މަސްވެރިކަން ކުރަމުން އަންނަ އޮޑިފަހަރާއި އަލަށް ބަންނަމުންދާ އުޅަނދުފަހަރުތަކުގައި ލޮނުފެނުން މަސް ފިނިކުރާ ނިޒާމް ނުވަތަ ރެފްރިޖަރޭޓަޑް ސީ ވޯޓަރ (އާރްއެސްޑަބްލިއު) ސިސްޓަމް ގާއިމުކުރުމަށް ހިންގާ ފައިނޭންސިންގް ފެސިލިޓީގެ ދަށުން، މިހާތަނަށް 51 މިލިއަން ރުފިޔާ ދޫކޮށްފައިވާކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެއެވެ.

މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި، މިނިސްޓްރީގެ މަސައްކަތްތަކުގެ ތަފްސީލު ހާމަކުރައްވަމުން މިނިސްޓަރު ޝިޔާމް ވިދާޅުވީ، އާރްއެސްޑަބްލިއު ފެސިލިޓީއަށް ކުރިމަތިލުމަށް ހުޅުވާލި ފުރުސަތުގައި ޖުމްލަ 90 ފަރާތަކުން ކުރިމަތިލާފައިވާ ކަމަށެވެ. މީގެ ތެރެއިން 45 ފަރާތެއްގެ އެޕްލިކޭޝަން މިހާތަނަށް ބަލައިގަނެ، ލޯނު ހަމަޖައްސައިދީފައިވާ ކަމަށް މިނިސްޓަރު ފާހަގަކުރެއްވިއެވެ.

މި މަޝްރޫއަކީ ލައިވްސް އެންޑް ލައިވްލީހުޑްސް ފަންޑް (އެލްއެލްއެފް) އަދި އިސްލާމިކް ޑިވެލޮޕްމަންޓް ބޭންކް (އައިޑީބީ) ގެ އެހީތެރިކަމާއެކު ސަރުކާރުން ކުރިއަށްގެންދާ މުހިންމު މަޝްރޫއެކެވެ. މީގެ މައިގަނޑު މަގްސަދަކީ މަސްވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ ދިރިއުޅުމުގެ ފެންވަރު މަތިކޮށް، މަސްވެރި އުޅަނދުފަހަރަށް ދެމެހެއްޓެނިވި އަދި ހަކަތައިގެ ގާބިލުކަން ލިބިފައިވާ ޓެކްނޮލޮޖީއެއް ފޯރުކޮށްދިނުމެވެ. މި ނިޒާމުގެ ސަބަބުން ބާނާ މަހުގެ ފެންވަރު ހިފެހެއްޓުމުގައި މަސްވެރިންނަށް އަމިއްލަ ފުދުންތެރިކަން ހާސިލުކުރެވޭނެއެވެ.

"ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓަރ އިން މޯލްޑިވްސް ތްރޫ ސަސްޓެއިނަބަލް އެނަރޖީ" މަޝްރޫއުގެ ދަށުން ތައާރަފުކޮށްފައިވަނީ "މުރާބަހާ އާރްއެސްޑަބްލިއު ފައިނޭންސިންގ ފެސިލިޓީ" އެކެވެ. މި ފެސިލިޓީގެ ދަށުން އާރްއެސްޑަބްލިއު ސިސްޓަމްގެ އިތުރުން ޖެނެރޭޓަރު ސެޓާއި ސޯލާ ޕަވަރ ޕެނަލް ސިސްޓަމް ގަތުމަށްވެސް ފައިސާ ދޫކުރެއެވެ.

މި ފެސިލިޓީގެ ދަށުން ކޮންމެ ފަރާތަކަށްވެސް ގިނަވެގެން 2,000,000 (ދެ މިލިއަން) ރުފިޔާއާ ހަމައަށް ފައިސާ ދޫކުރެއެވެ. ފައިދާގެ ރޭޓަކީ އަހަރަކު 6 އިންސައްތައެވެ. މި ފެސިލިޓީގެ އެންމެ ހާއްސަ އެއް ކަމަކީ، ގަންނަ ތަކެތީގެ އަގުގެ 35 އިންސައްތަ ސަރުކާރުން ހިލޭ ދައްކައިދޭ ކަމެވެ. މި ލޯނު އަނބުރާ ދެއްކުމަށް 10 އަހަރުގެ މުއްދަތެއް ލިބޭއިރު، ފުރަތަމަ 6 މަސް ދުވަހަކީ ގްރޭސް ޕީރިއަޑްގެ ގޮތުގައި ކަނޑައަޅާފައިވާ މުއްދަތެކެވެ.