އެއްވެސް މަގުބޫލު ސަބަބެއް ނެތި އަލްއަބްރާރް ގުރޫޕުގެ ހަވާލުގައި އުމްރާގެ އަޅުކަމަށް ފުރުމަށް އިއްޔެ ރޭ ހަމަޖެހިފައި އޮތް 110 މީހުންގެ ދަތުރު އެއްވެސް މަގުބޫލު ސަބަބެއް ނެތި ކެންސަލްކުރި މައްސަލައިގައި އެ ގްރޫޕަށް ދީފައިވާ ހުއްދަ އިސްލާމިކް މިނިސްޓްރީން ސަސްޕެންޑުކޮށްފިއެވެ.

މިކަމާ ގުޅިގެން އިސްލާމިކް މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، އެންމެ ފަހު ވަގުތު މި ދަތުރު ކެންސަލްކުރުމާ ގުޅިގެން ގިނަ ބައެއްގެ ޝަކުވާ ލިބިފައިވާތީ، އެ މައްސަލަ މިހާރު ތަހުގީގު ކުރަމުން އަންނަ ކަމަށެވެ. މިހާތަނަށް ބެލި ބެލުމުން އެނގިފައިވާ ގޮތުގައި، މި ދަތުރު ކެންސަލްކޮށްފައިވަނީ ރާއްޖެއިން މީހުން އުމްރާއަށް ގެންދިއުމުގެ އުސޫލުތަކާ ކަނޑައެޅިގެން ހިލާފަށް، އެއްވެސް މަގުބޫލު އުޒުރެއް ނެތި ކަމަށް މިނިސްޓްރީން ވަނީ ބުނެފައެވެ.

"މި ސަބަބަށްޓަކައި، މި ކުންފުންޏަށް ދޫކުރެވިފައިވާ ދިވެހިރާއްޖެ އިން މީހުން އުމްރާ އަށް ގެންދިއުމާ ބެހޭ ހުއްދަ ވަގުތީ ގޮތުން ހިފަހައްޓައި، އެކަން އެ ކުންފުންޏަށް މިހާރު ވާނީ އަންގައިފަ އެވެ،" މިނިސްޓްރީގެ ބަޔާނުގައި ވެއެވެ.

މިނިސްޓްރީން އިތުރަށް ބުނެފައިވަނީ، އަބްރާރު ގުރޫޕުން އަމަލުކުރި ގޮތާ ގުޅޭ މައްސަލަ އިތުރަށް ބަލައި، އުސޫލުތަކުގެ ތެރެއިން އެ ކުންފުންޏާ މެދު އަޅަންޖެހޭ އެންމެހައި ފިޔަވަޅުތައް އަޅާނެ ކަމަށެވެ.

އަދި މި ދަތުރު ކެންސަލްވުމުގެ ސަބަބުން އުމްރާއަށް ނުފުރި ތިބި 110 މީހުންނަށް އެހީތެރިކަން ފޯރުކޮށްދެވޭނެ ގޮތްތަކެއް ހޯދުމަށް މިނިސްޓްރީން މިހާރު މަސައްކަތް ކުރަމުންދާ ކަމަށްވެސް އެ ބަޔާނުގައި ބުނެފައިވެއެވެ.