަމާ ގުޅޭ އެންމެ މުހިންމު އެއް ހެއްކަކީ "ސްޓެޕް-1 އެކްސްޓެންޝަން ޓްރައިލް" އެވެ. މި ދިރާސާގައި ބައިވެރިވި މީހުން 68 ހަފުތާގެ ތެރޭގައި އެމީހުންގެ ހަށިގަނޑުގެ ބަރުދަނުން 17.3 އިންސައްތަ ލުއިކުރިއެވެ. ނަމަވެސް ބޭސް ހުއްޓާލުމާއެކު، އޭގެ ތެރެއިން ގާތްގަނޑަކަށް ދެބައިކުޅަ އެއްބަޔަށްވުރެ ގިނަ ބަރުދަން އަހަރެއްގެ ތެރޭގައި ވަނީ އިތުރުވެފައެވެ. ބަރުދަން އިތުރުވުމާއެކު، ބޭސް ބޭނުންކުރި ދުވަސްވަރު ރަނގަޅުވި ލޭގެ ޕްރެޝަރާއި، ކޮލެސްޓްރޯލް އަދި ހަކުރުގެ މިންވަރުވެސް ވަނީ އަނބުރާ ގޯސްވާން ފަށާފައެވެ.

ސައިންސުވެރިން ބުނާ ގޮތުގައި މި އިންޖެކްޝަންތަކަކީ ސިކުނޑިއަށް ބަނޑުހައިކަން އިހުސާސްވިޔަނުދީ، ބަނޑު ފުރިފައި ހުންނަ ކަމުގެ ސިގްނަލް ފޮނުވައިދޭ އެއްޗެކެވެ. ބޭސް ހުއްޓާލުމާއެކު މި ސިގްނަލްތައް މެދުކެނޑި، މީހާގެ ކެއުމުގެ އާދަތައް ކުރީގެ ހާލަތަށް ރުޖޫޢަވެއެވެ. މިއީ އާންމުކޮށް ކެއުން ކޮންޓްރޯލްކޮށްގެން ބަރުދަން ލުއިކުރާ މީހުންނަށްވުރެ މާ އަވަހަށް ބަރުދަން އިތުރުވާ ސަބަބެއް ކަމަށްވެސް ދިރާސާގައި ފާހަގަކޮށްފައިވެއެވެ.

ދިރާސާވެރިން ބުނާގޮތުގައި، މި ނަތީޖާއިން އެނގެނީ ފަލަބައްޔަކީ ދިގުމުއްދަތަކަށް ފަރުވާ ބޭނުންވާ "ކްރޯނިކް" ބައްޔެއްގެ ގޮތުގައި ދެކެންޖެހޭ ކަމެވެ. ލޭ މައްޗަށް ދިއުމާއި ހަކުރު ބައްޔަށް ދާއިމީކޮށް ބޭސް ބޭނުންކުރާ ފަދައިން، ބައެއް މީހުންނަށް މި އިންޖެކްޝަންތައް ވެސް ދިގުމުއްދަތަކަށް ބޭނުންކުރަން ޖެހިދާނެއެވެ. ނަމަވެސް ބޭހުގެ އަގުބޮޑުވުމާއި، ބޭސް ލިބުމުގައި ހުރި ދަތިތަކާއި، ކުރިމަތިވާ ސައިޑް އިފެކްޓްތަކުގެ ސަބަބުން ގިނަ މީހުންނަށް ދިގުމުއްދަތަކަށް މި ފަރުވާ ކުރިއަކަށް ނުގެންދެވެއެވެ.

ސިއްހީ މާހިރުން ބުނާގޮތުގައި ބަރުދަން ލުއިކުރުމަށް ބޭސް ބޭނުންކުރި ނަމަވެސް، އޭގެ ނަތީޖާ ދާއިމީކޮށް ހިފެހެއްޓޭނީ ދިރިއުޅުމުގެ އާދަކާދަތަކަށް ގެންނަ ބަދަލުތަކުންނެވެ. މީގެ ތެރޭގައި ސިއްހަތަށް ފައިދާހުރި ކާނާ ކެއުމާއި، ގަވާއިދުން ކަސްރަތުކުރުމާއި، ނަފްސާނީ ގޮތުންނާއި އިރުޝާދުގެ ގޮތުން ލިބޭ އެހީތެރިކަން ހިމެނެއެވެ. އިންޖެކްޝަން ހުއްޓާލުމަށްފަހު ބަރުދަން އިތުރުވިޔަނުދީ ހިފެހެއްޓޭނީ މިފަދަ ވަށައިޖެހޭ ނިޒާމެއްގެ ތެރެއިން މަސައްކަތް ކޮށްގެން ކަމަށް މި ދިރާސާއިން ކަށަވަރުކޮށްދެއެވެ.