ދުނިޔޭގެ ބާޒާރުގައި ތެލުގެ އަގަށް އައި ބަދަލާ ގުޅިގެން، އެސްޓީއޯ އިން ވިއްކާ ޕެޓްރޯލާއި ޑީސަލްގެ އަގު މިއަދުން ފެށިގެން ބޮޑުކޮށްފިއެވެ.

މި ބަދަލަކީ އެމެރިކާއިން އިސްވެ، އިޒްރޭލުގެ ބައިވެރިވުމާއެކު އީރާނަށް ދެމުންދާ ހަމަލާތަކުގެ ސަބަބުން އުފެދިފައިވާ ހަނގުރާމައިގެ ހާލަތާ ގުޅިގެން، ދުނިޔޭގެ ބާޒާރަށް ތެޔޮ ސަޕްލައިކުރާ މިންވަރު ދަށްވުމުގެ ސަބަބުން އައި ބަދަލެއް ކަން ފާހަގަކުރެވެއެވެ.

އެސްޓީއޯ އިން ބުނީ މިއަދުން ފެށިގެން ޕެޓްރޯލް ލީޓަރެއް ވިއްކާ އަގު 16.01 ރުފިޔާއަށް ބޮޑުވެފައިވާ ކަަމަށެވެ. މީގެ ކުރިން ޕެޓްރޯލް ލީޓަރެއް ވިއްކަމުން އައީ 13.50 ރުފިޔާއަށެވެ. މިއީ ލީޓަރަކުން 2.51 ރުފިޔާގެ ބޮޑުވުމެކެވެ.

ޑީސަލްގެ އަގަށް ބަލާއިރު، ކުރިން 13.92 ރުފިޔާއަށް ލީޓަރެއް ލިބުނު ނަމަވެސް، ދެން ޑީސަލް ލީޓަރެއް ވިއްކާނީ 17.54 ރުފިޔާއަށެވެ. މިއީ ލީޓަރަކުން 3.62 ރުފިޔާގެ ބޮޑުވުމެކެވެ.

މިއީ ފަހުގެ ތާރީޚެއްގައި ރާއްޖޭގެ ބާޒާރުގައި ތެލުގެ އަގު މިހާ ބޮޑަށް އުފުލުނު ފުރަތަމަ ފަހަރު ކަން ފާހަގަކުރެވެެއެވެ.

ރާއްޖެއަށް އެންމެ ގިނަ އަދަދަކަށް ތެޔޮ އެތެރެކޮށް ވިއްކަނީ ސަރުކާރުގެ ބޮޑު ހިއްސާއެއް އޮންނަ އެސްޓީއޯ އިންނެވެ.