މާލެ ސަރަޙައްދުގެ ހުރިހާ ބޮޑެތި މިސްކިތްތަކެއްގައި މި ހުކުރު ދުވަހު އިމާމުވެ ހުކުރު ނަމާދުކުރާނީ ޒުވާން ޚަތީބުން ކަމަށް އިސްލާމިކް މިނިސްޓްރީން ހާމަކޮށްފިއެވެ.

މިކަމާ ގުޅޭގޮތުން އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސަޢީދު ވިދާޅުވީ، މާދަމާގެ ހުކުރު ނަމާދުގައި އިސްލާމީ މަރުކަޒާއި ކިންގް ސަލްމާން މިސްކިތުގެ އިތުރުން މާލޭގެ ފާހަގަކޮށްލެވޭ ހުރިހާ ބޮޑެތި މިސްކިތްތަކެއްގައި ހުކުރުކުރާނީ އިލްމީ ގޮތުން ފާހަގަކޮށްލެވޭ، ރީތިކޮށް ޤުރުއާން ކިޔަވާ ޒުވާން ޚަތީބުން ކަމަށެވެ.

މި ފުރުސަތަކީ ޒުވާނުންގެ ކިބައިގައި ހުރި ލީޑަރޝިޕްގެ ހުނަރުތައް ބަލައިގަނެ، އިސްލާމީ ދަޢުވަތުގެ މަސައްކަތްތަކުގައާއި ދީނީ ޚިދުމަތްތަކުގައި ޒުވާނުންނަށް އޮތް ފުރުސަތުތައް ފުޅާކުރުމުގެ ގޮތުން ދެވޭ ފުރުސަތެއް ކަމަށް މިނިސްޓަރ ފާހަގަކުރެއްވިއެވެ.

މީގެ އިތުރުން، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޒުވާން ޖީލެއް ބިނާކުރެއްވުމަށް ގެންގުޅުއްވާ ސިޔާސަތުގެ ދަށުން، އެ މަސައްކަތްޕުޅަށް އިތުރު ހިތްވަރެއް ދިނުމުގެ ގޮތުން ނިންމެވި ނިންމެވުމެއް ކަމަށްވެސް މިނިސްޓަރ ޝަހީމް ވިދާޅުވިއެވެ.

ސަރުކާރުން އަންނަނީ ދީނީ ކަންކަމަށް ޒުވާނުން ޝައުޤުވެރިކުރުވައި، ޒުވާން ޚަތީބުން ތަމްރީނުކުރުމުގެ ޚާއްޞަ ޕްރޮގްރާމްތަކެއް ހިންގަމުންނެވެ. މިގޮތުން މާލެއާއި އަތޮޅުތެރޭގެ ރަށްތަކުގައިވެސް މިހާރު ގިނަ އަދަދެއްގެ ޒުވާން ޚަތީބުން އަންނަނީ ހުކުރުކޮށް އިމާމުވެ ނަމާދުކުރަމުންނެވެ.